Pramāṇa · Search · About · API

Rasakrida (Rāsakrīḍā)

रासक्रीडा

in 4 paricchedas illustrating the diff. prastāras of Anuṣṭubh metre

Language
Sanskrit
Date
1707–1775 CE
Author
Rāmapāṇivāda
Extent
258 passages, 2,086 words
Text
partly digitised
Source
archiveorg · RASAKRIDA ; ed. P. V. Kunjamma; Sukrtindra Indological Series; Sukrtindra Oriental Research Institute; 2010 · Scan of a printed edition hosted by the Internet Archive (archive.org); the ancient text is in the public…

Contents

Text

1.2

ahaṃ viṣṇo rāsakrīḍāmahaṃmohādācakṣāṇaḥ
parīhāsasyaikaṃ pātraṃ bhaviṣyāmi prajñābhājām

1.3

gopaveṣaṃ saṃgṛhṇāno gopavāṭīmadhyāsīnaḥ
gopanārījāraḥ svairaṃ gopabālaiḥsākaṃ reme

1.4

yamunātīre sānandaṃ ramamāṇo'sau govindaḥ
taruṇīsaṅghānākraṣṭuṃ muralīnādaṃ santene

1.5

ākarṇya veṇorudgīrṇaṃ lokābhirāmaṃ saṅgītam
āghūrṇamānāstiryañco'pyāpūrṇamodā : sañjātāḥ

1.6

mitho virodhān muñcanto mṛgādhirājā mātaṅgaiḥ
kuraṅgapotāḥ śārdūlaiḥ samaṃ niṣaṇṇā : sānandam

1.7

tatra tarūṇāṃ śākhāgre citramaho te bhallūkāḥ
kṛtrimabhāvaṃ samprāptāścaṅkramaśīlā ye pūrvam

1.8

svakulato'tyantaprītyā nakulayoṣāṇāṃ madhye
sukhamupāsīnā nāgā niśamayantī smodgītam

1.9

kālindī taṭe govinde kelīlampaṭe sambhūte
tiryañco'pyabhūvan prītāḥ kiṃ brūmo mudo'trānyeṣām

1.10

tadānīṃ vrajavāsinyastadākarṇayantyo gītaṃ
samastaṃ tyajantyo gopyaḥ samantād bhejuḥ

1.11

kāmasāyakairāviddhā rāmasodare sambaddhāḥ
cittavṛttayo gopīnāṃ kutra vānyato rajyante

1.12

svapitu svayaṃ me bhartā svapituśca kiṃ vaktavyam
iti kācana prāvrājīdatikāmukī govinde

1.13

kiṃ me tanayenāsādyaṃ kiṃ me bhavanenāvāpyam
sidhyedakhilaṃ kṛṣṇo'sminnityaṃ bruvatī yātaikā

1.14

mano ramate yatrāsau jano ramaṇo nārīṇām
ato bhavānasmākaṃ mato dṛḍhamityekāgāt

1.15

kiṃ mama dhanairnaśyadbhiḥ kiṃ mama janairdruhyadbhiḥ
acyutapadāvāptirme niścalasukhetyanyāgāt

1.16

muramathano jīvo me paramamunā viśliṣṭā
tanuradhunā nirjīvā pūnariti kāpyānaṃhe

1.17

itthaṃ sarvā nitambinyo muktaśaṅkā mukundaṃ tam
vṛndāraṇye samāsīnaṃ vṛndībhūtāḥ samāseduḥ

1.18

nadīśailān nadāraṇyānyatītyārāitriśārambhe
samāyantīrimā dṛṣṭvā ramānātho jagādedam

1.19

svāgataṃ vo vilāsinyo ! vegato māmupetānām
kāraṇaṃ ki vane ghore svairayāne niśākāle

1.20

trasadeṇīdṛśo yūyaṃ kva ca gopālasundaryaḥ
kva ca siṃhādisattvānāṃ padametacca kāntāram

1.21

kuṇṭhetarairamī bhīmāḥ kaṇṭhāravairupāyāntaḥ
kaṇṭhīravāḥ karīndrāṇāṃ kumbhastalīrvibhindantaḥ

1.22

nakhāgralagnamuktaughāḥ sukhāvarugṇasāraṅgāḥ
itaścaranti kāntāre kathaṃ na bhītirutpannā

1.23

rātriraho mahāghorā ko'tra cared vadhūloke
kutra gato viveko vaścitramidaṃ svatantratvam

1.24

vrajata bho nitambinyo ! vrajapadaṃ nijaṃ bhūyaḥ
anucitaḥ kulastrīṇāmaparapuruṣe rāgaḥ

1.25

bhartṝṇāmatha śuśrūṣā kartavyā khalu yuṣmābhiḥ
bhartāraḥ kulanārīṇāṃ kartāro'khilasiddhīnām

1.26

kulastrī kulasañjātā khalastrījanacāpalyam
vidhatte bata yā nārī patatyenasi sā ghore

1.27

daivata khalu nārīṇāṃ kevalaṃ patiretāsām
tatra yā vimukhī seyaṃ kutra vā kuśalaṃ vindet

1.28

jaraṭho jaṭilo rogī vikṛto viraso vāsau
karuṇārahito vāstu svapatirna parityājyaḥ

1.29

mā mā kuruta vaimukhyaṃ kāmāturitacittebhyaḥ
kutrāpi nijakāntebhyastatrāpyadhikatāntebhyaḥ

1.30

ahonukhalu kāmo'yaṃ mahāduritaheturvaḥ
pareṇa ratimicchantyaḥ patīṃstyajatha hā kaṣṭam

1.31

gokulavanitāḥ kasmādākulamanaso yūyam
māmakavacane dharmye samprati nahi tiṣṭhadhve

1.32

virahavidhurasvāntān madanadahanaklāntān
tvaritamadhunā kāntānabhisarata bho dāntān

1.33

āśāpāśacchedadātraṃ kleśādhānasyaikapātram
ākarṇyedaṃ kṛṣṇāvākyaṃ śokāvignā ūcuretāḥ

1.34

hare ! mā mā voca evaṃ smareṇālaṃ vādhyamānāḥ
tvadāyattā gopānārīmudā tvaṃ naḥ pāhi śaure !

1.35

vallabhastvaṃ vītapuṇyairdulabhastvaṃ mallavairin !
viśvagastvaṃ viśrutastvaṃ viśramastvaṃ vijvarastvam

1.36

patirekastvaṃ parātman ! gatirekastvaṃ janānām
janako mitraṃ tanūjo jananī ca tvaṃ murāre !

1.37

jīvo bhavān jīvavandho ! devo bhavān dehabhājām
bhāvo bhavān bhāgyarāśe !ko vā bhavān nādhunā naḥ

1.38

vayaṃ tu gopyo bhavantaṃ vinā na kañcid bhajāmaḥ
saroruhiṇyo dineśādṛte kamanyaṃ śrayante

1.39

tāvakadāsīrimā naḥ pāvakatulyaiḥ smarāstraiḥ
tāpitacittā nikāmaṃ prāpaya śaure ! samīpam

1.40

sarasijapāṭalaṃ drāgurasi no dehi pāṇim
smaraśarātaṅkaśāntyai paramidaṃ bheṣajaṃ naḥ

1.41

paśyemān payodharasthān pāṭīradravānulepān
saṃsaktān nijorasi tvaṃ sandehaṃ vinā vidheyāḥ

1.42

ramāyā ghanastanābhyāṃ samāmarditaṃ vibho ! te
stanau naḥ kadā nu śaure ! spṛśetāṃ bhujāntarālam

1.43

vanyamālayā viṣatke dhanyatāmaye vivikte
vatsalāñchane tavorasyutsukāvimau stanau naḥ

1.44

paritāpaśoṣitā naḥ parirambhaṇena gāḍham
paribṛṃhayādhunā tvaṃ paripāhi śāṅrgapāṇe !

1.45

cetorucitaṃ vadhūnāṃ dātuṃ hi bhavānidānīm
etādṛgidaṃ svarūpaṃ netā jagato vidhatte

1.46

mayūrakalāpamālāmanojñakacāvalīkam
arālaghanālakaśrīvirāji viśāla phālam

1.47

kuṅkumakṛtordhvapuṇḍraṃ paṅkajadalāyatākṣam
aṇḍajasamānavellatkuṇḍalavilāsigaṇḍam

1.48

tilakusamābhadhrāṇaṃ vilasadapāṅgaśoṇam
sphuradaruṇādharoṣṭhaṃ praviśādadantaśobham

1.49

rākācandrapratimāsyaṃ lokānandasmitalāsyam
kambucchāyāharakaṇṭhaṃ kamraśrīpūramakuṇṭham

1.50

uraḥ śrīkaustubharatnasphuracchrīvatsakacihnam
samāloladvanamālaṃ samāvibhrad ghananīlam

1.51

veṇuśaṅkhāvanuvelaṃ pāṇiyugme vahamānam
śoṇaśocirnakhajālaṃ śobhamānāmalacelam

1.52

maṇimatkāñcanakāñcīdhṛṇijālātimanojñam
jaghanaṃ pītadukūlaṃ sughanaṃ bibhradudāram

1.53

cārūrukāṇḍasujaṅghaṃ cāturyasīma vidhātuḥ
ātāmrapādasarojaṃ cetobhirāmamaśeṣam

1.54

ramāpate ! tava rūpaṃ rasāyanaṃ nayanānām
manoharaṃ mahanīyaṃ ghanopamaṃ kamanīyam

1.55

locanagocaratāṃ no yātamaho bata bhāgyam
mā vada mā bada vāmaṃ mānada ! pūraya kāmam

1.56

saphalatā nayanānāṃ sapadi naḥ samupetā
sarasakomalametadvapuradarśi yataste

1.57

mugdhaiste muralīnādaiḥ snigdhaṃ naḥ śravaṇasaukhyam
taccheṣānanubhavānno dātā kiṃ nanu bhavānno

1.58

kathaṃ tvāmanabhiyāntyaḥ sajīvā bhuvi vasāmaḥ
dhriyante kva nu cakoryaḥ sudhāṃśuṃ parijahatyaḥ

1.59

vāsudeva! tava dāsīstvadviyogamasahantīḥ
tvatsamīpamupayāntīrmā tyaja tvamadhunā naḥ

1.60

karuṇākara! hare! te caraṇāmbujayugaṃ naḥ
śaraṇaṃ śirasi divyābharaṇaṃ viracayedam

1.61

rāmānuja! tava ceto rāmājanasukhaheto!
kāmāturamanasāṃ naḥ kāmānusaratu drāk

1.62

bhavānakhilajanānāṃ bhavārṇavapatitānām
bhavatyavikalamātmā bhavādyamaraśaraṇyaḥ

1.63

tāda‍ṛśi bhavati tuṣṭe tuṣyati sakalalokaḥ
tena hi gṛhapatibhyo no vayamiha bibhīmaḥ

1.64

aśaraṇajanabandho ! bhūśataraguṇasindho !
janamimamātimāyāghanatama ! paripāyāḥ

1.64.p1

ityanuṣṭupprastāre prathamaḥ paricchedaḥ

2.1

gopastrīṇāmevaṃvidhā vācaḥśrutvā dāmodaraḥ
kāruṇyārdraḥ smerānanaścārūdārā vāco'gadīt

2.2

mano rāsakrīḍotsukaṃ mamedānīmudīpitam
varorūṇāṃ vākyāmṛtaurvirodhoktirme kṣamyatām

2.3

kāmalīlākūlaṅkaṣaḥ kāminīnāṃ vo vibhramaḥ
yāmuno'yaṃ deśo'dbhuto yāminīyaṃ cāyāminī

2.4

lalanākelikautukī valamāno'haṃ kānane
milito gopīmaṇḍalairlalito me bhāgyodayaḥ

2.5

candrātapo'yaṃ śobhate sāndrāmṛtābhiṣyandanaḥ
kandarpalīlāvallarīkandaḥ kilāyaṃ kāminām

2.6

cakorajaterjīvanaṃ cakāsti kāmoddīpanam
tuṣārabhānormaṇḍalaṃ puroharitstrīkuṇḍalam

2.7

unnatayorvakṣojayoścandanalepo yoṣitām
mandahasaśrīrānane candrakarāṇāmudgamaḥ

2.8

caṭulabhṛṅgītārakaiḥ sphuṭamasāvunmīlitaiḥ
kumudanetrairīkṣate kumudinīndorāgamam

2.9

sarveṣāṃ manomohanaḥ śarvāṇīpaterbhūṣaṇam
udgacchatyasau candramā udrīrṇasphuraccāndrikaḥ

2.10

mukhānāṃ sakhā vaḥ śaśī sukhānāṃ vidhātā svayam
prakāśaṃ samudbhāsate prakāmaṃ dṛśo rañjanam

2.11

puṣpacāpasenāpatiḥ puṣpagandhadhūpādibhiḥ
pūjanīya eṣo—dhunā pūrṇacandravimbānanāḥ

2.12

yamunātaṭe śobhane yamināṃ manolobhane
ramayāmahe vo vayaṃ ramayā samā yoṣitaḥ

2.13

āgacchata me sannidhau vegādadhunā gopikāḥ
rāgāmbunidhau līyatāṃ rājīvadṛśāṃ mānasam

2.14

smaro'pi nijaṃ kārmukaṃ karotu kare sajjitam
prasūnaśarāṃścanaghān prayoktumanā jṛmbhatām

2.15

cañcaladṛśāṃ vo manovañcanamasau manmathaḥ
vāñchati sa cedāśugaiḥ pañcabhiralaṃ kiṃ bhavet

2.16

śaradijapuṣpāvalīḥ śarayatu puṣpāyudhaḥ
vikiratu vīrāgraṇīrvihṛtiṣu so'smāsu tāḥ

2.17

rāsakrīḍāvinodane rāmāṇāṃ vo manorathāḥ
sampūryante mayāmunā samyaṅ māreṇa cādhunā

2.18

iti śrutvā harervāco ratikrīḍādṛtātmanaḥ
atiprītā vrajāṅganāḥ smitaṃ kṛtvā tamabruvan

2.19

nātha! śaure! namo'stu te dīnabandho! namo'stu te
nandasūno! namo'stu te ramyamūrte! namo'stu te

2.20

ucitaṃ te vaco'mṛtaṃ ruciraṃ no ramāpate!
suciraṃ vāñchitaṃ sukhaṃ sutarāmadya sādhayeḥ

2.21

vṛndāvane vilāsinīvṛndāvane samudyataḥ
vṛndārakābhivandya ! govindādhikaṃ virājase

2.22

smarātisundaro bhavānudūḍhamandaro bhavān
urodhṛtendiro bhavān guṇaikamandiro bhavān

2.23

sajjanavallabho bhavān durjanadurlabho bhavān
kāliyamardano bhavān kelivivardhano bhavān

2.24

kamalalocano bhavān śamalamocano bhavān
patagavāhano bhavān paramamohano bhavān

2.25

ityevaṃ nutiśālinīratyantapraṇayākulāḥ
ādāya vrajayoṣito govindo yamunātaṭe

2.26

latāmaṇḍapamāvasannitāntādaramāvahan
vihāsollasitānano vihārānayamātanot

2.27

tuṅgapīnapayodharāliṅganena ramāpatiḥ
aṅganājanamuccakairaṅgajāturamādadhe

2.28

atha kāmapi kāminīmatikātaralocanām
śravaṇe kathanacchalāt sa cucumba mukhāmbuje

2.29

līlāvalitakandharāṃ vrīlātiśayabandhurām
ātmāṅgamadhiropitāmāliṅgadatha rādhikām

2.30

pravālaśayane kayāpyarālakacabhārayā
aśeta saha mādhavo viśeṣaratilolayā

2.31

kāmapi kalabhāṣiṇīṃ kāmitaratitoṣiṇīm
kvaitavakalahāyitāṃ bhītavadanamaddhariḥ

2.32

viruvadalijālayā tarukusumamālayā
sacakidṛśaḥ striyāḥ kacamatha babandha saḥ

2.33

anyāsaṅgāśāṅkitayā dhanyāmanyāmāttaruṣam
tatpadānte sa praṇatastalpārohaṃ prārthitavān

2.34

kucābhyāṃ te hanta śape sucārvaṅgi! tvadbanitām
ahaṃ bāle! nādṛtavāniti proce kāmapi saḥ

2.35

bhinnabhinnākāratayā sannatāṅgīnāṃ nikaram
sarvameko-pyāramayannirviśeṣaṃ nandasutaḥ

2.36

lalanāsaṅkhyānuguṇaṃ kalayan svāścāpi tanūḥ
ramayāmāsāśu harī ramaṇīyāstā ramaṇīḥ

2.37

ityeṣa ratyekamanāḥ pratyekamatyādaravān
ramāsu reme bhagavān kāmā hi sīmārahitāḥ

2.38

mayā sahāyaṃ ramate mahānubhāvo bhagavān
tṛṇāya manye taruṇīrguṇairvihīnā itarāḥ

2.39

māmakasaubhāgyamidaṃ kāmukacūḍāmaṇinā
madguṇabaddhena dṛḍhaṃ yad gaṇitānyā na vadhūḥ

2.40

mama mukhādasya dṛśau madhuriporno calataḥ
mama vilāsena hṛtaṃ hṛdayamapyasya vibhoḥ

2.41

sarvāsāmaho sudṛśāṃ garvo'bhūnmanasyadhikam
sarveśe vaśaṃgamite sammoho na kasya bhavet

2.42

samastāntarātmatayā samastho ramāramaṇaḥ
viditvā vikāramamuṃ vibhurdrāk tirohitavān

2.43

rādhikā madena tadā bādhitā na sātitarām
tena hetunā bhagavānenayā sahāntaradhāt

2.44

muraśāsana'tha gate muhurmuhuḥ sudṛśaḥ
luluṭhurmahīpatitā ruruduḥ śucā bahudhā

2.45

hā hā kva gato'si hare! hā hā chalitā bhavatā
snehādiha sammilitā mohākulitā vanitāḥ

2.46

aho tava śāṭhyamidaṃ mahājanahāsyakaram
mahāvanamadhya imā vihāya gātasya hare!

2.47

pañcaśarabāṇahatā vañcayasi hā vanitāḥ
kiṃ caritamīdṛgaho muñcasi yadātmavadhūḥ

2.48

tava viraheṇa vayaṃ davaśikhineva hare!
śiva śiva dagdhatamā vivalanamātanumaḥ

2.49

krīḍāśālī nanu bhavān pīḍāmātrā nanu bhavān
gopīnāṃ no vihitavānantaḥśalyaṃ nihitavān

2.50

dayāsindho ! tava dayā kva yātā sā madhuripo !
yayā grāhagrasanajād bhayāt trāto gajapatiḥ

2.51

jñātametat tava vibho ! kātarākṣīṣu na kṛpā
pūtanābhāpi sa bhavān pūtanāmāśu hatavān

2.52

taruṇībhirviharaṇe virasastvaṃ yadi hare!
tava rādhāṃ prati ratirbhavatīdaṃ kimucitam

2.53

rantuṃ tayā saha raho hanta tvayā khalu gatam
mantuṃ vināpi sumate! kintūjjhitā bata vayam!

2.54

prasīda he muraripo! prakāśaya drutataram
nijaṃ vapurnirupamaṃ bhajanti yat sukṛtinaḥ

2.55

rādhikayā subhagayā rāgavaśādavaśayā
pītarasādharapuṭaṃ smeramukhāmṛtakaram

2.56

jaladhijākucapadāṅkitabhujāntarataṭam
jalajakomaladalāyatāvilocanayugam

2.57

śiñcanapracalamaṇīmañjīrāñcitacaṇam
mandāraprasavarajaḥsandohaiḥ surabhikacam

2.58

manojñaṃ vapurayi! te mano naḥ smarati sadā
kadā tannayanapathe sadānandana! bhavitā

2.59

mohavāridhipatitā hā hatā vayamakhilāḥ
gohato vipinamidaṃ gāhitā bata bhavatā

2.60

chalitāḥ kimiti hare! phalitāstava kuhanāḥ
jvalitāḥ smaraśikhinaḥ kalitāḥ prathamamaho

2.61

nānārativitaraṇādenān pariśamayitum
prārabhyata ca bhavatā prālīyata ca tarasā

2.62

aho kaṭhinahṛdayo bhavānajani rajanīḥ
mudhā kimiha kurute sudhākaradhavalitāḥ

2.63

tyaktajanakajananībhartṛtanayabhavanāḥ
saktasarasahṛdayāstyaktumucitamiha naḥ

2.64

yuvatijanaśaraṇe bhavati gatakaruṇe
kimiha bahuruditairanavaratamuditaiḥ

3.1

evaṃ tāsu krośantīṣu devo'muñcad rādhāṃ cāpi
śokāvignā sāpi prāpa śobhāhīnā dīnovāca

3.2

ahaṃ cāpi tyaktā tena sahāraṇyaṃ samprāptāpi
aho kaṣṭaṃ govindena vihīnā yāḥ kiṃ dehena

3.3

kva prayātaḥ śrīkānto'dya tatpriyāḥ! kiṃ no jānītha
apriyaṃ kiṃ tasyākāri yatprakopād yātaḥ kvāpi

3.4

mārgayāmo vegādatra mṛgapakṣivyākīrṇeṣu
vipineṣu prāpya vicarantyo yatnenāpi

3.5

sammārgayantyaḥ kāntārabhūmau mukundaṃ sarvatra
papracchuretā vṛkṣāṃśca vallīrmṛgaughānanyāṃśca

3.6

aśokavṛkṣa! tvaṃ brūhi saśokabhārā no'dyaiva
kimambujākṣo dṛṣṭo'tra samīkṣitaścedākhyāhi

3.7

kaṅkaṇakāñcīkeyūrakuṇḍalahārānaṅgeṣu
saṃkalayan ko'pyāraktapaṅkajanetro dṛṣṭo nu

3.8

navaghanaśyāmaḥ ko'pi tava samīpaṃ prāpto nu
navatamāla! tvaṃ brūhi tava savarṇo yo bhāti

3.9

māyāgopaveṣaḥ ko'pi jāyāvṛndamujjhitvaiva
yātaḥ kvāpi cūta! brūhi nāthastvāmupetaḥ kiṃ nu

3.10

vicinvanti vikrośanti vitanvanti vaiklabyāni
vibhorasya viśleṣeṇa viṣaṇṇāni govṛndāni

3.11

sañcaranti kāntāreṣu sampatanti bhūpṛṣṭhepu
sambhramanti sarvaśāsu gopayauvatānīmāni

3.12

kṛtamāla! kiṃ kuryāma kṛtakarmadopeṇaiva
iha janmanīme tāpanikarā hi sambadhnanti

3.13

gopījana evaṃ nāma pāpī jana evākāri
devena vidhātrā hanta he vetasa! kiṃ jānāsi

3.14

tavāntikakuñje yena divāniśamānandena
sahādūbhutalīlātāni sa hā kva gato vegena

3.15

kesarataro! tvaṃ kiṃ nu keśavagatiṃ jānāsi
kevalamasau hā hanta devanamupekṣyāṃhiṣṭa

3.16

paśukulapālo yatra śiśupaśupākāreṇa
samacaradatra kvāpi sa tu na tu dṛṣṭo'dyāpi

3.17

kaṃ deśaṃ prāpya paśyema taṃ devaṃ nāvagacchema
sandeśaṃ prāpayemātha sandehaṃ muñcatā kena

3.18

cakori! tvaṃ samāsādya sakāśaṃ vāsudevasya
udantaṃ no'khilaṃ brūhi mudaṃ te so'pi kurvīta

3.19

śrīpate! tvadviyogena gopikāstāpitā hanta
kānane kānane yānti dīnatāṃ kṣīṇatāṃ cāpi

3.20

vilapantyo viṣīdanti vicarantyo vicinvanti
virudatyo vimuhyanti viluṭhantyo vimūrcchanti

3.21

līlāstavānugāyanti bālāstavānuśocanti
vrīlāṃ vinānudhāvanti viśveśa! kiṃ na jānāsi

3.22

aharniśaṃ na nidrānti mahāntamādhimṛcchanti
na bhojyapeyamicchanti nadīvanāni gacchanti

3.23

tvaccaritāni pṛcchanti pakṣimṛgādisattvāni
akṣijalāni muñcanti vṛkṣatalāni siñcanti

3.24

śiśiravātaramyāṇi śaśimayūkhasāndrāṇi
jalakaṇānuviddhāni nalinagandhamugdhāni

3.25

vāpīkūpataṭākātitīrāṇyanyamanojñāni
gopyo hanta vinindanti govinda! tvadayogena

3.26

śaśāṅkāṃśuviśuddhāsu niśāsveva samastāsu
viṣīdanti bhṛśaṃ nāma niṣīdanti na kutrāpi

3.27

vallavījanaduḥkhāni vaktumeva na śakyāni
ehi mādhava! vegena pāhi taṃ janamadyaiva

3.28

lalanājanasantāpakalanāya nilīno'si
phalabhaṅga! kimetena valasūdanasodarya!

3.29

kāmāturaśarīrāsu mā mā visukhatākāri
nāthena bhavatā kṛṣṇa! nārīṣu tava dāsīṣu

3.30

prakāmaramaṇīyāṅga! sakāśamupasaṅgamya
prakāśaya vapurdeva ! sukhākuru sakhīrāśu

3.31

sundararamaṇīyāni nandaja ! bhavadaṅgāni
vindatu sudṛgoghaḥ sa nandatu na cirādeva

3.32

virahiṇi jane kṛṣṇa! viracaya dayāmāśu
parisaramupāyāhi pariṇatasukhaṃ dehi

3.33

evaṃ brūyā he cakori! devaṃ govindaṃ sametya
vegādāgantā tataḥ sa vedāntāvedyo jano hi

3.34

śuki! tvaṃ vā tatra gaccha sutaḥ śaurerasti yatra
manuṣyoktyā vaktumadya nanu tvaṃ prāgalbhyameṣi

3.35

vallabhānāṃ vañcanaṃ hi kalyabuddhe! kaṣṭameva
apriyaṃ te tābhiraṅga ! kalpitaṃ kiṃ kañjanābha!

3.36

bhavadarthe bhartṛputrabhavanāni projjhitāni
kati śailāḥ kānananāni sarito vā laṅghitāni

3.37

valgūccalatkuṇḍalāni vāmālakāmaṇḍalāni
evaṃ tvayā saṅgatāni deveśa! kiṃ vismṛtāni

3.38

kalakvaṇatsārasāni kalindajāsaikatāni
galanmarandāmbujāni milanmarālāvalīni

3.39

bālamṛgīsaṅkulāni tālatamālāṅkitāni
nīlagalairañcitāni śailataṭīkānanāni

3.40

nikaṭagovardhanāni nikhilagovardhanāni
sujanavṛndāvanāni subhaga! vṛndāvanāni

3.41

sarvaṇyeva saṃvihāya sarvātmā bhavānapīha
nirlīno vasatyato hi nirviṇṇāḥ striyo bhavanti

3.42

prasīda prabho! mukunda! susīdad vanāntarepu
vadhūnāṃ kulaṃ sametya vidhehi pramodamasya

3.43

indukundamandahāsasundarānanāmbujāya
nandagopanandanāya santataṃ namo namo'stu

3.44

suralokarañjanāya suravairibhañjanāya
natirastu kañjanābha! bhavate nirañjanāya

3.45

nārāyaṇa! vāsudeva! nāthājita! devadeva!
nārījanamādareṇa nānāguṇaśīla! pāhi

3.46

iti stuhi śārike'dya jagatpatimenametya
prasatsyati mādhavaḥ sa sameṣyati sadya eva

3.47

ehi savidhaṃ kuraṅgi! dehijanamohanāṅgi!
brūhi kuta āgatāsi kāhi tava vṛttiratra

3.48

tṛṇajalamātravṛtti vanatalamadhyasupti
praṇayijanāviyukti mṛgakulameva sādhu

3.49

asmādṛśyo dayitena vismaryante viraheṣu
duḥkhāyante duritena duṣkāle satyacireṇa

3.50

sukhāyante sukṛtena sujanmāno yadi santi
sukālaścedupayāti sa kālo no na upaiti

3.51

na śrutaṃ kiṃ mṛgaśāva! viśrutaṃ no vipineṣu
vaiśase yad dayitena vañcitā hā vayamadya

3.52

ratilīlāsamaye sa ramaṇo no rabhasena
aparādhena vināpi vipino'smiṃstyajati sma

3.53

sāraṅga! sāramavehi dūraṃ gate'pi sa eva
māraṃ svacāramivātra sārambhamādiśati sma

3.54

ayaṃ punaḥ kalahāya dayāṃ vinā ghaṭate ca
śarotkarairhṛdayāni karoti nastruṭitāni

3.55

kiṃ karavāma vayaṃ tu kiṃ kathayāma bateha
kaṃ śaraṇaṃ ca bhajāma kaṃ khalu deśamayāma

3.56

muraharācyuta! kṛṣṇa! varada! nātha! mukunda!
garuḍavāhana! deva! kuru kṛpāmadhunaiva

3.57

yoṣāṇāmayi sureśa! doṣāṇāṃ śatamapīha
kṣāmya tvaṃ sakalamadya kāmyatvaṃ dadhadatīva

3.58

vadantīriti vaneṣu valantīratighaneṣu
vrajastrīranu tadā sa kṛpāvānajani tatra

3.59

mandahāsakalitena candravimbatulitena
sāndrakāntisadanena sundareṇa vadanena

3.60

karuṇāmṛtamayena kamalāyatapuṭena
bhayamocanapareṇa nayanāñcalayugena

3.61

nīlopalamasṛṇena lolārpitadhusṛṇena
lakṣmīmaṇibhavanena vakṣaḥsthalaphalakena

3.62

bhujaṅgavaranibhena bhuvo'tibharahareṇa
varābharaṇayutena karāmburuhayugena

3.63

kāñcanavasanalambikāñcibhiratiśubhena
śiñjitamaṇighaṭena mañjulakaṭitaṭena

3.64

sukhakararucipūranakhamaṇinikareṇa
sarasijamṛdulena pādatalayugalena

3.64.p1

ityanuṣṭupprastāre tṛtīyaḥ paricchedaḥ

atha caturthaḥ paricchedaḥ | Chapter - 4

4.1

vaṃśīnāḷīnādāmṛtadhārānandallokena ca
āvirbhūto rupeṇa sa govindo'sau modena ca

4.2

kṛpotphullaṃ netrāñcalakṛtāśleṣaṃ toṣādatha
mukundaṃ taṃ dṛṣṭvākhilavadhūlokenodaśvasi

4.3

ullalabdhammillāñcitamallikāmālāsaṃhati
vallavīvṛndaṃ tannijavallabhaṃ prāpyāvandata

4.4

jagade devenāpi ca jagadekālamve mayi
kupitāḥ kiṃ yūyaṃ bata kuhanākarmalimbini

4.5

dūrvāragarvāviṣkṛti durbodhanirvādhādiha
yuṣmākamantaḥ kiñcana mālinyamatrājāyata

4.6

tadetadāhartuṃ khalu tadā tirobhūto'smi hi
tathā na rādhājumbhata tato hyanaiṣaṃ tāmapi

4.7

sāpi ca dṛptā kiñcana saṃvaha kaṇṭhe māmiti
yadbata tatrāvocata tat punareṣāpyaujjyata

First 200 of 262 passages. Read on

Contains

Part of

See also: more in Prakrit and Apabhraṃśa kāvya (non-Jain)