Pramāṇa · Search · About · API

Gita Govinda 10.8.6

Śrutirañjanī 10.8.6

Language
Sanskrit

10.8.6

dhyāyati nirantaracittasaṃsthatvāt tvāmeva dhyāyati, udbhramati dṛggocarajanaṃ bhavantamiti kṛtvā bhrānti gacchati | prakṛṣṭena mīlati tvaddhyānena netronmīlanaṃ karotītyarthaḥ | patati me'nyo nāstīti buddhyā bhūtale patatītyarthaḥ | kiñca unmādya unmādāvasthāṃ prāpya mūrcchati, api ca visaṃjñā bhavati | īdṛgavasthāmupagamya mūrcchāmājagāma ityapiśabdārthaḥ | etādṛśi pūrvoktaguṇasampanne atanujvare na vidyate tanuryasya so'naṅgaḥ tasya jvaraḥ, tasmin virahajvara ityarthaḥ | atanuścāsau jvaraśceti karmadhārayasamāsena adhikajvara iti ca gamyate tasmin viṣaye, varatanuḥ, rasaiḥ śṛṅgārādirasaiḥ tvaṃ prasīdasi cet jīvet | anyathā tyaktā yadi anāyakā gatyantarābhāvā satī kathaṃ jīvet | na jīvatītyarthaḥ | yathā loke etādṛśādhikajvare vidyamānajanaḥ rasaṃ auṣadhaviśeṣaṃ vinā na jīvati tadvadiyamapi bhavatkaṭākṣavīkṣaṇarasaṃ vinā na jīvatītyarthaḥ | svarvaidyapratima ityetadviśeṣaṇaṃ jaganmohanākārarūpadyotanārtham | athavā svarvaidyāḥ amṛtarūpauṣadhena jīvayituṃ samarthāḥ | tadvadasyāpi tatsāmarthyaṃ vartata ityarthaḥ | vṛttaṃ tu śārdūlavikrīḍitam | 'sūryāśvairmasajāḥ statāssaguravaśśārdūlavikrīḍitam' 1 iti lakṣaṇāt || tasyā eva ceṣṭāntaraṃ darśayati kandarpeti ||

Linked texts (1)