Thanamga 3.4.7
Ṭhāṇaṃga 3.4.7
- Language
- Ardhamāgadhī Prakrit
3.4.7.1
jambuddīvē dīvē mandarassa pavvayassa dāhiṇē ṇaṁ taō akammabhūmīō pannattāō taṁ jahā — hēmavatē harivāsē dēvakurā, jambuddīvē dīvē mandarassa pavvayassa uttarē ṇaṁ taō akammūmīō pannattāō taṁ jahā — uttarakurā rammagavāsē hēraṇṇavaē.
3.4.7.2
jambuddīvē dīvē mandarassa pavvayassa dāhiṇē ṇaṁ taō vāsā pannattā taṁ jahā — bharahē hēmavaē harivāsē, jambuddīvē dīvē mandarassa pavvayassa uttarē ṇaṁ taō vāsā pannattā taṁ jahā rammagavāsē hēraṇṇavatē ēravaē.
3.4.7.3
jambuddīvē dīvē mandarassa pavvayassa dāhiṇē ṇaṁ taō vāsaharapavvatā pannattā taṁ jahā — cūllahimavantē mahāhimavantē nisaḍhē, jambuddīvē dīvē mandarassa pavvayassa uttarē ṇaṁ taō vāsaharapavvattā pannattā taṁ jahā — nīlavantē ruppī siharī jambuddīvē dīvē mandarassa pavvayarasa dāhiṇē ṇaṁ taō mahādahā pannattā taṁ jahā — paümadahē mahāpaü-madahē tigiñchadahē, tattha ṇaṁ taō dēvatāō mahiḍḍhiyāō jāva paliōvamaṭṭhitīyāō parivasanti taṁ jahā — sirī hirī dhitī, ēvaṁ- uttarēṇavi navaraṁ- kēsaridahē mahāpoṇḍarīyadahē poṇḍarīyadahē, dēvatāō-kittī buddhī lacchī.
3.4.7.4
jambuddīvē dīvē mandarassa pavvayassa dāhiṇē ṇaṁ cullahimavantāō vāsadharapavvatāō paümadahāō mahādahāō taō mahānadīō pavahanti taṁ jahā — gaṅgā sindhū rōhitaṁsā, jambuddīvē dīvē mandarassa pavvayassa uttarē ṇaṁ siharīō vāsaharapavvatāō poṇḍarīyaddahāō mahādahāō taō mahānadīō pavahanti taṁ jahā — suvaṇṇakūlā rattā rattavatī.
3.4.7.5
jambuddīvē dīvē mandarassa pavvayassa puratthimē ṇaṁ sītāē mahānadīē uttarē ṇaṁ taō antaranadīō pannattāō taṁ jahā — gāhāvatī dahavatī paṅkavatī, jambuddīvē dīvē mandarassa pavvayassa puratthimē ṇaṁ sītāē mahānadīē dāhiṇēṇaṁ taō antaranadīō pannattāō taṁ jahā — tattajalā mattajalā ummattajalā jambuddīvē dīvē mandarassa pavvayassa paccatthimē ṇaṁ-sītōdāē mahānadīē dāhiṇē ṇaṁ taō antaranadīō pannattāō taṁ jahā — khīrōdā sīhasōtā antōvāhiṇī, jambuddīvē dīvē mandarassa pavvayassa paccatthimē naṁ sītōdāē mahānadīē uttarē ṇaṁ taō antaranadīō pannattāō taṁ jahā — ummimāliṇī phēṇamāliṇī gambhīramāliṇī.
3.4.7.6
ēvaṁ- ghāyaïsaṇḍē dīvē puratthimaddhēvi akammabhūmīō āḍhavettā jāva antaranadīotti niravasēsaṁ bhāṇiyavvaṁ jāva pukkharavaradīvaḍḍhapaccatthimaddhē tahēva ṇiravasēsaṁ bhāṇiyavvaṁ.
Translations (2)
- Ṭhāṇaṃga: Hindi translation (Dīparatnasāgara, 2019) — Hindi
- Ṭhāṇaṃga: Gujarati translation (Dīparatnasāgara, 2020) — Gujarati
Commentaries (2)
- Sthānāṅgavṛtti — Abhayadeva Sūri, Sanskrit
- Ṭhāṇaṃga: ṭīkānusārī vivecana — Muni Dīparatnasāgara, Gujarati