Uvasagadasao 9.57

9.57

jai ṇaṃ bhaṃte! samaṇeṇaṃ bhagavayā mahāvīreṇaṃ jāva saṃpatteṇaṃ sattamassa aṃgassa uvāsagadasāṇaṃ aṭṭhamassa ajjhayaṇassa ayamaṭṭhe pannatte, navamassa ṇaṃ bhaṃte! ajjhayaṇassa ke aṭṭhe pannatte?
evaṃ khalu jaṃbū! teṇaṃ kāleṇaṃ teṇaṃ samaeṇaṃ sāvatthī nayarī| koṭṭhae ceie| jiyasattū rāyā|
tattha ṇaṃ sāvatthīe nayarīe naṃdiṇīpiyā nāmaṃ gāhāvaī parivasai–aḍḍhe jāva bahujanassa aparibhūe|
tassa ṇaṃ naṃdinīpiyassa gāhāvaissa cattāri hiraṇṇakoḍīo nihāṇapauttāo, cattāri hiraṇṇakoḍīo vaḍḍhipauttāo cattāri hiraṇṇakoḍīo pavittharapauttāo, cattāri vayā dasagosāhassieṇaṃ vaeṇaṃ hotthā|
se ṇaṃ naṃdīnīpiyā gāhāvaī bahūṇaṃ jāva āpucchaṇijje paḍipucchaṇijje, sayassa vi ya ṇaṃ kuḍuṃbassa meḍhī jāva savva-kajjavaḍḍhāvae yāvi hotthā|
tassa ṇaṃ naṃdinīpiyassa gāhāvaissa assiṇī nāmaṃ bhāriyā hotthā–ahīna-paḍipuṇṇa-paṃciṃdiyasarīrā jāva mānussae kāmabhoe paccaṇubhavamāṇī viharai|
teṇaṃ kāleṇaṃ teṇaṃ samaeṇaṃ sāmī samosaḍhe| parisā niggayā|
kūṇie rāyā jahā, tahā jiyasattū niggacchai jāva pajjuvāsai|
tae ṇaṃ se naṃdinīpiyā gāhāvaī imīse kahāe laddhaṭṭhe samāṇe–evaṃ khalu samaṇe bhagavaṃ mahāvīre puvvāṇupuvviṃ caramāṇe gāmānugāmaṃ dūijjamāṇe ihamāgae iha saṃpatte iha samosaḍhe iheva sāvatthīe nayarīe bahiyā koṭṭhae ceie ahāpaḍirūvaṃ oggahaṃ ogiṇhittā saṃjameṇaṃ tavasā appāṇaṃ bhāvemāṇe viharai|
taṃ mahapphalaṃ khalu bho! devānuppiyā! tahārūvāṇaṃ arahaṃtāṇaṃ bhagavaṃtāṇaṃ nāmagoyassa vi savaṇayāe, kimaṃga puṇa abhigamana-vaṃdana-namaṃsaṇa-paḍipucchaṇa-pajjuvāsaṇayāe? egassa vi āriyassa dhammiyassa suvayaṇassa savaṇayāe, kimaṃga puṇa viulassa aṭṭhassa gahaṇayāe? taṃ gacchāmi ṇaṃ devānuppiyā! samaṇaṃ bhagavaṃ mahāvīraṃ vaṃdāmi ṇamaṃsāmi sakkāremi sammāṇemi kallāṇaṃ maṃgalaṃ devayaṃ ceiyaṃ pajjuvāsāmi– evaṃ saṃpehei, saṃpehettā ṇhāe kayabalikamme kaya-kouya-maṃgala-pāyacchitte suddhappāvesāiṃ maṃgallāiṃ vatthāiṃ pavara parihie appamahagghābharaṇālaṃkiyasarīre sayāo gihāo paḍinikkhamai, paḍinikkhamittā sakoreṃṭamalladāmeṇaṃ chatteṇaṃ dharijjamāṇeṇaṃ manussavaggurāparikhitte pādavihāracāreṇaṃ sāvatthiṃ nayariṃ majjhaṃmajjheṇaṃ niggacchai, niggacchittā jeṇāmeva koṭṭhae ceie, jeṇeva samaṇe bhagavaṃ mahāvīre, teṇeva uvāgacchai, uvāgacchittā samaṇaṃ bhagavaṃ mahāvīraṃ tikkhutto āyāhiṇa-payāhiṇaṃ karei, karettā vaṃdai namaṃsai, vaṃdittā namaṃsittā naccāsaṇṇe nāidūre sussūsamāṇe namaṃsamāṇe abhimuhe vinaeṇaṃ paṃjaliuḍe pajjuvāsai|
tae ṇaṃ samaṇe bhagavaṃ mahāvīre naṃdiṇīpiyassa gāhāvaissa tīse ya mahaimahāliyāe parisāe jāva dhammaṃ parikahei| parisā paḍigayā, rāyā ya gae|
tae ṇaṃ se naṃdinīpiyā gāhāvaī samaṇassa bhagavao mahāvīrassa aṃtie dhammaṃ nisamma haṭṭhatuṭṭha-cittamāṇaṃdie pīimaṇe paramasomaṇassie harisavasa-visappamāṇahiyae uṭṭhāe uṭṭhei, uṭṭhettā samaṇaṃ bhagavaṃ mahāvīraṃ tikkhutto āyāhiṇa-payāhiṇaṃ karei, karettā vaṃdai namaṃsai, vaṃdittā namaṃsittā evaṃ vayāsī–saddahāmi ṇaṃ bhaṃte! niggaṃthaṃ pāvayaṇaṃ, pattiyāmi ṇaṃ bhaṃte! niggaṃthaṃ pāvayaṇaṃ, roemi ṇaṃ bhaṃte! niggaṃthaṃ pāvayaṇaṃ, abbhuṭṭhemi ṇaṃ bhaṃte! niggaṃthaṃ pāvayaṇaṃ| evameyaṃ bhaṃte! tahameyaṃ bhaṃte! avitahameyaṃ bhaṃte! asaṃdi-ddhameyaṃ bhaṃte! icchiyameyaṃ bhaṃte! paḍicchiyameyaṃ bhaṃte! icchiya-paḍicchiyameyaṃ bhaṃte! se jaheyaṃ tubbhe vadaha| jahā ṇaṃ devānuppiyāṇaṃ aṃtie bahave rāīsara-talavara-māḍaṃbiya-koḍuṃbiya-ibbhaseṭṭhi-senāvai-satthavāhappabhiiyā muṃḍā bhavittā agārāo anagāriyaṃ pavvaiyā, no khalu ahaṃ tahā saṃcāemi muṃḍe bhavittā agārāo anagāriyaṃ pavvaittae| ahaṃ ṇaṃ devānuppiyāṇaṃ aṃtie paṃcāṇuvvaiyaṃ sattasikkhā-vaiyaṃ–duvālasavihaṃ sāvagadhammaṃ paḍivajjissāmi|
ahāsuhaṃ devānuppiyā! mā paḍibaṃdhaṃ karehi|
tae ṇaṃ se naṃdīnīpiyā gāhāvaī samaṇassa bhagavao mahāvīrassa aṃtie sāvayadhammaṃ paḍivajjai|
tae ṇaṃ samaṇe bhagavaṃ mahāvīre annadā kadāi sāvatthīe nayarīe koṭṭhayāo ceiyāo paḍinikkhamai, paḍinikkhamittā bahiyā janavayavihāraṃ viharai|
tae ṇaṃ se naṃdīnīpiyā samaṇovāsae jāe–abhigayajīvājīve jāva samaṇe niggaṃthe phāsu-esaṇijjeṇaṃ asana-pāna-khāima-sāimeṇaṃ vattha-paḍiggaha-kaṃbala-pāyapuṃchaṇeṇaṃ osaha-bhesajjeṇaṃ pāḍihārieṇa ya pīḍha-phalaga-sejjā-saṃthāraeṇaṃ paḍilābhemāṇe viharai|
tae ṇaṃ sā assiṇī bhāriyā samaṇovāsiyā jāyā–abhigayajīvājīvā jāva samaṇe niggaṃthe phāsu-esaṇijjeṇaṃ asana-pāna-khāima-sāimeṇaṃ vattha-paḍiggaha-kaṃbala-pāyapuṃchaṇeṇaṃ osaha-bhesajjeṇaṃ pāḍihārieṇa ya pīḍha-phalaga-sejjā-saṃthāraeṇaṃ paḍilābhemāṇī viharai|
tae ṇaṃ tassa naṃdiṇīpiyassa samaṇovāsagassa bahūhiṃ sīla-vvaya-guṇa-veramaṇa-paccakkhāṇa-posahovavāsehiṃ appāṇaṃ bhāvemāṇassa coddasa saṃvaccharāiṃ vīikkaṃtāiṃ, pannarasamassa saṃvaccharassa aṃtarā vaṭṭamāṇassa annadā kadāi puvvarattāvarattakālasamayaṃsi dhammajāgariyaṃ jāgaramāṇassa imeyārūve ajjhatthie ciṃtie patthie manogae saṃkappe samuppajjitthā– evaṃ khalu ahaṃ sāvatthīe nayarīe bahūṇaṃ jāva āpucchaṇijje paḍipucchaṇijje, sayassa vi ya ṇaṃ kuḍuṃbassa meḍhī jāva savvakajjavaḍḍhāvae, taṃ eteṇa vakkheveṇaṃ ahaṃ no saṃcāemi samaṇassa bhagavao mahāvīrassa aṃtiyaṃ dhammapannattiṃ uvasaṃpajjittā ṇaṃ viharittae|
tae ṇaṃ se naṃdinīpiyā samaṇovāsae jeṭṭhaputtaṃ mitta-nāi-niyaga-sayaṇa-saṃbaṃdhi-parijanaṃ ca āpucchai, āpucchittā sayāo gihāo paḍinikkhamai, paḍinikkhamittā sāvatthiṃ nayariṃ majjhaṃ-majjheṇaṃ niggacchai, niggacchittā jeṇeva posahasālā, teṇeva uvāgacchai, uvāgacchittā posahasālaṃ pamajjai, pamajjittā uccārapāsavaṇabhūmiṃ paḍilehei, paḍilehettā dabbhasaṃthārayaṃ saṃtharei, saṃtharettā dabbhasaṃthārayaṃ duruhai, duruhittā posahasālāe posahie baṃbhayārī ummukkamaṇisuvaṇṇe vavagayamālā-vaṇṇagavilevaṇe nikkhittasatthamusale ege abīe dabbhasaṃthārovagae samaṇassa bhagavao mahāvīrassa aṃtiyaṃ dhammapannattiṃ uvasaṃpajjittā ṇaṃ viharai|
tae ṇaṃ se naṃdiṇīpiyā samaṇovāsae paḍhamaṃ uvāsagapaḍimaṃ uvasaṃpajjittā ṇaṃ viharai|
tae ṇaṃ se naṃdiṇīpiyā samaṇovāsae paḍhamaṃ uvāsagapaḍimaṃ ahāsuttaṃ ahākappaṃ ahāmaggaṃ ahātaccaṃ samaṇaṃ kāeṇaṃ phāsei pālei sohei tīrei kittei ārāhei|
tae ṇaṃ se naṃdiṇīpiyā samaṇovāsae doccaṃ uvāsagapaḍimaṃ, evaṃ taccaṃ, cautthaṃ, paṃcamaṃ, chaṭṭhaṃ, sattamaṃ, aṭṭhamaṃ, navamaṃ, dasamaṃ, ekkārasamaṃ uvāsagapaḍimaṃ ahāsuttaṃ ahākappaṃ ahāmaggaṃ ahātaccaṃ sammaṃ kāeṇaṃ phāsei pālei sohei tīrei kittei ārāhei|
tae ṇaṃ se naṃdiṇīpiyā samaṇovāsae teṇaṃ orāleṇaṃ viuleṇaṃ payatteṇaṃ paggahieṇaṃ tavokammeṇaṃ sukke lukkhe nimmaṃse aṭṭhicammāvaṇaddhe kiḍikiḍiyābhūe kise dhamaṇisaṃtae jāe|
tae ṇaṃ tassa naṃdiṇīpiyassa samaṇovāsagassa annadā kadāi puvvarattāvarattakālasamayaṃsi dhammajāgariyaṃ jāgaramāṇassa ayaṃ ajjhatthie ciṃtie patthie manogae saṃkappe samuppajjitthā–evaṃ khalu ahaṃ imeṇaṃ eyārūveṇaṃ orāleṇaṃ viuleṇaṃ payatteṇaṃ paggahieṇaṃ tavokammeṇaṃ sukke lukhke nimmaṃse aṭṭhicammāvaṇaddhe kiḍikiḍiyābhūe kise dhamanisaṃtae jāe| taṃ atthi tā me uṭṭhāṇe kamme bale vīrie purisakkāra-parakkame saddhā-dhii-saṃvege, taṃ jāvatā me atthi uṭṭhāṇe kamme bale vīrie purisakkāra-parakkame saddhā-dhii-saṃvege, jāva ya me dhammāyarie dhammovaesae samaṇe bhagavaṃ mahāvīre jine suhatthī viharai, tāvatā me seyaṃ kallaṃ pāuppabhāyāe rayaṇīe jāva uṭṭhiyammi sūre sahassarassimmi dinayare teyasā jalaṃte apacchimamāraṇaṃtiyasaṃlehaṇā-jjhūṇā-jjhūsiyassa bhattapāna-paḍiyā-ikkhiyassa, kālaṃ aṇavakaṃkha-māṇassa viharittae–evaṃ saṃpehei, saṃpehettā kallaṃ pāuppabhāyāe rayaṇīe jāva uṭṭhiyammi sūre sahassarassimmi dinayare teyasā jalaṃte apacchimamāraṇaṃtiyasaṃlehaṇā-jjhūsaṇā-jjhūsie bhattapāna-paḍiyāikkhie kālaṃ anavakaṃkhamāṇe viharai|
tae ṇaṃ se naṃdinīpiyā samaṇovāsae bahūhiṃ sīla-vvaya-guṇa-veramaṇa-paccakkhāṇa-posaho-vavāsehiṃ appāṇaṃ bhāvettā, vīsaṃ vāsāiṃ samaṇovāsagapariyāyaṃ pāuṇittā, ekkārasa ya uvāsaga-paḍimāo sammaṃ kāeṇaṃ phāsittā, māsiyāe saṃlehaṇāe attāṇaṃ jjhūsittā, saṭṭhiṃ bhattāiṃ anasaṇāe chedettā, āloiya-paḍikkaṃte samāhipatte kālamāse kālaṃ kiccā sohamme kappe aruṇagave vimāne devattāe uvavanne| tattha ṇaṃ atthegaiyāṇaṃ devāṇaṃ cattāri paliovamāiṃ ṭhiī pannattā| naṃdinīpiyassa vi devassa cattāri paliovamāiṃ ṭhiī pannattā|
se ṇaṃ bhaṃte! naṃdiṇīpiyā tāo devalogāo āukkhaeṇaṃ bhavakkhaeṇaṃ ṭhiikkhaeṇaṃ anaṃtaraṃ cayaṃ caittā kahiṃ gamihii? kahiṃ uvavajjihii?
goyamā! mahāvidehe vāse sijjhihii bujjhihii muccihii savvadukkhāṇamaṃtaṃ kāhii|
evaṃ khalu jaṃbū! samaṇeṇaṃ bhagavayā mahāvīreṇaṃ uvāsagadasāṇaṃ navamassa ajjhayaṇassa ayamaṭṭhe pannatte|