The Birth of Kumāra 1.85

1.85

sa vyabudhyata budhastavocitaḥ śātakumbhakamalākaraiḥ samam .
mūrcchanāparigṛhītakaiśikaiḥ kinnarairuṣasi gītamaṅgalaḥ .. 8.85 ..
anvayaḥ- budhastavocitaḥ sa uṣasi mūrcchanāparigṛhītakaiśikaiḥ kinnaraiḥ gītamaṅgalaḥ (san) śātakumbhakamalākaraiḥ samaṃ vyabudhyata .
mallio- sa iti . budhastavocito vidvatstotrārhaḥ sa hara uṣasi prabhāte . svarāṇāmārohakramo mūrcchanā . `kramayuktāḥ svarāstatra mūrcchanā parikīrtitā' iti bharataḥ . tayā mūrcchanayā parigṛhītakaiśikaiḥ svīkṛtarāgaviśeṣaiḥ kiṃnarairgītamaṅgalaḥ san . śātakumbhakamalākaraiḥ samaṃ kanakapadmākaraiḥ saha . `tapanīyaṃ śātakumbhaṃ gāṅgeyaṃ bharma kaburram' ityamaraḥ . vyabudhyata vibuddhavān . budhyaterdaivādikātkartari laṅ . atra budhyaterjāgaravikāsayorvodhayoḥ śleṣanimittakābhedādhyavasāyamūlā sahoktiralaṃkāraḥ .. 8.85 ..