Pramāṇa · Search · About · API

Pannavana 15.2: Uddeśaka 2

Pannavaṇā 15.2

Language
Ardhamāgadhī Prakrit

Uddeśaka 2

15.2.433

1 iṃdiya-uvacaya 2 nivvattaṇā ya 3 samayā bhave asaṃkhejjā |
4 laddhī 5 uvaogaddhā, 6 appābahue visesāhiyā ||

15.2.434

7 ogāhaṇā 8 avāe 9 īhā taha 10 vaṃjaṇoggahe ceva |
11 davviṃdiya 12 bhāviṃdiya, tīyā baddhā purekkhaḍiyā ||

15.2.435

kativihe ṇaṃ bhaṃte! iṃdiovacae pannatte? goyamā! paṃcavihe iṃdiovacae pannatte, taṃ jahā–soiṃdiovacae cakkhiṃdiovacae ghāṇiṃdiovacae jibbhiṃdiovacae phāsiṃdiovacae|
neraiyāṇaṃ bhaṃte! kativihe iṃdiovacae pannatte? goyamā! paṃcavihe iṃdiovacae pannatte, taṃ jahā–soiṃdiovacae jāva phāsiṃdiovacae| evaṃ jāva vemāniyāṇaṃ| jassa jai iṃdiyā tassa taiviho ceva iṃdiovacayo bhāṇiyavvo|
kativihā ṇaṃ bhaṃte! iṃdiyanivvattaṇā pannattā? goyamā! paṃcavihā iṃdiyanivvattaṇā pannattā, taṃ jahā–soiṃdiyani-vvattaṇā jāva phāsiṃdiyanivvattaṇā| evaṃ neraiyāṇaṃ jāva vemāniyāṇaṃ, navaraṃ–jassa jatiṃdiyā atthi|
soiṃdiyanivvattaṇā ṇaṃ bhaṃte! katisamaiyā pannattā? goyamā! asaṃkhijjasamaiyā aṃtomuhuttiyā pannattā| evaṃ jāva phāsiṃdiyanivvattaṇā| evaṃ neraiyāṇaṃ jāva vemāniyāṇaṃ|
kativihā ṇaṃ bhaṃte! iṃdiyaladdhī pannattā? goyamā! paṃcavihā iṃdiyaladdhī pannattā, taṃ jahā–soiṃdiyaladdhī jāva phāsiṃdiyaladdhī| evaṃ neraiyāṇaṃ jāva vemāniyāṇaṃ, navaraṃ–jassa jati iṃdiyā atthi tassa tāvatiyā laddhī bhāṇiyavvā|
kativihā ṇaṃ bhaṃte! iṃdiyauvaogaddhā pannattā? goyamā! paṃcavihā iṃdiyauvaogaddhā pannattā, taṃ jahā–soiṃdiya-uvaogaddhā jāva phāsiṃdiyauvaogaddhā| evaṃ neraiyāṇaṃ jāva vemāniyāṇaṃ, navaraṃ–jassa jati iṃdiyā atthi|
etesi ṇaṃ bhaṃte! soiṃdiya cakkhiṃdiya ghāṇiṃdiya jibbhiṃdiya phāsiṃdiyāṇaṃ jahanniyāe uvaogaddhāe ukkosiyāe uvaogaddhāe jahannukkosiyāe uvaogaddhāe katare katarehiṃto appā vā bahuyā vā tullā vā visesāhiyā vā? goyamā! savvatthovā cakkhiṃdiyassa jahanniyā uvaogaddhā, soiṃdiyassa jahanniyā visesāhiyā, ghāṇiṃdiyassa jahanniyā uvaogaddhā visesāhiyā, jibbhiṃ-diyassa jahanniyā uvaogaddhā visesāhiyā, phāseṃdiyassa jahanniyā uvaogaddhā visesāhiyā|
ukkosiyāe uvaogaddhāe savvatthovā cakkhiṃdiyassa ukkosiyā uvaogaddhā, soiṃdiyassa ukkosiyā uvaogaddhā visesāhiyā, ghāṇiṃdiyassa ukkosiyā uvaogaddhā visesāhiyā, jibbhiṃdiyassa ukkosiyā uvaogaddhā visesāhiyā, phāseṃdiyassa ukkosiyā uva-ogaddhā visesāhiyā|
jahannukkosiyāe uvaogaddhāe savvatthovā cakkhiṃdiyassa jahanniyā uvaogaddhā, soiṃdi-yassa jahanniyā uvaogaddhā visesāhiyā, ghāṇiṃdiyassa jahanniyā uvaogaddhā visesāhiyā, jibbhiṃ-diyassa jahanniyā uvaogaddhā visesāhiyā, phāseṃdiyassa jahanniyā uvaogaddhā visesāhiyā| phāseṃdiyassa jahanniyāhiṃto uvaogaddhāhiṃto cakkhiṃdiyassa ukkosiyā ugaovaddhā visesāhiyā, soiṃdiyassa ukkosiyā uvaogaddhā visesāhiyā, ghāṇiṃdiyassa ukkosiyā uvaogaddhā visesā-hiyā, jibbhiṃdiyassa ukkosiyā uvaogaddhā visesāhiyā, phāseṃdiyassa ukkosiyā uvaogaddhā visesāhiyā|
kativihā ṇaṃ bhaṃte! iṃdiyaogāhaṇā pannattā? goyamā! paṃcavihā iṃdiyaogāhaṇā pannattā, taṃ jahā–soiṃdiya-ogāhaṇā jāva phāseṃdiyaogāhaṇā| evaṃ neraiyāṇaṃ jāva vemāniyāṇaṃ, navaraṃ–jassa jai iṃdiyā atthi|

15.2.436

kativihe ṇaṃ bhaṃte! iṃdiyaavāe pannatte? goyamā! paṃcavihe iṃdiyaavāe pannatte, taṃ jahā–soiṃdiyaavāe jāva phāseṃdiyaavāe| evaṃ neraiyāṇaṃ jāva vemāniyāṇaṃ, navaraṃ–jassa jattiyā iṃdiyā atthi|
kativihā ṇaṃ bhaṃte! īhā pannattā? goyamā! paṃcavihā īhā pannattā, taṃ jahā–soiṃdiyaīhā jāva phāseṃdiyaīhā| evaṃ jāva vemāniyāṇaṃ, navaraṃ–jassa jati iṃdiyā|
kativihe ṇaṃ bhaṃte! uggahe pannatte? goyamā! duvihe uggahe pannatte, taṃ jahā–atthoggahe ya vaṃjaṇoggahe ya|
vaṃjaṇoggahe ṇaṃ bhaṃte! kativihe pannatte? goyamā! cauvvihe pannatte, taṃ jahā–soiṃdiyavaṃjaṇoggahe ghāṇiṃdiyavaṃjaṇoggahe jibbhiṃdiyavaṃjaṇoggahe phāsiṃdiyavaṃjaṇoggahe|
atthoggahe ṇaṃ bhaṃte! kativihe pannatte? goyamā! chavvihe pannatte, taṃ0 jahā– soiṃdiyaatthoggahe cakkhiṃdiyaatthoggahe ghāṇiṃdiyaatthoggahe jibbhiṃdiyaatthoggahe phāsiṃdiyaatthoggahe noiṃdiya-atthoggahe|
neraiyāṇaṃ bhaṃte! kativihe uggahe pannatte? goyamā! duvihe uggahe pannatte, taṃ jahā–atthoggahe jāva vaṃjaṇoggahe ya| evaṃ asurakumārāṇaṃ jāva thaṇiyakumārāṇaṃ|
puḍhavikāiyāṇaṃ bhaṃte! kativihe uggahe pannatte? goyamā! duvihe uggahe pannatte, taṃ jahā–atthoggahe ya vaṃjaṇoggahe ya|
puḍhavikāiyāṇaṃ bhaṃte! vaṃjaṇoggahe kativihe pannatte? goyamā! ege phāsiṃdiyavaṃjaṇoggahe pannatte|
puḍhavikāiyāṇaṃ bhaṃte! kativihe atthoggahe pannatte? goyamā! ege phāsiṃdiyaatthoggahe pannatte| evaṃ jāva vaṇapphaikāiyāṇaṃ|
evaṃ beiṃdiyāṇa vi, navaraṃ–beiṃdiyāṇaṃ vaṃjaṇoggahe duvihe pannatte, atthoggahe duvihe pannatte| evaṃ teiṃdiya-cauriṃdiyāṇa vi, navaraṃ–iṃdiyaparivuḍḍhī kāyavvā| cauriṃdiyāṇaṃ vaṃjaṇoggahe tivihe pannatte, atthoggahe cauvvihe pannatte| sesāṇaṃ jahā neraiyāṇaṃ jāva vemāniyāṇaṃ|

15.2.437

kativihā ṇaṃ bhaṃte! iṃdiyā pannattā? goyamā! duvihā pannattā, taṃ jahā–davviṃdiyā ya bhāviṃdiyā ya|
kati ṇaṃ bhaṃte! davviṃdiyā pannattā? goyamā! aṭṭha davviṃdiyā pannattā, taṃ jahā–do sottā do nettā do ghāṇā jīhā phāse|
neraiyāṇaṃ bhaṃte! kati davviṃdiyā pannattā? goyamā! aṭṭha, ete ceva| evaṃ asurakumārāṇaṃ jāva thaṇiyakumārāṇa vi|
puḍhavikāiyāṇaṃ bhaṃte! kati davviṃdiyā pannattā? goyamā! ege phāseṃdie pannatte| evaṃ jāva vaṇassatikāiyāṇaṃ|
beiṃdiyāṇaṃ bhaṃte! kati davviṃdiyā pannattā? goyamā! do davviṃdiyā pannattā, taṃ jahā–phāsiṃdie ya jibbhiṃdie ya
teiṃdiyāṇaṃ pucchā| goyamā! cattāri davviṃdiyā pannattā, taṃ jahā–do ghāṇā jīhā phāse|
cauriṃdiyāṇaṃ pucchā| goyamā! cha davviṃdiyā pannattā, taṃ jahā–do ṇettā do ghāṇā jīhā phāse| sesāṇaṃ jahā neraiyāṇaṃ jāva vemāniyāṇaṃ|
egamegassa ṇaṃ bhaṃte! neraiyassa kevatiyā davviṃdiyā atītā? goyamā! anaṃtā| kevatiyā baddhellagā? goyamā! aṭṭha| kevatiyā purekkhaḍā? goyamā! aṭṭha vā solassa vā sattarasa vā saṃkhejjā vā asaṃkhejjā vā anaṃtā vā|
egamegassa ṇaṃ bhaṃte! asurakumārassa kevatiyā davviṃdiyā atītā? goyamā! anaṃtā| kevatiyā baddhellagā? goyamā! aṭṭha| kevatiyā purekkhaḍā? goyamā! aṭṭha vā ṇava vā saṃkhejjā vā asaṃkhejjā vā anaṃtā vā| evaṃ jāva thaṇiyakumārāṇaṃ tāva bhāṇiyavvaṃ|
evaṃ puḍhavikkāiya āukkāiya vaṇassaikāiyassa vi, navaraṃ–kevatiyā baddhellagā? tti pucchae uttaraṃ ekkaṃ phāsiṃdiyaṃ pannattaṃ| evaṃ teukkāiya-vāukkāiyassa vi, navaraṃ–purekkhaḍā nava vā dasa vā|
evaṃ beiṃdiyāṇa vi, navaraṃ–baddhelagapucchāe donni| evaṃ teiṃdiyassa vi, navaraṃ–baddhellagā cattāri| evaṃ cauriṃdiyassa vi, navaraṃ baddhellagā cha|
paṃceṃdiyatirikkhajoṇiya manūsa vāṇamaṃtara joisiya sohammīsāṇagadevassa jahā asura-kumārassa, navaraṃ–manūsassa purekkhaḍā kassai atthi kassai natthi| jassatthi aṭṭha vā nava vā saṃkhejjā vā asaṃkhejjā vā anaṃtā vā|
saṇaṃkumāra māhiṃda baṃbha laṃtaga sukka sahassāra āṇaya pāṇaya āraṇa accuya gevejjagadevassa ya jahā neraiyassa|
egamegassa ṇaṃ bhaṃte! vijaya vejayaṃta jayaṃta aparājiyadevassa kevatiyā davviṃdiyā atītā? goyamā! anaṃtā| kevatiyā baddhellagā? goyamā! aṭṭha| kevatiyā purekkhaḍā? goyamā! aṭṭha vā solasa vā cauvīsā vā saṃkhejjā vā|
savvaṭṭhasiddhagadevassa atītā anaṃtā, baddhellagā aṭṭha, purekkhaḍā aṭṭha|
neraiyāṇaṃ bhaṃte! kevatiyā davviṃdiyā atītā? goyamā! anaṃtā| baddhellagā? goyamā! asaṃkhejjā| kevatiyā purekkhaḍā? goyamā! anaṃtā| evaṃ jāva gevejjagadevāṇaṃ navaraṃ–manūsāṇaṃ baddhellagā siya saṃkhejjā siya asaṃkhejjā|
vijaya vejayaṃta jayaṃta aparājiyadevāṇaṃ pucchā| goyamā! atītā anaṃtā, baddhellagā asaṃkhejjā, purekkhaḍā asaṃkhejjā|
savvaṭṭhasiddhagadevāṇaṃ pucchā| goyamā! atītā anaṃtā, baddhellagā saṃkhejjā, purekkhaḍā saṃkhejjā|
egamegassa ṇaṃ bhaṃte! neraiyassa neraiatte kevatiyā davviṃdiyā atītā? goyamā! anaṃtā| kevatiyā baddhellayā? goyamā! aṭṭha| kevatiyā purekkhaḍā? goyamā! kassai atthi kassai natthi, jassatthi aṭṭha vā solasa vā cauvīsā vā saṃkhejjā vā asaṃkhejjā vā anaṃtā vā|
egamegassa ṇaṃ bhaṃte! neraiyassa asurakumāratte kevatiyā davviṃdiyā atītā? goyamā! anaṃtā| kevatiyā baddhellagā? goyamā! natthi| kevatiyā purekkhaḍā? goyamā! kassai atthi kassai natthi, jassatthi aṭṭha vā solasa vā cauvīsā vā saṃkhejjā vā asaṃkhejjā vā anaṃtā vā| evaṃ jāva thaṇiyakumāratte|
egamegassa ṇaṃ bhaṃte! neraiyassa puḍhavikāiyatte kevatiyā davviṃdiyā atītā? goyamā! anaṃtā| kevatiyā baddhellagā? goyamā! natthi| kevatiyā purekkhaḍā? goyamā! kassai atthi kassai natthi, jassatthi ekko vā do vā tinni vā saṃkhejjā vā asaṃkhejjā vā anaṃtā vā| evaṃ jāva vaṇapphaikāiyatte|
egamegassa ṇaṃ bhaṃte! neraiyassa beiṃdiyatte kevatiyā davviṃdiyā atītā? goyamā! anaṃtā| kevatiyā baddhellagā? goyamā! natthi| kevatiyā purekkhaḍā? goyamā! kassai atthi kassai natthi, jassatthi do vā cattāri vā cha vā saṃkhejjā vā asaṃkhejjā vā anaṃtā vā| evaṃ teiṃdiyatte vi, navaraṃ–purekkhaḍā cattāri vā aṭṭha vā bārasa vā saṃkhejjā vā asaṃkhejjā vā anaṃtā vā| evaṃ cauriṃdiyatte vi, navaraṃ–purekkhaḍā cha vā bārasa vā aṭṭhārasa vā saṃkhejjā vā asaṃkhejjā vā anaṃtā vā| paṃceṃdiyatirikkhajoṇiyatte jahā asurakumāratte|
manūsatte vi evaṃ ceva, navaraṃ–kevatiyā purekkhaḍā? goyamā! aṭṭha vā solasa vā cauvīsā vā saṃkhejjā vā asaṃkhejjā vā anaṃtā vā| savvesiṃ manūsavajjāṇaṃ purekkhaḍā manūsatte kassai atthi kassai natthi tti evaṃ na vuccati|
vāṇamaṃtara joisiya sohammaga jāva gevejjagadevatte atītā anaṃtā| baddhellagā natthi| purekkhaḍā kassai atthi kassai natthi| jassatthi aṭṭha vā solasa vā cauvīsā vā saṃkhejjā vā asaṃkhejjā vā anaṃtā vā|
egamegassa ṇaṃ bhaṃte! neraiyassa vijaya vejayaṃta jayaṃta aparājiyadevatte kevatiyā davviṃdiyā atītā? goyamā! natthi| kevatiyā baddhellagā? goyamā! natthi| kevatiyā purekkhaḍā? goyamā! kassai atthi kassai natthi, jassatthi aṭṭha vā solasa vā|
savvaṭṭhasiddhagadevatte atītā natthi| baddhellagā natthi| purekkhaḍā kassai atthi kassai natthi, jassatthi aṭṭha|
evaṃ jahā neraiyadaṃḍao ṇīo tahā asurakumāreṇa vi ṇeyavvo jāva paṃceṃdiyatirikkhajoṇieṇaṃ, navaraṃ–jassa saṭṭhāṇe jati baddhellagā tassa tai bhāṇiyavvā|
egamegassa ṇaṃ bhaṃte! manūsassa neraiyatte kevatiyā davveṃdiyā atītā? goyamā! anaṃtā| kevatiyā baddhellagā? goyamā! natthi| kevatiyā purekkhaḍā? goyamā! kassai atthi kassai natthi, jassatthi aṭṭha vā solasa vā cauvīsā vā saṃkhejjā vā asaṃkhejjā vā anaṃtā vā| evaṃ jāva paṃceṃdiyatirikkhajoṇiyatte, navaraṃ–egiṃdiya vigaliṃdiesu jassa jattiyā purekkhaḍā tassa tattiyā bhāṇiyavvā|
egamegassa ṇaṃ bhaṃte! manūsassa manūsatte kevatiyā davviṃdiyā atītā? goyamā! anaṃtā| kevatiyā baddhellagā? goyamā! aṭṭha| kevatiyā purekkhaḍā? kassai atthi kassai natthi, jassatthi aṭṭha vā solasa vā cauvīsā vā saṃkhejjā vā asaṃkhejjā vā anaṃtā vā| vāṇamaṃtara jotisiya jāva gevejjagadevatte jahā neraiyatte|
egamegassa ṇaṃ bhaṃte! manūsassa vijaya vejayaṃta jayaṃta aparājiyadevatte kevatiyā davviṃdiyā atītā? goyamā! kassai atthi kassai natthi, jassatthi aṭṭha vā solasa vā| kevatiyā baddhellagā? goyamā! natthi| kevatiyā purekkhaḍā? goyamā! kassai atthi kassai natthi, jassatthi aṭṭha vā solasa vā|
egamegassa ṇaṃ bhaṃte! manūsassa savvaṭṭhasiddhagadevatte kevatiyā davviṃdiyā atītā? goyamā! kassai atthi kassai natthi, jassatthi aṭṭha| kevatiyā baddhellagā? goyamā! natthi| kevatiyā purekkhaḍā? goyamā! kassai atthi kassai natthi, jassatthi aṭṭha|
vāṇamaṃtara-jotisie jahā neraie|
sohammagadeve vi jahā neraie, navaraṃ–sohammagadevassa vijaya vejayaṃta jayaṃta aparājiyadevatte kevatiyā davviṃdiyā atītā? goyamā! kassai atthi kassai natthi, jassatthi aṭṭha| kevatiyā baddhellagā? goyamā! natthi| kevatiyā purekkhaḍā? goyamā! kassai atthi kassai natthi, jassatthi aṭṭha vā solasa vā| savvaṭṭhasiddhagadevatte jahā neraiyassa| evaṃ jāva gevejjagadevassa savvaṭṭhasiddhagadevatte tāva neyavvaṃ|
egamegassa ṇaṃ bhaṃte! vijaya vejayaṃta jayaṃta aparājiyadevassa neraiyatte kevatiyā davviṃdiyā atītā? goyamā! anaṃtā| kevatiyā baddhellagā? goyamā! natthi| kevatiyā purekkhaḍā? goyamā! natthi| evaṃ jāva paṃceṃdiyatirikkhajoṇiyatte|
manūsatte atītā anaṃtā, baddhellagā natthi| purekkhaḍā aṭṭha vā solasa vā cauvīsā vā saṃkhejjā vā|
vāṇamaṃtara-jotisiyatte jahā neraitte|
sohammagadevatte atītā anaṃtā| baddhellagā natthi| purekkhaḍā kassai atthi kassai natthi, jassatthi aṭṭha vā solasa vā cauvīsā vā saṃkhejjā vā| evaṃ jāva gevejjagadevatte|
vijaya vejayaṃta jayaṃta aparājiyatte atītā kassai atthi kassai natthi, jassatthi aṭṭha| kevatiyā baddhellagā? goyamā! aṭṭha| kevatiyā purekkhaḍā? goyamā! kassai atthi kassai natthi, jassatthi aṭṭha|
egamegassa ṇaṃ bhaṃte! vijaya vejayaṃta jayaṃta aparājiyadevassa savvaṭṭhasiddhagadevatte kevatiyā davviṃdiyā atītā? goyamā! natthi kevatiyā baddhellagā? goyamā! natthi| kevatiyā purekkhaḍā? goyamā! kassai atthi kassai natthi, jassatthi aṭṭha|
egamegassa ṇaṃ bhaṃte! savvaṭṭhasiddhagadevassa neraiyatte kevatiyā davviṃdiyā atītā? goyamā! anaṃtā| kevatiyā baddhellagā? goyamā! natthi| kevatiyā purekkhaḍā? goyamā! natthi| evaṃ manūsavajjaṃ jāva gevejjagadevatte, navaraṃ–manūsatte atītā anaṃtā| kevatiyā baddhellagā? goyamā! natthi| kevatiyā purekkhaḍā? goyamā! aṭṭha|
vijaya vejayaṃta jayaṃta aparājiyadevatte atītā kassai atthi kassai natthi, jassatthi aṭṭha| kevatiyā baddhellagā? goyamā! natthi| kevatiyā purekkhaḍā? goyamā! natthi|
egamegassa ṇaṃ bhaṃte! savvaṭṭhasiddhagadevassa savvaṭṭhasiddhagadevatte kevatiyā davviṃdiyā atītā? goyamā! natthi| kevatiyā baddhellagā? goyamā! aṭṭha| kevatiyā purekkhaḍā? goyamā! natthi|
neraiyāṇaṃ bhaṃte! neraiyatte kevatiyā davviṃdiyā atītā? goyamā! anaṃtā| kevatiyā baddhellagā? goyamā! asaṃkhejjā| kevatiyā purekkhaḍā? goyamā! anaṃtā|
neraiyāṇaṃ bhaṃte! asurakumāratte kevatiyā davviṃdiyā atītā? goyamā! anaṃtā| kevatiyā baddhellagā? goyamā! natthi| kevatiyā purekkhaḍā? goyamā! anaṃtā| evaṃ jāva gevejjagadevatte|
neraiyāṇaṃ bhaṃte! vijaya vejayaṃta jayaṃta aparājiyadevatte kevatiyā davviṃdiyā atītā? natthi| kevatiyā baddhellagā? natthi| kevatiyā purekkhaḍā? asaṃkhejjā| evaṃ savvaṭṭhasiddhagadevatte vi|
evaṃ jāva paṃceṃdiyatirikkhajoṇiyāṇaṃ savvaṭṭhasiddhagadevatte bhāṇiyavvaṃ, navaraṃ–vaṇassaikāiyāṇaṃ vijaya vejayaṃta jayaṃta aparājiyadevatte savvaṭṭhasiddhagadevatte ya purekkhaḍā anaṃtā| savvesiṃ manūsa savvaṭṭhasiddhagavajjāṇaṃ saṭṭhāṇe baddhellagā asaṃkhejjā, paraṭṭhāṇe baddhellagā natthi| vaṇassaikāiyāṇaṃ saṭṭhāṇe baddhellagā anaṃtā|
manussāṇaṃ neraiyatte atītā anaṃtā| baddhellā natthi| purekkhaḍā anaṃtā| evaṃ jāva gevejjaga-devatte, navaraṃ–saṭṭhāṇe atītā anaṃtā, baddhellagā siya saṃkhejjā, siya asaṃkhejjā, purekkhaḍā anaṃtā|
manūsāṇaṃ bhaṃte! vijaya vejayaṃta jayaṃta aparājiyadevatte kevatiyā davviṃdiyā atītā? saṃkhejjā| kevatiyā baddhellagā? natthi| kevatiyā purekkhaḍā? siya saṃkhejjā siya asaṃkhejjā| evaṃ savvaṭṭhasiddhagadevatte vi|
vāṇamaṃtara-joisiyāṇaṃ jahā neraiyāṇaṃ|
sohammagadevāṇaṃ evaṃ ceva, navaraṃ–vijaya vejayaṃta jayaṃta aparājiyadevatte atītā asaṃkhejjā, baddhellagā natthi, pure-kkhaḍā asaṃkhejjā| savvaṭṭhasiddhagadevatte atītā natthi| baddhellagā natthi| purekkhaḍā asaṃkhejjā| evaṃ jāva gevejjagadevāṇaṃ|
vijaya vejayaṃta jayaṃta aparājiyadevāṇaṃ bhaṃte! neraiyatte kevatiyā davveṃdiyā atītā? goyamā! anaṃtā| kevatiyā baddhellagā? natthi| kevatiyā purekkhaḍā? natthi| evaṃ jāva joisiyatte, ṇavaramesiṃ manūsatte atītā anaṃtā| kevatiyā baddhellagā? natthi| purekkhaḍā asaṃkhejjā|
evaṃ jāva gevejjagadevatte| saṭṭhāṇe atītā asaṃkhejjā| kevatiyā baddhellagā? asaṃkhejjā| kevatiyā purekkhaḍā? asaṃkhejjā|
savvaṭṭhasiddhagadevatte atītā natthi| baddhellagā natthi purekkhaḍā asaṃkhejjā|
savvaṭṭhasiddhagadevāṇaṃ bhaṃte! neraiyatte kevatiyā davveṃdiyā atītā? goyamā! anaṃtā| kevatiyā baddhellagā? natthi| kevatiyā purekkhaḍā? natthi| evaṃ manūsavajjaṃ jāva gevejjagadevatte|
manūsatte atītā anaṃtā| baddhellagā natthi| purekkhaḍā saṃkhejjā|
vijaya vejayaṃta jayaṃta aparājiyadevatte kevatiyā davviṃdiyā atītā? saṃkhejjā| kevatiyā baddhellagā? natthi| kevatiyā purekkhaḍā? natthi|
savvaṭṭhasiddhagadevāṇaṃ bhaṃte! savvaṭṭhasiddhagadevatte kevatiyā davviṃdiyā atītā? natthi| kevatiyā baddhellagā? saṃkhejjā| kevatiyā purekkhaḍā? natthi|
kati ṇaṃ bhaṃte! bhāviṃdiyā pannattā? goyamā! paṃca bhāviṃdiyā pannattā, taṃ jahā–soiṃdie jāva phāsiṃdie|
neraiyāṇaṃ bhaṃte! kati bhāviṃdiyā pannattā? goyamā! paṃca bhāviṃdiyā pannattā, taṃ jahā–soiṃdie jāva phāseṃdie| evaṃ jassa jati iṃdiyā tassa tati bhāṇiyavvā jāva vemāniyāṇaṃ|
egamegassa ṇaṃ bhaṃte! neraiyassa kevatiyā bhāviṃdiyā atītā? goyamā! anaṃtā| kevatiyā baddhellagā? paṃca|ka kevatiyā purekkhaḍā? paṃca vā dasa vā ekkārasa vā saṃkhejjā vā asaṃkhejjā vā anaṃtā vā|
evaṃ asurakumārassa vi, navaraṃ–purekkhaḍā paṃca vā cha vā saṃkhejjā vā asaṃkhejjā vā anaṃtā vā| evaṃ jāva thaṇiyakumārassa|
evaṃ puḍhavikāiya āukāya vaṇassaikāiyassa vi, beiṃdiya teiṃdiya cauriṃdiyassa vi teukkāiya-vāukkāiyassa vi evaṃ ceva, navaraṃ–purekkhaḍā cha vā satta vā saṃkhejjā vā asaṃkhejjā vā anaṃtā vā|
paṃceṃdiyatirikkhajoṇiyassa jāva īsāṇassa jahā asurakumārassa, navaraṃ–manūsassa purekkhaḍā kassai atthi, kassai natthi tti bhāṇiyavvaṃ| saṇaṃkumāra jāva gevejjagassa jahā neraiyassa|
vijaya vejayaṃta jayaṃta aparājiyadevassa atītā anaṃtā| baddhellagā paṃca| purekkhaḍā paṃca vā dasa vā pannarasa vā saṃkhejjā vā| savvaṭṭhasiddhagadevassa atītā anaṃtā| baddhellagā paṃca| kevatiyā purekkhaḍā? paṃca|
neraiyāṇaṃ bhaṃte! kevatiyā bhāviṃdiyā atītā? goyamā! anaṃtā| kevatiyā baddhellagā? asaṃkhejjā| kevatiyā purekkhaḍā? anaṃtā| evaṃ jahā davviṃdiesu pohatteṇaṃ daṃḍao bhaṇio tahā bhāviṃdiesu vi pohatteṇaṃ daṃḍao bhāṇiyavvo, navaraṃ–vaṇapphaikāiyāṇaṃ baddhellagā vi anaṃtā|
egamegassa ṇaṃ bhaṃte! neraiyassa neraiyatte kevatiyā bhāviṃdiyā atītā? goyamā! anaṃtā| baddhellagā paṃca| purekkhaḍā kassai atthi, kassai natthi, jassatthi paṃca vā dasa vā pannarasa vā saṃkhe-jjā vā asaṃkhejjā vā anaṃtā vā| evaṃ asurakumāratte jāva thaṇiyakumāratte, navaraṃ–baddhellagā natthi|
puḍhavikkāiyatte jāva beiṃdiyatte jahā davviṃdiyā| teiṃdiyatte taheva, navaraṃ–purekkhaḍā tinni vā cha vā ṇava vā saṃkhejjā vā asaṃkhejjā vā anaṃtā vā| evaṃ cauriṃdiyatte vi navaraṃ–purekkhaḍā cattāri vā aṭṭha vā bārasa vā saṃkhejjā vā asaṃkhejjā vā anaṃtā vā|
evaṃ ete ceva gamā cattāri neyavvā je ceva davviṃdiesu| navaraṃ–taiyagame jāṇiyavvā jassa jai iṃdiyā te purekkhaḍesu muneyavvā| cautthagame jaheva davveṃdiyā jāva savvaṭṭhasiddhagadevāṇaṃ savvaṭṭhasiddhagadevatte kevatiyā phāsiṃdiyā atītā? natthi| baddhellagā saṃkhejjā| purekkhaḍā natthi|

Translations (2)

Commentaries (2)