Pannavana 1.77

1.77

je yāvanne tahappagārā| se ttaṃ hariyā|
se kiṃ taṃ osahīo? osahīo anegavihāo pannattāo, taṃ jahā–
sālī vīhī godhūma-javā, javajavā kala-masūra-tila-muggā |
māsa-nipphāva-kulattha ālisaṃda-satīṇa-palimaṃthā ||
ayasī-kusuṃbha-koddava kaṃgū rālaga-varasāmaga-kodūsā |
saṇa-sarisava-mūlaga-bīya-je yāvannā tahappagārā ||
se ttaṃ osahīo|
se kiṃ taṃ jalaruhā? jalaruhā anegavihā pannattā, taṃ jahā–udae avae paṇae sevāle kalaṃbuyā haḍhe kaseruyā kacchā bhāṇī uppale paume kumude naline subhae sugaṃdhie poṃḍarīe mahāpoṃḍarīe sayapatte sahassapatte kalhāre kokanade araviṃde tāmarase bhise bhisamuṇāle pokkhale pokkhalatthibhae|
je yāvanne tahappagārā| se ttaṃ jalaruhā|
se kiṃ taṃ kuhaṇā? kuhaṇā anegavihā pannattā, taṃ jahā–āe kāe kuhaṇe kuṇakke davvahaliyā sapphāe sajjāe chattāe vaṃsī nahiyā kurae|
je yāvanne tahappagārā| se ttaṃ kuhaṇā|