Karnamritaprapa (Bhatta Someshvara) 2

Karṇāmṛtaprapā (Bhaṭṭa Someśvara) 2

Language: Sanskrit

2.1

iti śrīṭhakkura-someśvaradeva-viracitā
karṇāmṛtaprapā Subhāṣitāvalī saṃpūrṇā
prānte pustakapratilipikartṛkapadyadvayam
navābhraśaracandraistu nirmite vatsare vare
caitramāsyasite pakṣe daśamyāṃ bhūminandane

2.2

ṣaṭpadmanāgareṇeyaṃ mahirājena dhīmatā
subhāṣitaprapā nāmnā likhitā rucirākṣaraiḥ

2.1-2

yādṛśaṃ pustake dṛṣṭaṃ tādṛśaṃ likhitaṃ mayā
yadi śuddhamaśuddhaṃ vā mama doṣo na dīyate
saṃvat 15 ( 1509 ? ) kalyāṇamastu || śrīḥ || maṅgalamastu
hṛdā yādaḥparityaktā nirvyālā malayadrumāḥ
amālinyakṛto dīpāḥ śrīpātraṃ santu sādhavaḥ

2.2-2

sādhūnāṃ lubdhatā kācidacintyaiva tathāhi ye
pareṣāmeva gṛhṇanti guṇān bhūriguṇā api

2.3

ramayanti na kaṃ nāma santaśchāyādrumā iva
puṣyanti sitapuṣpaṃ ye sūcitoccaiḥ phalodayam

2.4

amṛtairmānasaṃ manye sampūrṇaṃ satataṃ satām
syandeneva tadīyena vāco muñcanti nārdratām

2.5

aśrupravartakairdhūmairiva kiṃ tairasadhubhiḥ
rasavatyāṃ kaveruktau mālinyaṃ janayanti ye

2.6

vṛścikānāṃ bhujaṅgānāṃ durjanānāṃ ca vedhasā
vibhajya niyataṃ nyastaṃ viṣaṃ pucche mukhe hṛdi

2.7

asmin kalau khalotsṛṣṭaduṣṭavāgbāṇadāruṇe
kathaṃ jīvejjaganna syuḥ sannāhāḥ sajjanā yadi

2.8

nidānaṃ nātra paśyāmi yadupelyāpi durjanāḥ
ākrośanti bhṛśaṃ sādhūnadhvagāniva kurkurāḥ

2.9

doṣajñaistena rājñeva saha sādhanarā sabhā
tyājyā'vakarabhūmīva sahasā ghanarāsabhā

2.10

durjanaistarjyamānasya sādhoradhikamedhate
bhasmabhirmṛjyamānasya mukurasyeva cārutā

2.11

āstāṃ tāvat kṛtakrodhaḥ, sapramodo'pi durjanaḥ
kaṣṭāya jāyate dṛṣṭo ratavāniva vāyasaḥ

2.12

durjanānāṃ dvijihvatvakhyātireṣā mṛṣaiva yat
viśvopatāpināṃ teṣāmucitā saptajihvatā

2.13

asminnasamayāraṇye khalavetālasaṃkule
carataḥ sajjanālāpāḥ śikhābandhī bhavantu me

2.14

so'sti kaścana yo dṛṣṭo'pyaśuddhānāṃ viśuddhaye
te'pi tiṣṭhanti ye dṛṣṭāḥ śuddhānāmapyaśuddhaye

Linked texts (2)

Karṇāmṛtaprapā (Someśvaradeva) — Someśvaradeva, Sanskrit
Kīrtikaumudī — Someśvaradeva, Sanskrit