Rasakrida 4: atha caturthaḥ paricchedaḥ | Chapter - 4
Rāsakrīḍā 4
- Language
- Sanskrit
Contents
- 4.64 — 1 part
atha caturthaḥ paricchedaḥ | Chapter - 4
4.1
vaṃśīnāḷīnādāmṛtadhārānandallokena ca
āvirbhūto rupeṇa sa govindo'sau modena ca
4.2
kṛpotphullaṃ netrāñcalakṛtāśleṣaṃ toṣādatha
mukundaṃ taṃ dṛṣṭvākhilavadhūlokenodaśvasi
4.3
ullalabdhammillāñcitamallikāmālāsaṃhati
vallavīvṛndaṃ tannijavallabhaṃ prāpyāvandata
4.4
jagade devenāpi ca jagadekālamve mayi
kupitāḥ kiṃ yūyaṃ bata kuhanākarmalimbini
4.5
dūrvāragarvāviṣkṛti durbodhanirvādhādiha
yuṣmākamantaḥ kiñcana mālinyamatrājāyata
4.6
tadetadāhartuṃ khalu tadā tirobhūto'smi hi
tathā na rādhājumbhata tato hyanaiṣaṃ tāmapi
4.7
sāpi ca dṛptā kiñcana saṃvaha kaṇṭhe māmiti
yadbata tatrāvocata tat punareṣāpyaujjyata
4.8
vigatadoṣāḥ samprati paśupayoṣāḥ! krīḍata
sukhamaśeṣaṃ vindata suciramevaṃ nandata
4.9
śrutvā tasya vāṇīmiti muktvā śokadainyāni ca
yuktāstena gopyo'pyanuraktāḥ kelimārapsata
4.10
nadanti kvacit kāścana vadanti kvacit kāścana
vasanti kvacit kāścana hasanti kvacit kāscana
4.11
gīyate kayācinmadhu pīyate kayācit khalu
tuṣyate kayācit bahu ruṣyate kayācit kila
4.12
tadidaṃ manomohanacaritaṃ hareḥ samprati
avalokituṃ cetasi kutukaṃ na kiṃ vo bata
4.13
ityādi tadā nāradavākyāni samākarṇya ca
satrāśanasaṅghā api tatrāyayurāśūpari
4.14
sacāraṇasiddhāapi sakinnarayakṣā api
satāpasasādhyā api samāyayurete divi
4.15
nāradamunīndraḥ sa ca parvatamunīndro'pi ca
tumburuvasiṣṭhau bhṛgukāśyapa pulastyā api
4.16
kalakalaguñjatpadakaṭakavibhūpā divi
suravarayoṣā api naṭanamathākurvata
4.17
vādaṃvādaṃ mudā mṛdu vādyaṃ mādyat tadā khalu
gāyaṃ gāyaṃ batākṛta nṛttaṃ nārīkulaṃ bahu
4.18
jaya śrīman ! janārdana! jagannātha! prasīda ca
iti stutvā hariṃ suratatirvyāptā tadopari
4.19
vāsudevo manohararāsalīlārato'jani
bhāsamāno milanmṛduhāsaśobhī vyarocata
4.20
pratigopi vyadṛśyata ratiśālī surairatha
atimāyo vaneṣu ca sa tu pūrṇoṃ vyalokyata
4.21
vṛkṣā latāstṛṇāni ca vṛndāvane mṛgā api
govardhanādayo–pi ca govindatāmadhuḥ kila
4.22
sakopayā kayācana salajjayā kayācana
samodayā kayācana sarodayā kayācana
4.23
āsitayā kayācana hāsitayā kayācana
svāpitayā kayācana gopitayā kayācana
4.24
saha vasannadṛśyata saha carannadṛśyata
saha hasannadṛśyata bahupriyaḥ sa tatra hi
4.25
nānākhelanalālitanārīsaṃhatinā khalu
prītenākhilacetananāthenālamaramyata
4.26
kucāliṅganacumbanakacāmardamukhāni ca
nakhālekhanamohanasukhālāpaśatāni ca
4.27
nīvīmocanasāhasabhāvitātirasāni ca
tāni tāni vinodanatāṇḍavāni sa cākṛta
4.28
muralīmṛduvādanataralīkṛtacetasi
taruṇījanasaṃsadi hariṇā samarājyata
4.29
kāmākulitamānasarāmājanamanohati
dāmodara idaṃ jagadāmodata tadā khalu
4.30
amandasukhasantati samagraśubhasaṅgati
samastavibhavāvali jagatrayamarājata
4.31
kinnaramunicāraṇapannagavibudhā atha
tuṣṭuvurakhilā api tuṣṭamatimamuṃ divi
4.32
jaya jaya janārdana ! jaya jaya jaganmaya!
jaya jaya janāśraya! jaya jaya hare! jaya
4.33
lokānāṃ nāthe bhavati lole līlāyāṃ bhavati
sarvo–yaṃ loko bhavati sānando gopībhavati
4.34
hayagrīvākhye dviṣati nigūḍhaṃ vedān harati
mahāmatsyo–bhūḥ sapadi mahātman! viṣṇo! tvamapi
4.35
mandaraṃ magnaṃ payasi māyayā dhartuṃ tvamasi
kāmaṭhaṃ rūpaṃ jhaṭiti bhejivān pūrve varada!
4.36
pṛthivīcoraṃ kamapi danujaṃ hantuṃ tadanu
pṛthuvārāhaṃ na kimu dhṛtavān rūpaṃ tvamayi !
4.37
daityo hiraṇyo jagati yo'bhūd durātmā tamatha
hantuṃ nṛsiṃhatvamapi hanta tvayādhāri kila
4.38
jagatrayaṃ sarvamapi padatrayeṇaiva khalu
hṛtaṃ tvayā māṇavakavapurbhṛtā māramaṇa!
4.39
bhārgavarāmastvamatha bhūmibhujāṃ vaṃśamapi
dhorakuṭhārārciṣi na kiṃ hutavānapratima !
4.40
tadanu sītāhṛdayakamalabhānustvamapi
daśamukhaṃ taṃ samiti nihatavān kiṃ na kila
4.41
tālāṅko'dhunā tvamasi nīlāṅkāmbaro jagati
hālāṃ kāminīrapi ca līlāṃ kārayan bhajasi
4.42
yaśodātmajastvamasi yaśobhājanaṃ kimapi
suśobhānidhe ! kamalaviśālākṣa ! he subhaga !
4.43
khaḍgapāṇinā turagapṛṣṭhavāsinā varad !
kalkinā tvayā jagati sambhaviṣyate sapadi
4.44
avatārajātamiha bhavatā kṛtaṃ hi kila
bhavatāpināṃ jagati bhavitā hitāya khalu
4.45
lokādhipate! vidhuralokādhihṛte bhavatu
nāthāya namo vimatamāthāya ca te sumukha !
4.46
iti stutacāruguṇanidhistridaśaiḥ sa khalu
vadhūnikareṇa saha madhordamitāramata
4.47
majjutarakelirasarañjitavadhūvitati
guñjadalinīsarasakuñjatalavāsarati
4.48
kalamṛduveṇuravapulakitasarvatanu
galaravadūrajitakalagalagītatati
4.49
rāsakrīḍāsukhamiti māsān ramyān katicana
gopījālaiḥ saha kila govindo'sāvatanuta
4.50
prabhātāyāmatha niśi śubhākāro harirapi
kadācit tā avadata mudā gopīriti kila
4.51
yāminīyaṃ viramati yāta yūyaṃ drutamiha
kāmitānāṃ śatamapi sādhitaṃ yat svayamapi
4.52
mihiro'sāvudayati sa hi kiñcit pratapati
timiraudhaṃ tirayati himabādhāṃ śamayati
4.53
ambhojinīṃ karacayasambhāvitāṃ mṛdu mṛdu
phullānanāṃ kalayati sallīlayā viṭa iva
4.54
sakuṅkumairiva nijakarotkarairdiśi diśi
vilepanaṃ racayati vilāsavānayamapi
4.55
cakravadhūkulamapi śakraharinmukhamanu
dattavilocanamatha cittamudaṃ prabhajati
4.56
vighaṭitaṃ tadapi hi sughaṭitaṃ samajani
sakalakokayugalanikaramākalayata
4.57
bhṛṅgagaṇāṃ vitatirapi jhaṅkārairmukharayati
sarvāśāvalayamiha samprītā vicarati ca
4.58
vinidraḥ karikalabhasamūho vipinabhuvi
samuttiṣṭhati sapadi samudbhrāmyati ca diśi
4.59
ākulaṃ patibhiratha gokulaṃ prati sarata
śobhanaṃ dinamapi ca śobhanaṃ nanu bhavatu
4.60
iti tāḥ paśupakulataruṇīravadadatha
āgamannijamapi ca bhagavān bhavanamapi
4.61
līlāramitapaśupabālāvatitirapi ca
kṛṣṇo'niśamapi khalu puṣṇātu va iha bhuvi
4.62
idaṃ sakalamanujamudaṃ praviracayatu
yathāsukhamiha harikathāmṛtamanavadhi
4.63
maṅgalamaniśamapi bhaṅgavirahitamiha
saṅkalayatu mama tu samprati hariravatu
4.64
haripadasarasijayugamanudinamapi
mama hṛdi nivasatu śamamapi janayatu
4.64.p1
ityanuṣṭupprastāre caturthaḥ paricchedaḥ
Linked texts (1)
- Tālaprastāra — Rāmapāṇivāda 1700, Sanskrit