Pamcasaga 35

Paṃcāsaga 35

Language: Māhārāṣṭrī Prakrit

35.1 — 9 parts

35.1.1

tahā—
dāravāle sevamāṇeṇa bārasame saṃvacchare rāyā diṭṭho", tāhe rāyā taṃ daṭṭūṇaṃ saṃbhaṃto, imo so varāo mama suhadukkhasahāgago,
ettāhe karemi tti, tāhe bhaṇati-kiṃ demi tti ?, so bhaṇati-dekkhara (dehi mamaṃ) collue ghare jāva savvaṃmi bharahe, jāhe
niddiṃya hojjā tāhe puṇovi tujjha ghare āḍhaveūṇa bhuṃjāmi, rāyā bhaṇati-kiṃ te eeṇa ?, desaṃ te demi to suhaṃ chattacchāyāe
hatthikhaṃdhavaragao hiṃḍihisi, so bhaṇai-kiṃ mama eeheṇa āḍoveṇa ?, tāhe se dinno collugo, tato paḍhamadivase rāiṇo ghare
pajimio, teṇa se jugalayaṃ dīṇāro ya dinno, evaṃ so parivāḍīe savvesu rāulesu battīsā ya rāyavarasahassesu, tesiṃ ca je
bhojjā, tattha ya nagare aṇegāu kulakoḍīu, ṇayarassa ceva so kayā aṃtaṃ kāhiti ?, tāhe puṇo gāmesu, tāhe puṇo bharahavāsassa, avi so vaccejja aṃtaṃ ṇa ya māṇusattaṇāo bhaṭṭho puṇo māṇusattaṇaṃ lahai 1

35.1.2

pāsagatti cāṇakkassa suvannaṃ natthi, tāhe keṇa uvāeṇa viḍhavejja suvannaṃ ?, jaṃtapāsayā kayā, kei bhaṇaṃti-varadittayā,
tato ego dakkho puriso sikkhavio dīṇārāṇa thālaṃ bhariyaṃ, so bhaṇai-jai mamaṃ koi jiṇai so thālaṃ geṇhau, aha ahaṃ
jiṇāmi to egaṃ dīṇāraṃ jiṇāmi, tassa icchāe jaṃtaṃ paḍati, ao na tīrai jiṇiuṃ, jahā so na jippati evaṃ māṇusalaṃbhovi,
avi ṇāma sovi jippejja ṇa ya māṇusāu bhaṭṭho puṇaravi māṇusattaṇaṃ lahai 2

35.1.3

dhaṇṇetti jattiyāṇi bharahe dhaṇṇāṇi tāṇi savvāṇi piṃḍiyāṇi, tattha pattho sarisavāṇa chūḍo, tāṇi savvāṇi aṃbālī (aṭṭhayāli)yāṇi, tatthegā junnatherī suppaṃ gahāya te vī(viya)ṇejja, puṇo'vi patthaṃ pūrejja, avi sā devayāpasāeṇa pūrejja ṇa ya māṇusattaṇaṃ 3

35.1.4

jūe, jahā-ege rāyā, tassa sabhā khaṃbhahusayasaṃniviṭṭhā, tattha tattha atthāṇiyaṃ deti, ekkekko ya khaṃbho aṭṭhasayaṃsio, tassa
ranno putto rannakaṃkhī, ciṃtei-thero rāyā, māreūṇa rajjaṃ geṇhāmi, taṃ ca amacceṇa nāyaṃ, teṇa ranno siṭṭhaṃ, tato rāyā puttaṃ
amhe akkhemā āyā, jai tumaṃ egeṇa āeṇa ( hārejā puṇo mūlo jeyavā ), aṭṭhasayassa thaṃbhāṇaṃ ekkekke aṃsiṃ aṭṭhasae
vārā jiṇasi to tubbhe rajjaṃ, aviya devayā vibhāsā 4

35.1.5

rayaṇe jahā-ego vāṇiyao vuḍḍho, rayaṇāṇi bahūṇi se atthi, tattha ya mahe anne vāṇiyagā koḍipaḍāgāo ubbheṃti
so na ubbhaveti, tassa puttehiṃ there pautte tāṇi rayaṇāṇi desivāṇiyagāṇaṃ hatthe vikkiyāṇi, varaṃ amhevi koḍipaḍāgāo
ubbhavemo, te ya vāṇiyagā samaṃtao paḍigayā pārasakūlāiṇi, thero āgao, suyaṃ jahā-vikkiyāṇi, te aṃbāḍei, lahuṃ
rayaṇāṇi āṇeha, tāhe te savvao hiṃḍiumāraddhā, kiṃ te savarayaṇāṇi piṃḍejja ?, avi devayāpabhāveṇa vibhāsā 5

35.1.6

suviṇatti egeṇa kappaḍieṇa suviṇe caṃdo gilio, kappaḍiyāṇa kahiyaṃ, te bhaṇaṃti-saṃpunnacaṃdamaṃḍalasarisaṃ pāvacciyaṃ
(pūyaliyaṃ) labhihisi, laddhā gharachāyaṇiyāe, aṇṇeṇavi diṭṭho, so ṇhāiūṇa pupphaphalāṇi dāūṇa suviṇayapāḍhagassa kahei, teṇa
bhaṇiyaṃ-rāyā bhavissasi, io ya sattame divase tattha rāyā mao aputto, so ya nivaṇṇo acchati jāva āso ahavāsio
āgao, teṇa taṃ daṭṭūṇa hesithaṃ payākkhiṇī kao ya, tao vilaṅghao paṭṭu, evaṃ so rāyā saṃjāo, tāhe so kappaḍio taṃ suṇei,
jahā-teṇa vi diṭṭho, eriso sumiṇao, so āesaphaleṇa kira rāyā jāo, so ciṃtei-vaccāmi jacchagorosattha taṃ pivittā
suvāmi, jā puṇo taṃ ceva suviṇagaṃ pāsāmi, atthi puṇa so pecchejja ? avi ya so0 ṇa ya māṇusāo0 6

35.1.7

cakkatti dāraṃ, iṃdapura nagaraṃ, iṃdadatto rāyā, tassa iṭṭāṇa varāṇaṃ devīṇaṃ battīsaṃ puttā, anne bhaṇaṃti-“ekkāe ceva devīe
puttā,” rāiṇo pāṇasamā, annā ekkā ya amaccadhūyā, sā para pariṇeteṇa didviṭhṭhiyā, sā annayā kayāi ṇhāyā samāṇī acchai,
rannā diṭṭhā, kā esatti ?, tehi bhaṇiyaṃ-tujjhaṃ devī esā, tāhe so tāe samaṃ rattiṃ ekaṃ vasio, sā ya riuṇhāyā, tīse gabbho
laggo, sā ya amacceṇa bhaṇiecchiyā-jayā tava gabbho āhūo bhavai tayā mamaṃ sāhejāsu, tīe tassa kahitaṃ divaso muhutto jaṃ
ca raṇṇāeṇa ullaviyaṃ, teṇa taṃ pattae lihiyaṃ, so sāraveti, ṇavaṇhaṃ māsāṇaṃ dārao jāo, tassa dāsaceḍāṇi taddivasaṃ jāyāṇi,
taṃ0 aggimayao, pavayao, bahuliyā, sāgarao ya, tāṇi sahajāyagāṇi, teṇa kalāyariyassa uvaṇīo, teṇa lehāipāiyāu
gaṇiyappahāṇāu kalāu pagāhio, jāhe tāu gaheti āyario tāhe tāṇi taṃ kuḍeṃti pelleṃti ya, puvvaparisaeṇaṃ tāṇiṃpiti
roḍeṃti, teṇa tāṇi ṇa ceva gaṇitāṇi, gahiyāu kalāu, te anne bāvīsaṃ kumārā gāhijjaṃtā taṃ āyariyaṃ piḍeṃti avayaṇāṇi
ya bhaṇaṃti, jāhe te āyario piḍeṃti tāhe gaṃtūṇaṃ māūṇaṃ sāhaṃti, tāhe tāo āyariyaṃ khisaṃti, kīsa āhaṇasi taṃ, kiṃ
sulabhāṇi puttajammāṇi ? ao te na sikkhiyā, io ya mahurāe pavayao (jiyamattū) rāyā, tassa nibbui nāma dāriyā,
sā raṇṇo alaṃkiyā uvaṇīyā, rāyā bhaṇati-jo tava royai bhattāro taṃ geṇhāhi, tato tāe bhaṇiyaṃ jo bhūri vīro vikkaṃto so
mama bhattā hou, so puṇa rannaṃ dejā, tāhe sā balavāhaṇaṃ gahāya gayā iṃdapuraṃ nagaraṃ, tattha iṃdadattassa ranno bahave puttā, iṃdadatto tuṭṭho ciṃteti-ṇūṇaṃ ahaṃ arihaṃto saiṃhito laddho jeṇemā āgayā, tao ṇeṇa usabhapaḍaḍāyaṃ ṇayaraṃ kāriyaṃ, tattha ekkammi
akkhe aṭṭha cakkāṇi, tesiṃ purao dhauulliyā, sā akkhimmi viṃdhiyavvā, tao iṃdadatto rāyā sannaddho niggao saha puttehiṃ, sā
vi kannā savvālaṃkāravibhūsiyā egaṃmi pāse acchaṃti, so raṃgo rāyāṇo te ya daṃḍamaḍamoiyā jāriso dīsaīe, tattha ratto
jeṭṭho putto sirimālīnāmukumāro, so bhaṇio-putta esā dāriyā rajjaṃ ca ghettavvaṃ, ao viṃdha eyaṃ puttaliṃyaṃti, tāhe so
akayakaraṇo tassa samūhassa majjhe dhaṇuṃ ceva geṇhiuṃ na tarati, kahavi gāhiyaṃ teṇa, jao vaccau tao vaccautti mukko saro,
cakkehiṃ apphiḍiūṇa bhaggo, evaṃ kassai egaṃ aragataraṃ volīṇo kassai donni kassai tinni annesiṃ bāhireṇa ceva
nīti, tāhe rāyā aghirti pakkao-aho'haṃ eehiṃ dharisiuṃti, tato amacceṇa bhaṇiyaṃ-kīsa aghirti kareha ?, rāyā bhaṇatietehiṃ aha appahāṇo kao, amacco bhaṇati-atthi anno tujjha putto mama dhūyāe taṇao suriṃdadatto nāmā, so samattho
viṃdhiuṃ, ābhiṇṇāṇi se kahiyāṇi, kahiṃ ?, so darisio, tato rāiṇā avagūhato bhaṇio ya-seyaṃ tava ee aṭṭha rahacakke
bhettūṇa puttaliyaṃ akchiṃmi viṃdhittā rajjasaddiyaṃ nevatthaṃ dāriyaṃ saṃpāvittae, tao kumāro jaṃ āṇavehatti bhaṇiūṇa ṭhāṇaṃ ṭhāiūṇaṃ
dhaṇuṃ geṇhati, lukkabhimuhaṃ saraṃ sajjaṃti, tāṇi ya dāsarūvāṇi cauddisiṃ ṭhiyāṇi roḍaṃti, aṇṇe ya ubhao pāsiṃ gahiyakhaggā, jai kahavi lukkassa cukkai to sīsaṃ chiṃdiyavvaṃti, sovi se uvajjhāo pāse ṭhio bhayaṃ dei-mārijjasi jai cukkasi, te
bāvīsaṃvi kumārā esa viṃdhissatitti, te visemao ucchehāṇi vigghāṇi kareṃti, tato tāṇi cattāri te ya do purise bāvīsaṃ ca
kumāre aṇaṇeto tāṇaṃ aṭṭhaṇhaṃ rahacakkāṇaṃ aṃtaraṃ jāṇiūṇa taṃmi lukke niruddhāe diṭṭhīe anamaī ajjhuṇamāṇeṇa sā vīṃdhīiyā
vāme akchiṃmi viddhā, tao logeṇa kalakalummisso sāhukkāro kao, jaha taṃ cakkaṃ dukkaṃ bhettaṃ, evaṃ māṇusattaṃpi 7

35.1.8

cammetti sevālau, jahā-ego daho joyaṇasayasahassavicchiṇṇo cammeṇa paḍanno, egaṃ majjhe chiddaṃ, tattha kacchabhassa gocāmāi,
tattha kacchabho vāsasae vāsasae tae gīvaṃ pasārei, teṇa kahavi gīvā pasāriyā jāva teṇa chiḍeṇa niggayā, teṇa joisaṃ diṭhṭhaṃ
komuiyāe, so gao sayaṇijjayāṇaṃ dāemi, āṇettā savato paloeti ṇa pecchiti, avi so na ya māṇusāo0 8

35.1.p9

jugadidvaṃto jahā-“ puvvaṃte hojja jugaṃ avaraṃte tassa hojja samilā u | jugachiddaṃmi paveso iya saṃsaio maṇuyalaṃbho

35.2

jaha samilā pabbhaṭṭhā sāgarasalile aṇorapāraṃmi | pavisejja juggachiddaṃ kahāvi bhamaṃtī bhamaṃtaṃmi

35.3

sā caṃdavāyavīī paṇolliyā avi labhejja jugachiddaṃ | na ya māṇusāu bhaṭṭho jīvo paḍimāṇusaṃ lahai

35.1-2

” 9
iyāṇiṃ paramāṇū, jahā-ego khaṃbho mahappamāṇo, so deveṇa cunneūṇa avibhāgimāṇi khaṃḍāṇi kāūṇa naliyāe
pakkhitto, pacchā maṃdaracūliyāṭieṇa phūmiśro, tāṇi ṇaṭṭhāṇi, atthi puṇa koi tehiṃ ceva poggalehiṃ tameva khaṃbhaṃ ṇivattejjā,
no iṇame samaṭṭhe, eva bhaṭṭho māṇussāo0 na puṇo, ahavā sabhā aṇegakhaṃbhasayasanniviṭṭhā, sā kālaṃtareṇa jhāmiyā paḍiyā,
atthi puṇa koī tehiṃ ceva poggalehiṃ karejjā ?, no i0 10 | evaṃ māṇussattaṃ dullabhaṃ
“ iya dullahaṃlaṃbhaṃ māṇusattaṇaṃ pāviūṇa jo jīvo | na kuṇai pārattahiyaṃ so soyai saṃkamaṇakāle

Commentaries (1)

Cūrṇi of Yaśodeva — Yaśodeva, Prakrit