Vidhimargaprapa 33.26

33.26

§ 67. evaṃ kappatippāivihipurassaraṃ sāhū samāṇiyasayalajogavihī mūlagaṃtha-naṃdi-aṇuogadāra-uttarajjhayaṇa-isibhāsiya-aṃga-uvaṃga-painnaya-cheyagaṃthaāgame vāijjā | ato vāyaṇāvihī bhaṇai -
tatha aṇuogamaṃḍaliṃ pamajjiya guruṇo nisijjaṃ raittā, dāhiṇapāse ya nisijjāe akkhe ṭhāittā,
gurūṇaṃ pāesu muhapottiyāpaḍilehaṇapuvvaṃ duvālasāvattavaṃdaṇaṃ dāuṃ, paḍhame khamāsamaṇe aṇuogaṃ āḍhavemo tti,
bīe aṇuogaāḍhavaṇatthaṃ kāussaggaṃ karemo tti bhaṇiya, aṇuogaāḍhavaṇatthaṃ karemi kāussaggaṃ annattha
ūsāsieṇamitchāi paḍhiya, aṭṭhassāsaṃ kāussaggaṃ kariya, pārittā paṃcamaṃgalaṃ bhaṇittā, paḍhame khamāsamaṇe
vāyaṇaṃ saṃdisāvemi, bīe vāyaṇaṃ paḍigāhemi, taie vaisaṇaṃ saṃdisāvemi, cautthe vaisaṇaṃ ṭhāmi tti bhaṇiūṇa,
nīyāsaṇattho muhapottiyāṭhaiyavayaṇo uvautto uciyasareṇaṃ vāijjā | je ke vi aṇuogaṃ āḍhaviya
uvauttā suṇanti tesiṃ savvesiṃ vāyaṇā laggai | aṇuoge āḍhatte niddā-vigahā-vattā-hāsa-paccakkhāṇadāṇāi
na kīrai | jassa sagāse taṃ suyamahijjiyaṃ tamegaṃ muttuṃ annassa guruṇo vi na abbhuṭṭhijjai | uddesagasamattīe chobhavaṃdaṇaṃ bhaṇaṃti | ajjhayaṇāisu vaṃdaṇagameva | aṇuogasamattīe paḍhamakhamāsaṇe aṇuogapaḍikkamaṇaṃ,
bīe aṇuogapaḍikkamaṇattha kāussaggu karahaṃ | aṇuogapaḍikkamaṇatthaṃ karemi kāussaggamitchāi paḍhiya,
aṭṭhassāsaṃ ussaggaṃ kāuṃ pārittā, paṃcamaṃgalaṃ bhaṇittā, guruṇo vaṃdaṃti tti
vāyaṇāvihī samatto