Vidhimargaprapa 25.18.2

25.18.2

sayaṇāvaggaṃ1 sammāṇei | tao tassa māipiibaṃdhuvaggo gurūṇāṃ pāe vaṃdiya bhaṇai-'icchākāreṇa sacittabhikkhaṃ paḍigāheha |' gurū bhaṇai-'icchāmo, vaṭṭamāṇajogeṇa |' tao gurusahio jāṇāsu ārūḍho maṃgalatūraraveṇaṃ sayameva dāṇaṃ diṃto jiṇabhavaṇe samāgacchai | laggāikāraṇe pacchā vā | tao jiṇāṇaṃ pūyaṃ karei
tao akkhayāṇaṃ aṃjaliṃ nālierasahithaṃ bhariūṇaṃ payāhiṇattayaṃ namokkārapuvvayaṃ dei | tao puvvottavihiṇā
pupphe akkhae vā khevāvijjai, parikkhānibhittaṃ | tao pacchā iriyāvāhiyaṃ paḍikkamiūṇa khamāsamaṇapuvvayaṃ
puvviṃ paḍivannasammattaiguṇo sīso bhaṇai-'icchākāreṇa tumbhe amhaṃ savvaviraisāmāiyaārovaṇatthaṃ ceiyāī
vaṃdāveha' | jo puṇa apaḍivannasammattaiguṇo so 'sammattasāmāiya-savvaviraisāmāiyaārovaṇatthaṃ' ti bhaṇai
gurū āha-'vaṃdāvemo' | puṇaravi khamāsamaṇaṃ dāuṃ, gurupurao jāṇūhiṃ ṭhāi | gurū vi tassa sīse vāse
khivei | tao guruṇā saha ceiyāī vaṃdei | gurū vi sayameva saṃtināha-saṃtidevayāithuīo dei | sāsaṇadevayākāussagge ujjoyagaracaukkaṃ caṃdesunimmalayarāpajjaṃtaṃ ciṃtaṃti | gurū vi pārittā thuī dei, sesā kāussaggaṭhiyā suṇaṃti | pacchā savve vi ya ujjoyagaraṃ paḍhaṃti | tao namokkārattayaṃ kahaṃti | tao jāṇūhiṃ
ṭhāūṇa sakkatthayaṃ paṃcaparameṭṭhitthavaṃ ca bhaṇaṃti | tao gurū vesamabhimaṃtei | pacchā khamāsamaṇaṃ dāuṃ sīso
bhaṇai-'icchākāreṇa saṃdisaha tumbhe amhaṃ rayaharaṇāvesaṃ samappeha' | tao namokkārapuvvaṃ 'sugṛhītaṃ kareha' tti
bhaṇaṃto sīsadakkhiṇabāhāsamuhaṃ raoharaṇadasiyāo karito puvvābhimuho uttarābhimuho vā vesaṃ samappei