Suyagada 3.2

3.2

S/3.2 uvasaggajjhayaṇe taie /
ahime suhumā saṃgā | bhikkhūṇaṃ je duruttarā /
jattha ege visīyanti | na cayanti javittae ||1||
appege nāyagā dissa | royanti parivāriyā /
posa -e tāya puṭho si | kassa tāya jahāsi -e ||2||
piyā te therao tāya | sasā te khuḍḍiyā imā /
bhāyaro te sagā tāya | soyarā kiṃ jahāsi -e ||3||
māyaraṃ piyaraṃ posa | evaṃ logo bhavissai /
evaṃ khu loiyaṃ tāya | je pālenti ya māyaraṃ ||4||
uttarā mahurullāvā | puttā te tāya khuḍḍayā /
bhāriyā te navā tāya | mā sā annaṃ jaṇaṃ game ||5||
ehi tāya gharaṃ jāmo | mā ya kamme sahā vayaṃ /
biiyaṃ pi tāya pāsāmo | jāmu tāva sayaṃ gihaṃ ||6||
gantuṃ tāya puṇo gacche | na teṇāsamaṇo siyā /
akāmagaṃ parikkammaṃ | ko te vārium arihai ||7||
jaṃ kiṃci aṇagaṃ tāya | taṃ pi savvaṃ samīkayaṃ /
hiraṇṇaṃ vavahārāi | taṃ pi dāhāmu te vayaṃ ||8||
icceva -aṃ susehanti | kāluṇīyasamuṭhiyā /
vibaddho nāisaṃgehiṃ | tao gāraṃ pahāvai ||9||
jahā rukkhaṃ vaṇe jāyaṃ | māluyā paḍibandhai /
evaṃ -aṃ paḍibandhanti | nāio asamāhiṇā ||10||
vibaddho nāisaṃgehiṃ | hatthī vā vi navaggahe /
piṭhao parisappanti | suya go vva adūrae ||11||
ee saṃgā maṇūsāṇaṃ | pāyālā va atārimā /
kīvā jattha ya kissanti | nāisaṃgehi mucchiyā ||12||
taṃ ca bhikkhū parinnāya | savve saṃgā mahāsavā /
jīviyaṃ nāyakaṃkhijjā | soccā dhammam aṇuttaraṃ ||13||
ahime santi āvaā | kāsaveṇaṃ paveiyā /
buddhā jatthāvasappanti | sīyanti abuhā jahiṃ ||14||
rāyāṇo rāyamaccā ya | māhaṇā adu va khattiyā /
nimantayanti bhogehiṃ | bhikkhuyaṃ sāhujīviṇaṃ ||15||
hatthassarahajāṇehiṃ | vihāragamaṇehi ya /
bhuñja bhoge ime sagghe | maharisī pūjayāmu taṃ ||16||
vatthagandham alaṃkāraṃ | itthīo sayaṇāṇi ya /
bhuñjāhimāiṃ bhogāiṃ | āuso pūjayāmu taṃ ||17||
jo tume niyamo ciṇṇo | bhikkhubhāvammi suvvayā /
agāram āvasantassa | savvo saṃvijjae tahā ||18||
ciraṃ dūijjamāṇassa | doso dāṇiṃ kuo tava /
icceva -aṃ nimantenti | nīvāreṇa va sūyaraṃ ||19||
coiyā bhikkhacariyāe | acayantā javittae /
tattha mandā visīyanti | ujjāṇaṃsi va dubbalā ||20||
acayantā va lūheṇaṃ | uvahāṇeṇa tajjiyā /
tattha mandā visīyanti | ujjāṇaṃsi jaraggavā ||21||
evaṃ nimantaṇaṃ laddhuṃ | mucchiyā giddha itthisu /
ajjhovavannā kāmehiṃ | noijjantā gayā gihaṃ ||22|| ti bemi || uvasaggajjhayaṇe biiyuddese