Mahanisiha 2.1: Uddeśaka 1
Mahānisīha 2.1
- Language
- Ardhamāgadhī Prakrit
Uddeśaka 1
2.1.226
nimmūluddhiya-salleṇaṃ savva-bhāveṇa goyamā
jhāṇe pavisittu sammeyaṃ paccakkhaṃ pāsiyavvayaṃ||
2.1.227
je saṇṇī je vi yā'saṇṇī bhavvābhavvā u je jage|
suhatthī-tiriyamuḍḍhā'haṃ ihamihāḍaṃti dasa-disiṃ||
2.1.228
asaṇṇī duvihe nee viyaliṃdī egiṃdie|
viyale kimi-kuṃthu-macchādī, puḍhavādī-egiṃdie||
2.1.229
pasu-pakkhī-migā-sannī neraiyā manuyāmarā|
bhavvābhavvā vi atthesuṃ nīrae ubhaya-vajjie||
2.1.230
ghammattā jaṃti chāyāe viyaliṃdī-sisirāyavaṃ|
hohī sokkhaṃ kilamhāṇaṃ tā dukkhaṃ tattha vī bhave||
2.1.231
sukumālaṃgattāo khaṇa-dāhaṃ, sisiraṃ khaṇaṃ|
na imaṃ na imaṃ ahiyāseuṃ sakkīnnaṃ evamādiyaṃ||
2.1.232
mehuṇa-saṃkappa-rāgāo mohā annāṇa-dosao|
puḍhavādisu gaegiṃdī na yāṇaṃtī dukkhaṃ suhaṃ||
2.1.233
parivattaṃte anaṃte vi kāle beiṃdiyattaṇaṃ|
keī jīvā na pāveṃti, kei puṇā'nādi pāviyaṃ||
2.1.234
sī-uṇha-vāya-vijjhaḍiyā miya-pasu-pakkhī-sirīsivā|
simiṇaṃte vi na labhaṃte te nimisaddhabbhaṃtaraṃ suhaṃ||
2.1.235
khara-pharusa-tikkha-karavattāiehi phālijjatā khaṇa khaṇa|
nivasaṃti nārayā narae, tesiṃ sokkhaṃ kuo bhave||
2.1.236
suraloe amarayā sarisā, savvesiṃ tatthimaṃ duhaṃ|
uvaṭṭhie vāhaṇattāe ego, anno tatthamāruhe||
2.1.237
sama-tulle pāṇi-pādeṇaṃ hā hā me atta-veriṇā|
māyā-ḍaṃbheṇa dhi ddhi ddhi paritappe haṃ āyavaṃcio||
2.1.238
suhesī kisi-kammattaṃ sevā-vāṇijja-sippayaṃ|
kuvvaṃtā'hannisaṃ manuyā dhuppaṃte, esiṃ kuo suhaṃ||
2.1.239
para-gharasirīe diṭṭhāe ege ḍajjhaṃti bālise|
anne apahuppamāṇīe anne khīṇāe lacchie||
2.1.240
punnehiṃ vaḍḍhamāṇehiṃ jasa-kittī-lacchī ya vaḍḍhai|
punnehiṃ hāyamāṇehiṃ jasa-kittī-lacchī ya khīyai||
2.1.241
vāsa-sāhassiyaṃ keī mannaṃte egaṃ dinaṃ puṇo|
kālaṃ gameṃti dukkhehiṃ manuyā punnehiṃ ujjhiyā||
2.1.242
saṃkhevatthamimaṃ bhaṇiyaṃ savvesiṃ jaga-jaṃtuṇaṃ|
dukkhaṃ mānusa-jāīṇaṃ goyama jaṃ taṃ nibodhaya||
2.1.243
jamanusamayamanubhavaṃtāṇaṃ sayahā uvveviyāṇa vi|
nivviṇṇāṇaṃ pi dukkhehiṃ veraggaṃ na tahā vī bhave||
2.1.244
duvihaṃ samāsao muṇasu dukkhaṃ sārīra-mānasaṃ|
ghora-pacaṃḍa-mahāroddaṃ tivihaṃ ekkekkaṃ bhave||
2.1.245
ghoraṃ jāṇa muhuttaṃtaṃ, ghora-payaṃḍaṃ ti samaya-vīsāmaṃ|
ghora-payaṃḍa-mahāroddaṃ nusamaya-vissāmagaṃ muṇe||
2.1.246
ghoraṃ-manussa-jāīṇaṃ ghora-payaṃḍaṃ muṇe tiricchāsuṃ|
ghora-payaṃḍamahāroddaṃ nāraya-jīvāṇa goyamā||
2.1.247
mānussaṃ tivihaṃ jāṇe jahanna-majjhuttamaṃ duhaṃ|
natthi jahannaṃ tiricchāṇaṃ, duha-mukkosaṃ tu nārayaṃ||
2.1.248
jaṃ taṃ jahannagaṃ dukkhaṃ mānussaṃ taṃ duhā muṇe|
suhuma-bādara-bhedeṇaṃ nivvibhāge itare duve||
2.1.249
sammucchimesu manuesuṃ suhumaṃ devesu bāyaraṃ|
cavaṇayāle mahiḍḍhiṇaṃ, ājammamābhiogiyāṇa u||
2.1.250
sārīraṃ natthi devāṇaṃ, dukkheṇaṃ mānasena u|
aibaliyaṃ vajjimaṃ hiyayaṃ saya-khaṃḍaṃ jaṃ na vī phuḍe||
2.1.251
nivvibhāge ya je bhaṇie donni majjhuttame duhe|
manuyāṇaṃ te samakkhāe gabbhavakkaṃtiyāṇa u||
2.1.252
asaṃkheyāū manuyāṇaṃ dukkhaṃ jāṇe vi majjhimaṃ|
saṃkheyāu manussāṇaṃ tu dukkhaṃ cevukkosagaṃ||
2.1.253
asokkhaṃ veyaṇā bāhā pīḍā dukkhamaṇevvuī|
aṇarāgamaraī kesaṃ evamādī egaṭṭhiyā bahū||
Translations (2)
- Mahānisīha: Gujarati translation (Dīparatnasāgara, 2020) — Gujarati
- Mahānisīha: Hindi translation (Dīparatnasāgara, 2019) — Hindi
Commentaries (1)
- Mahānisīha: ṭīkānusārī vivecana — Muni Dīparatnasāgara 2000, Gujarati