Pramāṇa · Search · About · API

Pamcasaga 18

Paṃcāsaga 18

Language
Māhārāṣṭrī Prakrit

18.1

sikkhāvayaṃtipayassa attho kahio ceva, ahavā duvihā sikkhā-gahaṇasikkhā, āsevaṇasikkhā ya, tattha
gahaṇasikkhā-suttapaḍhaṇāisarūvā, āsevaṇasikkhā puṇa uvahipaḍilehaṇapapphoḍaṇāivimayā evaṃvihasikkhāsahiyaṃ vayaṃ
sikkhāvayaṃ, tusaddo puṇasaddatthe, etthaṃti-sāvagadhamme, sāmāiyaṃti-samassa rāgaddosarahiyassa āo-lābho samāo, samabhāvo
tti jīvo paikkhaṇaṃ apuvvehiṃ nāṇadaṃsaṇacarittapajjavehiṃ nirūvamasuhaheūhiṃ ahokayaciṃtāmaṇikappadumovamehiṃ saṃjujjai,
evaṃvihalābhākāraṇaṃ kiriyāṇuṭṭhāṇaṃ sāmāiyaṃ vuccai, usaddo pādapūraṇe, tayaṃ tti taṃ puṇa sāmāiyaṃ vinneyaṃ-nāyavvaṃ
sāvajjajogavajaṇamāsevaṇarūvaṃti sāvajjajogāṇaṃ-asubhavāvārāṇaṃ vajjaṇaṃ-pariharaṇaṃ, niravajjajogāṇaṃ-subhavāvārāṇaṃ
āsevaṇaṃ-aṇuṭṭhāṇaṃ sāmāiyassa sarūvaṃti, ettha puṇa imā sāmāyārī-“ iha sāvago duviho-iḍḍhipatto aṇiḍḍhipatto ya,
jo so aṇiḍḍhipatto so ceiyaghare vā sāhusamīve vā gihe vā posahasālāe vā jattha vā vīsamati nivāvāro vā acchai
tattha savvattha sāmāiyaṃ kareti, causu ṭhāṇesu puṇa niyamā karei, tajahā-ceiyaghare sāhusamīve posahasālāe vā ghare vā
āvassayaṃ karetitti, tattha jai sāhusamīve karei, tayā eso vihī-jadi paraṃ parabhayaṃ natthi, jai keṇavi saha vivāo
natthi, jai kassavi davvaṃ na dharei, mā hou teṇa samaṃ kaḍukkitti, jai ya dharaṇagaṃ dahuṃ na geṇhai, mā hou bhaṃḍaṇaṃti, jai
pavayaṇamāyāu, ukkoseṇaṃ suttatthehiṃ jāva chajjīvaṇiyaṃ, atthao ullāveṇaṃ piṃḍesaṇajjhayaṇaṃ, na puṇa suttaovitti,
evaiyaṃ geṇhaitti | āsevāsikkhamāsajja sāhū sayala-saṃpunnaṃ muhapottipaḍaṇāiyaṃ sāmāyāriṃ sayaṃ jāvajjīvamāsevei, sāvao
puṇa itarakathasāmāiovi apariṇṇāṇau abhisaṃganivittīe asaṃbhavau aṇabbhāsāu ya na paḍipunnasāmāyāriṃ pāleitti,
ao sikkhakao sāhusāvagāṇaṃ bheutti dāraṃ 1 | tahā āgamaṃgagahāpāmannāu viseso, sā ceyaṃ-“ sāmāiyaṃmi u kae
samaṇo iva sāvao havai jamhā | eeṇa kāraṇeṇaṃ bahuso sāmāiyaṃ kujjā

18.1-2

” ettha gāhāe samaṇo iva bhaṇiyaṃ, na
puṇa samaṇo ceva, jahā-samudda iva taḍāgaṃ na puṇa samuddo cevatti, tao sārikkhayā ceva bhaṇiyā, na puṇa abheo, ao
visesotti dāraṃ 2 | uvavāyako viseso jahā-“ avirāhiyasāmannassa sāhuṇo sāvagassa ya jahaṇṇo | sohamme uvavāo
bhaṇio telokkadaṃsīhiṃ

18.1-3

” avirāhiyasāmaṇṇassa-pavvajjādivasāu ārabbha akhaṃḍiyasāmaṇṇabhāvassa sāhussa sāvagassa ya
avirāhiyasāvagabhāvassatti sesaṃ sugamaṃ, ukkoseṇaṃ sāhussa aṇuttaravimāṇesu, sāvagassa accuyakappe uvavāotti, dāraṃ 3
tahā ṭhiijanio bheo, jahā-jahaṇṇeṇaṃ sohamme sāhussa paliovamassa puhuttaṃ, sāvagassa puṇa paliovamaṃti, ukkoseṇaṃ aṇuttaravimāṇe uvavannassa sāhussa tettīsaṃ sāgarovamāiṃ, sāvagassa accue bāvīsaṃ ṭhiitti dāraṃ 4 | tahā gaībheyāovi bheo jahāvavahāreṇa sāmanneṇaṃ logaṭhiiṃ paḍucca sāhussa nārayatiriyanarāmarasiddhilakkhaṇāo paṃcagaīo, sāvagassa puṇa siddhigaivajjāu
cattāri, anne bhaṇaṃti-sāhussa devagaisiddhigaīo ceva bhavaṃti, sāvagassa siddhigaivajjāo cattāritti dāraṃ 5 | kasāyaudayāṇudayabheyāovi bheo-sāhussa cauṇhaṃ kohāisaṃjalaṇakasāyāṇaṃ uio aṇudao vā hojjā, jaṃi uio cauṇhaṃ vā tiṇhaṃ vā
doṇhaṃ vā egassa vā, aṇudaotti evaṃ ceva, chaumatthavīyarāgaṃ āiṃ kāūṇa bhāveyavvo, sāvagassa puṇa duvālasamaṇhaṃ aṭṭhaṇha ya udao,
jayā duvālasaṇhaṃ tayā aṇaṃtāṇubaṃdhivajjiyāṇa avirayaṃ paḍucca udao nāyavvo, jayā puṇa aṭṭhaṇhaṃ tayā aṇaṃtāṇubaṃdhiapaccakkhāṇa
vajjāṇaṃ desavirayassanti dāraṃ | tahā baṃdhabheyāo bheo, taṃjahā-mūlapayaḍīṇaṃ sāhū sattavihabaṃdhago aṭṭhavihabaṃdhago chavvihabaṃdhago
egavihabaṃdhago abaṃdhago ya bhavai, sāvago puṇa sattaṭṭhavihabaṃdhagotti, tattha ya-“ sattavihabaṃdhagā hoṃti pāṇiṇo āuvajjagāṇaṃ tu
taha suhumasaṃparāyā, chavvihabaṃdhā viṇiddiṭṭhā

18.2

mohāuyavajjāṇaṃ payaḍīṇaṃ te u baṃdhagā bhaṇiyā | uvasaṃtakhīṇamohā kevaliṇo
egavihabaṃdhā

18.3

te puṇa dusamayaṭhiiyassa baṃdhagā na uṇa saṃparāyassa | selesiṃ paḍivannā abaṃdhagā hoṃti nāyavvā

18.1-4

”
dāraṃ | tahā veyaṇābheyāo bheo, jahā-sāhū aṭṭhaṇhaṃ sattaṇhaṃ cauṇhaṃ vā kammāṇaṃ veyao bhavati, tattha aṭṭhaṇha jo vā so vā,
sattaṇhaṃ mohaṇīyavajjiyāṇaṃ uvasaṃtakhīṇamohachaumatthavīyarāgā, cauṇhaṃ aghāīṇaṃ kevalī veyagotti, sāvago puṇa niyamā aṭṭhaṇhaṃ
veyagotti dāraṃ | tahā-paḍivattikao bheo, jahā-sāhū paṃca mahavvayāṇi paḍipunnāṇi ceva paḍivajjai, sāvago puṇa egaṃ do
tiṇṇi cattāri paṃca vā aṇuvvayāṇitti, ahavā sāhū egayā sāmāiyaṃ paḍivajjai savvakālaṃ ca dhārei, sāvao puṇa aṇegaso
sāmāiyaṃ karei savvakālaṃ ca na dhāreitti dāraṃ | tahā aikkamajaṇiyabheyāo sāhusāvagāṇaṃ bheo, tahāhi-sāhū ekaṃ vayaṃ
kahiṃci aikkamaṃto paṃcavi aikkamai, bhaṇiyaṃ ca-“ cheyassa jāva dāṇaṃ tāva aikkamai neva egaṃpi | egaṃ aikkamaṃto aikkamai
paṃca mūleṇaṃ

18.26

” ti, sāvago puṇa ekkamaikkamaṃto ekaṃ ceva virāhei, na sesāṇitti dāraṃ | ahigayasāmāiyassa bheyā na
saṃbhavaṃti, ao te na daṃsiyā | dosaguṇā suyāṇusāreṇa bhāṇiyavvā | jayaṇā erisi kāyavvā-“ dhammajjhāṇovagao uvasaṃtappā
jogāṇaṃ duppaṇihāṇaṃ iha jaha jattao vivajjei | saiakaraṇayaṃ aṇavaṭṭhiyassa tahakaraṇayaṃ ceva

18.26-2

sāvajjapaccakkhāṇaṃ sāmāiyaṃ, tattha ya maṇoduppaṇihāṇāisu paccakkhāṇabhaṃgāu sāmāiyassa abhāva eva, paccakkhāṇabhaṃgajaṇiyaṃ pāyacchittaṃ ca bhavejjā, maṇoduppaṇihāṇaṃ ca dupparihāraṃ, maṇaso aṇavaṭṭiyattāu, ao sāmāiyapaḍivattisagamāsāo
sāmāigaappāḍivattī ceva suṃdaratti ?, āyario āha-na evaṃ, jao sāmāiyaṃ duvihaṃ tiviheṇa paḍivannaṃ, tattha ya maṇeṇaṃ na
karomitti evamāīṇi cha paccakkhāṇāṇi, ao egayarapaccakkhāṇabhaṃgevi sesapaccakkhāṇasaṃbhavāu na sāmāiyassa savvahā abhāvo,
micchādukkaḍeṇa maṇoduppaṇihāṇamettassa suhaṃsaṃbhavāo ya, savvaviraisāmāie vi micchādukkaḍeṇa maṇoduppaṇihāṇamettassa
suhaabbhuvagamāo, jao guttibhaṃge micchāmi dukkaḍaṃ pāyacchittaṃ bhaṇiyaṃ, jao āha-" bīo asamiomiṃtti, kīsa
sahasā agutto vā " bīo-aiyāro samiiguttimādibhaṃgarūvo aguttāveṇa sujjhatīyatthaḥ, ao na paḍivattisagamāsāu apaḍivattī suṃdaratti, tahā-"sāiyārāṇuṭṭhāṇāovi abbhāmao kāleṇa niraiyārāṇuṭṭhāṇaṃ hoi"tti puvvāyariyā bhaṇaṃti

Commentaries (1)