Pramāṇa · Search · About · API

Gita Govinda 8.8.12

Śrutirañjanī 8.8.12

Language
Sanskrit

8.8.12

kāmadevasya udyamaṃ mama vyathākaraṇodyamaṃ, kabarībhārasya kāmoddīpakatvena manmathodyamakāritvasya svābhāvikatvāditi bhāvaḥ | anyatra māro ghātukaḥ tasya udyamaṃ karotu tanutāt | loke'pi yastu malinacittaḥ kuṭilasvabhāvaśca sa tu mānyasya maraṇe mārake vā udyogaṃ karoti, kabarībhārasyāpi tādṛśaguṇasampannatvena svocitakāryakāritvāt nātrāpi mama kheda iti bhāvaḥ | he tanvi, ayaṃ ca paridṛśyamānaḥ rāgavān aruṇarūpavān anurāgavān ca, yastava bimbādharaḥ bimbakalpadaśanacchadaḥ | bimbādhara ityatra madhyamapadalopisamāsaḥ; anyasya tadvidhāyakatvābhāvāt | uktaṃ ca vāmanena — 'bimbādharādau vṛttau madhyamapadalopi syā' diti | mohaṃ tāvadajñānadīpāṅkurādityarthaḥ | tāvaditi vākyālaṅkāre; tanutāṃ vidhattām | loke'pi hi yastu buddhināśakaḥ rāgasahitaśca sa tu paraṃ mohayati | ayamapi tādṛgguṇayogitvena svānuguṇakāryakaraṇena asmākaṃ manaḥ kleśayatīti bhāvaḥ | atra bimbāyāḥ mohakāritvāt tatkalpatvenādharasyāpi mohakāritvamavagantavyam | bimbāyāḥ mohakāritvaṃ bāhaṭena kathitam--' sadyo buddhiharā bimbā sadyo buddhikarā vaśā | sadyaḥ prāṇaharā vṛndā sadyo balakaraṃ payaḥ ' iti | bimbaśabdasya phalaparatvenāstrīliṅgatā | 'bimbo'strī maṇḍale dehe cchāyāyāṃ bimbikāphale' ityabhidhānāt |

Linked texts (1)