Uttarajjhayana p330

p330

mahāṇasio | te dhāyā, suduyaraṃ āuṭṭā | tāhe sayamāhārei | tāhe puṇaravi paṭṭiyā | tesiṃ ca sevālabhakkhagāṇaṃ jemaṃtāṇaṃ caiva jāo suhapariṇāmo, ciṃtiḍaṃ ca pavattā - aho ! amha kusalakammodao jaṃ jāo aṇabhavuṭṭhisariso samatthasuyamahoyahiṇā aṇurattaguṇanihiṇā siddhipurisatthavāheṇa goyamasāmiṇā saddhiṃ samāgamo, saṃpattā sayaṃbhuramaṇapaḍiyarayaṇaṃ va sudulahā saṃsārasāyaruttaraṇī jiṇadhammabohī, patto tihuyaṇaciṃtāmaṇī sayalajayajīvavacchalo bhayavaṃ mahāvīrasāmī, to ṇitthino amhehiṃ jamma-jarā-maraṇa-roya-soyajalakallolamālio bhavajalahī | evamāisaṃvegabhāvaṇovagayāṇa apuvakaraṇāikameṇa addhabhutte ceva tesiṃ uppannaṃ kevalaṇāṇaṃ | dinnassa vagge bhagavao samīve pattassa chattāichattaṃ pecchamāṇassa puvavanniyasuhapariṇāmeṇaṃ uvavannaṃ kevalaṃ | koḍinnassa vagge sāmiṃ daddūṇa uppannaṃ | goyamasāmī purao pakaḍḍhamāṇo sāmi payāhiṇīkarei | te vi kevaliparisaṃ pahāviyā | goyamasāmī bhaṇai - eha sāmi vaṃdaha | sāmī bhaṇai – goyamā ! mā kevalī āsāehiṃ | goyamasāmī āuṭṭo micchādukkaḍaṃ karei | tao goyamasāmissa suṭṭayaraṃ addhiī jāyā tāhe sāmī goyamaṃ bhaṇai – devāṇaṃ vayaṇaṃ gijjhaṃ ? uāhu jiṇāṇaṃ ? | goyamo bhaṇai — jiṇavarāṇaṃ | to kīsa addhi karesi ? | tāhe sāmī cattāri kaḍe pannavei, taṃjahā - suṃbakaḍe, vidalakaḍe, cammakaḍe, kaṃbalakaḍe | tā tumaṃ goyamā ! mamovariṃ | kaṃbalakaḍasamāṇasiṇehāṇurāgo, jao – cirasaṃsiḍosi me goyamā !, ciraparicio si me goyamā !, rāgo puṇa pasatthesu vi ahakkhāyacārittalābhaṃ paḍihaṇai, na ya ahakkhāyamaṃtareṇa kevalamuppajjai, kevalaṃ sarāgasaṃjamāṇaṃ sāhūṇaṃ pattharāgo apasattharāganivāragatteṇa vīyarāgaddeuttaṇeṇa ya aṇumao | jao - "arahaṃtesu ya rāgo, rāgo sāhūsu baṃbhayārīsu | esa pasattho rāgo, ajja ! sarāgāṇa sāhūṇaṃ || 1 ||” to mā visāyaṃ gacchasu, aireṇa ceva tuha khīṇa| rāgassa uppajjissai kevalaṃ, do vi ya aṃte tullā bhavissāmo | tāhe sāmī dumapattayaṃ nāmamajjhayaṇaṃ pannavei—
gautamasvāmi