Yashastilaka 4.431

4.431

iti cāpeṭikapeṭikaprakaṭitakaṭakaprayāṇaprastāvastaṃ vijayavardhanasenāpatiṃ tasya
pañcālapateḥ pratāpanodanāya prāhiṇavam
kadācittuṣāragirinirjharanīhāraniṣyandini gandhamādanavanavibhrājitabhūrjavarakalonmāthamanthare mānasaṃsavilāsinīśikhaṇḍamaṇḍalaviḍambini
nepālaśailamekhalāmṛganābhisaurabhanirbhare kulūtakulakāminīkapolalāvaṇyacāmini lampākapurapuraṃdhrikādharamādhuryapaśyatohare pākapāṇḍimoḍḍamarapuṇḍrakāṇḍakāriṇi prāleyalavollāsapallavitanavayavāṅkure kośakāraśyāmikāpariṇāmapraṇayini śiśirasīkarasārastaraṅgitataruṇatarukisalayāgrabhāge rallakalomaniṣpannakambalalokalīlāvilāsini śephāliphullāhlādalālase krauñcakulakarālakekāravasphāriṇi nīrandhrarodhrarajaḥprasarapāṇḍuritadiṅmukhe kundakandalānandini lavalīlatārāmarāmaṇīyakaniketane kamalinīdaladahanahimavāhini
jāhnavījalamajjanajātajaḍabhāve taraṇitīriṇījalakelivyasaninei sarasvatīsalilodavāsatāpase navayauvanāṅganāstanakalaśoṣmaniṣevaṇādeśini priyāgurudhūpadhūmodgamanivātavalabhigarbhe ghanaghusṛṇarasarāgadviguṇaramaṇīmanasi bahalaprāvāraparicayaprasādhini pravardhitapravṛddhadhūmadhvajārādhanānubandhe samastasattvaromāñcakañcukācāriṇi malayamekhalālatānartanakutūhalita iva devadiśaḥ
parisarpati haimane maruti,
nalinīvanadainyaduḥkhita iva mandadyuti mārtaṇḍamaṇḍale, śītapātabhayasaṃkuciteṣviva laghuṣu, divaseṣu jāḍyajātajaḍajānuṣviva mandaprayāṇadīrghāsu
rātriṣu, saratsudhāsārasaṃtarpitanilimpaloka iva kṣīṇatejasi tuṣārakiraṇe,
ikṣūllāsini sasyaśālini kharaṃ śephālitotphulline
krauñconmādini kundanandini ghanāśleṣāṅganāpādini
bhākhanmandini vātavāhini himāsārāvasannāṅginī
kāle kāmini dīrgharātrinaṭini prāṭetkṛtī ko'dhvani