Pramāṇa · Search · About · API

Nayadhammakahao 1.16.22

Nāyādhammakahāo 1.16.22

Language
Ardhamāgadhī Prakrit

1.16.22.1

taē ṇaṁ tē pañca paṇḍavā jēṇēva hatthiṇāurē nayarē tēṇēva uvāgacchanti uvāgacchittā jēṇēva paṇḍū rāyā tēṇēva uvāgacchanti uvāgacchittā karayala0 ēvaṁ vayāsī — ēvaṁ khalu tāō! amhē kaṇhēṇaṁ nivvisayā āṇattā, taē ṇaṁ paṇḍū rāyā tē pañca paṇḍavē ēvaṁ vayāsī — kahaṇṇaṁ puttā! tubbhē kaṇhēṇaṁ vāsudēvēṇaṁ nivvisayā āṇattā? tē ṇaṁ tē pañca paṇḍavā paṇḍuṁ rāyaṁ ēvaṁ vayāsī — ēvaṁ khalu tāō! amhē avarakaṅkāō paḍiniyattā lavaṇasamuddaṁ dōṇṇi jōyaṇasayasahassāiṁ vīīvaïtthā.

1.16.22.2

taē ṇaṁ sē kaṇhē vāsudēvē amhē ēvaṁ vayaï- gacchaha ṇaṁ tubbhē dēvāṇuppiyā! gaṅgaṁ mahānaïṁ uttaraha jāva tāva ahaṁ ēvaṁ tahēva jāva ciṭṭhāmō, taē ṇaṁ sē kaṇhē vāsudēvē suṭṭhiyaṁ lavaṇāhivaïṁ daṭṭhūṇaṁ0 taṁ cēva savvaṁ navaraṁ kaṇhassa cinttā na vuccati jāva nivvisaē āṇavēi.

1.16.22.3

taē ṇaṁ sē paṇḍū rāyā tē pañca paṇḍavē ēvaṁ vayāsī — duṭṭha ṇaṁ puttā! kayaṁ kaṇhassa vāsudēvassa vippiyaṁ karēmāṇēhiṁ, taē ṇaṁ sē paṇḍū rāyā kōnti dēviṁ saddāvēi saddāvēttā ēvaṁ vayāsī — gacchaha ṇaṁ tumaṁ dēvāṇuppiē bāravaïṁ nayariṁ kaṇhassa vāsudēvassa ēvaṁ nivēēhi- ēvaṁ khalu dēvāṇuppiyā! tumē pañca paṇḍavā nivvisayā āṇattā tumaṁ ca ṇaṁ dēvāṇuppiyā! dāhiṇaḍḍhabharahassa sāmī! taṁ sandisantu ṇaṁ dēvāṇuppiyā! tē pañca paṇḍavā kayaraṁ dēsaṁ vā disaṁ vā vidisaṁ vā gacchantu?.

1.16.22.4

taē ṇaṁ sā kōntī paṇḍuṇā ēvaṁ vuttā samāṇī hatthikhandhaṁ duruhaï durūhittājahā hēṭṭhā jāva sandisantu ṇaṁ piucchā! kimāgamaṇapaōyaṇaṁ? tatē ṇaṁ sā kōntī dēvī kaṇhaṁ vāsudēvaṁ ēvaṁ vayāsī — ēvaṁ khalu puttā tumē pañcapaṇḍavā nivvisayā āṇattā tumaṁ ca ṇaṁ dāhiṇaḍḍhabharahassa jāva vidisiṁ vā0 gacchantu? taē ṇaṁ sē kaṇhē vāsudēvē kōnti dēviṁ ēvaṁ vayāsī — apūīvayaṇā ṇaṁ piucchā! uttamapurisā-vāsudēvā baladēvā cakkavaṭṭī taṁ gacchantu ṇaṁ pañca paṇḍavā dāhiṇillaṁ vēyāliṁ tattha paṇḍumahuraṁ nivēsantu mamaṁ adiṭṭhasēvagā bhavantu tti kaṭṭu kōnti dēviṁ sakkārēi sammāṇēi jāva paḍivisajjēi.

1.16.22.5

taē ṇaṁ sā kōnti dēvī jāva paṇḍussa ēyamaṭṭhaṁ nivaēi, taē ṇaṁ paṇḍūra rāyā pañca paṇḍavē saddāvēi saddāvēttā ēvaṁ vayāsī — gacchaha ṇaṁ tubbhē puttā! dāhiṇillaṁ vēyāliṁ tattha ṇaṁ tubbhē paṇḍumahuraṁ nivēsēha.

1.16.22.6

taē ṇaṁ tē pañca paṇḍavā paṇḍussa raṇṇō jāva tahatti paḍisuṇēnti paḍisuṇēttā sabalavāhaṇā hayagaya0 hatthiṇāurāō paḍinikkhamanti paḍinikkhamittā jēṇēva dakkhiṇillē vēyālī tēṇēva uvāgacchanti uvāgacchittā paṇḍumahuraṁ nagariṁ nivēsanti tatthavi ṇaṁ tē vipulabhōga samiti samaṇṇāgayā yāvi hōtthā.

Translations (2)

Commentaries (2)