Yashastilaka 4.432

4.432

kṛtī vidvān tṛtīye īdṛgvidhe kāle śītakāle adhvani mārge prāṭet pragacchet | api tu na kaścit prāṭedityarthaḥ | kathaṃbhūte kāle | ikṣullāsini ikṣūn ullāsayati pācayatītyevaṃśīlaḥ sa tasmin | punaḥ kathaṃbhūte | sasyaśālini sasyairmudgamayudgayavacaṇakagodhūmādibhiḥ śālate ityevaṃśīlaḥ sa tasmin | 'śālṛ ślāghāyām' iti dhātoḥ prayogāt | punaḥ kathaṃbhūte | kharamatiśayena śephālitāṃ atiśītāmutphullayatītyevaṃśīlaḥ sa tathā tasmin | punaḥ kathaṃbhūte | krauñconmādini krauñcānutkrośapakṣiṇa unmādayati mattānkarotītyevaṃśīlaḥ sa tasmin | punaḥ kathaṃbhūte | kundanandini kundān mādhyapuṣpaviśeṣān nandayatītyevaṃśīla sa tasmin | punaḥ kathaṃbhūte | ghanāśleṣāṅganāpādini ghanāśleṣā gāḍhāliṅganā aṅganā strīrāpādayati nikārayatīti sa tasmin | punaḥ kathaṃbhūte | bhākhanmandini bhākhantaṃ mandayati atīvraṃ kārayatīti sa tasmin | punaḥ kathaṃbhūte | vātavāhini vātaṃ vāhayati pravartayatītyevaṃśīlaḥ sa tasmin | punaḥ kathaṃbhūte | himāsārāvasannāṅginī himāsāreṇa śiśirasamūhena avasannā gatibhaṅgasahitā aṅgino yasmin sa tasmin | punaḥ kathaṃbhūte | dīrgharātrighaṭini dīrghā rātrayaḥ triṃśaddhaṭikāpramāṇā rātrī rajanī ghaṭayati karotītyevaṃśīlaḥ sa tasmin | samuccayākṣepālaṃkāraḥ || yairityādi | he rājan, yaistvadvipadbhirvāsagehe dhavalagehe citraśālāyāṃ pūrvaṃ prasuptaṃ nidritam | kathaṃbhūtaistvadvipadbhiḥ | gāḍhakaṇṭhagrahavalitabhujābhoganirbhugnavakaiḥ | strīṇāmiti padaṃ gāḍhādinā ca padena saṃbandhanīyam | tenāyamarthaḥ-strīṇāṃ gāḍhaṃ dṛḍha yathā yo'sau kaṇṭhagraho bāhunā grīvāgrahaṇaṃ tasmin valitaḥ kuṇḍalīkṛto yo'sau bhujābhogo dordaṇḍamaṇḍalaṃ tena nirbhugnaṃ vakrīkṛtaṃ vaktraṃ yeṣāṃ te tathoktāstaiḥ | punaḥ kathaṃbhūtaiḥ | strīṇāṃ pīnastanāgravyuṭitahṛdayaiḥ pīnastanāgrābhyāmunnatakucacūcukābhyāṃ vyuṭitaṃ nimnīkṛtaṃ hṛdayaṃ yeṣāṃ dvipatāṃ te tathā taiḥ | tairadyadvipadbhiḥ adyāsmin śiśire śailāvakāśe parvatapradeśe aśāyi śayitam | kathaṃbhūte śailāvakāśe | samaruti śītavātasahite | kathaṃbhūtaistvadvipadbhiḥ | vakragrāvopadhānaiḥ vakrā viṣamā ye grāvāṇaḥ pāṣāṇāsteṣāṃ upadhāne śīrṣe yeṣāṃ te tathā taiḥ | punaḥ kathaṃbhūtaiḥ | urasi nihitāṣṭīvadaṣṭhīlavandhaiḥ urasi vinihito aṣṭīvatorjānunoraṣṭhīlabandho yaiste tathā taiḥ | parirattyalaṃkāraḥ ||