The Birth of Kumāra 1.2

1.2

uktaṃ bhāvasādhvasam . tasya sukhamayatvaṃ ca varṇayati-
vyāhṛtā prativaco na saṃdadhe gantumaicchadavalambitāṃśukā .
sevate sma śayanaṃ parāṅmukhī sā tathāpi rataye pinākinaḥ .. 8.2 ..
anvayaḥ-- sā vyāhṛtā (satī) prativaco na sandadhe avalambitāṃ'śukā gantum aicchat, parāṅmukhī (satī) śayanaṃ sevate sma, tathā'pi pinākino rataye (babhūva) .
mallio- vyāhṛteti . sā pārvatī vyāhṛtā yatkiṃcidanihitā satī prativacaḥ pratyuttaraṃ na saṃdadhe . na dadāvityarthaḥ . avalambitāṃśukā gṛhītavastrā satī gantumapasarttumaicchadicchati sma . iṣadhātorlaṅ . `iṣugamiyamāṃ chaḥ' iti chakāraḥ . parāṅmukhī satī śayanaṃ sevate sma . anabhimukhamaśayiṣṭetyarthaḥ . tathāpi itthaṃ sādhvasātpratikūlaceṣṭitāpītyarthaḥ . pinākinaḥ śivasya rataye sukhāya . babhūveti śeṣaḥ prātikūlyamapi tasyānandakaramabhūdityarthaḥ . etena navoḍhāyā devyā maugdhyādvijitaṃ tanmamatvamavaseyam .. 8.2 ..