Uvasagadasao 1.5

1.5

evaṃ khalu jaṃbū! teṇaṃ kāleṇaṃ teṇaṃ samaeṇaṃ vāṇiyagāme nāmaṃ nayare hotthā–vaṇṇao|
tassa vāṇiyagāmassa nayarassa bahiyā uttarapuratthime disībhāe, ettha ṇaṃ dūipalāsae nāmaṃ ceie|
tattha ṇaṃ vāṇiyagāme nayare jiyasattū rāyā hotthā–vaṇṇao|
tattha ṇaṃ vāṇiyagāme nayare ānaṃde nāmaṃ gāhāvaī parivasai–aḍḍhe ditte vitte vicchinna-viulabhavana-sayanāsana-jāṇa-vāhane bahudhana-jāyarūva-rayae āogapaogasaṃpautte vicchaḍḍiyapaura-bhattapāṇe bahudāsī-dāsa-go-mahisa-gavelagappabhūe bahujanassa aparibhūe|
tassa ṇaṃ ānaṃdassa gāhāvaissa cattāri hiraṇṇakoḍīo nihāṇapauttāo, cattāri hiraṇṇa-koḍīo vaḍḍhipauttāo cattāri hiraṇṇakoḍīo pavittharapauttāo, cattāri vayā dasagosāhassieṇaṃ vaeṇaṃ hotthā|
se ṇaṃ ānaṃde gāhāvaī bahūṇaṃ rāīsara-talavara-māḍaṃbiya-koḍuṃbiya-ibbha-seṭṭhi-senāvaī-satthavāhāṇaṃ bahūsu kajjesu ya kāraṇesu ya kuḍuṃbesu ya maṃtesu ya gujjhesu ya rahassesu ya nicchaesu ya vavahāresu ya āpucchaṇijje paḍipucchaṇijje, sayassa vi ya ṇaṃ kuḍuṃbassa meḍhī pamāṇaṃ āhāre ālaṃbaṇaṃ cakkhū, meḍhībhūe pamāṇabhūe āhārabhūe ālaṃbanabhūe cakkhubhūe savvakajjavaḍḍhāvae yāvi hotthā|
tassa ṇaṃ ānaṃdassa gāhāvaissa sivānaṃdā nāmaṃ bhāriyā hotthā–ahīna-paḍipuṇṇa-paṃciṃdiya-sarīrā lakkhaṇa-vaṃjaṇa-guṇovaveyā māṇummāṇa-ppamāṇa-paḍipuṇṇa-sujāya-savvaṃga-suṃdaraṃgī sasi-somākāra-kaṃta-piya-daṃsaṇā surūvā, ānaṃdassa gāhāvaissa iṭṭhā, ānaṃdeṇaṃ gāhāvaiṇā saddhiṃ anurattā avirattā, iṭṭhe sadda-pharisa-rasa-rūva-gaṃdhe paṃcavihe mānussae kāmabhoe paccaṇubhavamāṇī viharai|
tassa ṇaṃ vāṇiyagāmassa nayarassa bahiyā uttarapuratthime disībhāe, ettha ṇaṃ kollāe nāmaṃ sannivese hotthā–riddha-tthimie jāva pāsādie darisaṇijje abhirūve paḍirūve|
tattha ṇaṃ kollāe sannivese ānaṃdassa gāhāvaissa bahave mitta-nāi-niyaga-sayaṇa-saṃbaṃdhi-parijane parivasai–aḍḍhe jāva bahujanassa aparibhūe|
teṇaṃ kāleṇaṃ teṇaṃ samaeṇaṃ samaṇe bhagavaṃ mahāvīre jāva jeṇeva vāṇiyagāme nayare jeṇeva dūipalāsae ceie teṇeva uvāgacchai, uvāgacchittā ahāpaḍirūvaṃ oggahaṃ ogiṇhittā saṃjameṇaṃ tavasā appāṇaṃ bhāvemāṇe viharai|
parisā niggayā|
kūṇie rāyā jahā, tahā jiyasattū niggacchai jāva pajjuvāsai|
tae ṇaṃ se ānaṃde gāhāvaī imīse kahāe laddhaṭṭhe samāṇe– evaṃ khalu samaṇe bhagavaṃ mahāvīre puvvāṇupuvviṃ caramāṇe gāmāṇugāmaṃ dūijjamāṇe ihamāgae iha saṃpatte iha samosaḍhe iheva vāṇiyagāmassa nayarassa bahiyā dūipalāsae ceie ahāpaḍirūva oggahaṃ ogiṇhittā saṃjameṇaṃ tavasā appāṇaṃ bhāvemāṇe viharai| taṃ mahapphalaṃ khalu bho! devānuppiyā! tahārūvāṇaṃ arahaṃtāṇaṃ bhagavaṃtāṇaṃ nāmagoyassa vi savaṇayāe, kimaṃga puṇa abhigamana-vaṃdana-namaṃsaṇa-paḍipucchaṇa-pajjuvāsaṇayāe? egassavi āriyassa dhammiyassa suvayaṇassa savaṇayāe, kimaṃga puṇa viulassa aṭṭhassa gahaṇayāe?
taṃ gacchāmi ṇaṃ devānuppiyā! samaṇaṃ bhagavaṃ mahāvīraṃ vaṃdāmi namaṃsāmi sakkāremi sammāṇemi kallāṇaṃ maṃgalaṃ devayaṃ ceiyaṃ pajjuvāsāmi–evaṃ saṃpehei, saṃpehittā ṇhāe kayabalikamme kaya-kouya maṃgalapāyacchitte suddhappāvesāiṃ maṃgallāiṃ vatthāiṃ pavara parihie appamahagghābharaṇālaṃkiyasarīre sayāo gihāo paḍinikkhamai, paḍinikkhamittā sakoreṃṭamalladāmeṇaṃ chatteṇaṃ dharijjamāṇeṇaṃ manussavaggurāparikhitte pādavihāracāreṇaṃ vāṇiyagāmaṃ nayaraṃ majjhaṃmajjheṇaṃ niggacchai, niggacchittā jeṇāmeva dūipalāsae ceie, jeṇeva samaṇe bhagavaṃ mahāvīre teṇeva uvāgacchai, uvāgacchittā samaṇaṃ bhagavaṃ mahāvīraṃ tikkhutto āyāhiṇa-payāhiṇaṃ karei, karettā vaṃdai namaṃsai vaṃdittā namaṃsittā naccāsaṇṇe nāidūre sussūsamāṇe namaṃsamāṇe abhimuhe vinaeṇaṃ paṃjaliuḍe pajjuvāsai|