The Great Epic of the Bhārata dynasty 13.17

Bhāratabhāvadīpa 13.17

Language: Sanskrit

13.17.3

satyairanvarthaiḥ vede kṛtātmanā dattacittena kṛtaiḥ vedātpṛthakkṛtaiḥ ||

13.17.4

yathoktairiti stutyaṃ siṃhāvalokananyāyena viśinaṣṭi pravaramityardhena ||

13.17.6

varaya prārthaya upasanno bhava enaṃ mantrātmakamīśvaraṃ labdhum ||

13.17.19

ida‌miti | etajjapa eva dhyānādiphalaprada ityarthaḥ ||

13.17.20

yaṃ stavaṃ sakṛdadhigamenāpyasya paramāṃ gatiṃ gacchetaivetyarthaḥ | pavitraṃ pāpanāśakaṃ medhyaṃ yajñādiphalapradaṃ maṅgalam abhyudayakaram uttamaṃ kalyāṇaṃ paramānandarūpam ||

13.17.25

brahmaṇāṃ vedānāṃ vācāmapi yo vāgityarthaḥ | parāṇāmindriyārthamanobuddhimahadavyaktānāmapi yaḥ paraḥ puruṣa ityarthaḥ ||

tejasāṃ cakṣurādīnāmapi yaccakṣuḥ tapasāṃ puṇyānāṃ gaṅgādīnāmapi yatpuṇyaṃ śāntānām uparatacittānāmapi ātyantikī uparatirmokṣākhyā dyutīnāṃ jñānānāṃ vṛttirūpāṇāmapi jñānaṃ sākṣirūpam anuvyavasāyāparaparyāyam ||

13.17.27

dāntānāṃ jitendriyāṇāṃ madhye'tyantaṃ jitendriyaḥ | dhīmatāṃ jñānināṃ dhīḥ ātmā anubhavarūpaṃ jñānam | devānāṃ pūjyānāmapi pūjyaḥ | ṛṣīṇāṃ kāvyakartṝṇāmapi kāvyakartā vedakartṛtvāt ||

13.17.28

yajñānāṃ yajñabhoktṝṇāṃ yajñaḥ yajñasya ārādhanasya bhoktā śivānāṃ kalyāṇānāmapi kalyāṇaṃ ruṇaddhi enamiti vā rodityanena vā rautyanena vā ravaṇaṃ vā rut ajñānaṃ vā viparyayo vā śoko vā duḥkhaṃ vā rut tāṃ drāvayatīti rudraḥ | jñānam ānando vā teṣāmapyānandaḥ | prabhavatāmīśvarāṇāmapi prabhā aiśvaryam ||

13.17.29

yogināṃ brahmādīnāmapi yo yogī dhyeyasaṅkalpamātreṇa sraṣṭā | kāraṇānām avyaktādīnāṃ kāraṇaṃ niṣkalam ||

13.17.31

12-ata eva bhavatyasmādananyāpekṣādviśvamiti bhavatyasminpralaya iti vā bhavaḥ sarvasyotpattipralayasthānaṃ 'ṛdorap' (pā.3 |3 |57) ityap bhavati astīti sattārthādbhavateḥ pacādyac sattāmātrasvarūpa ityarthaḥ ||

13.17.32

21- prabhuḥ prakarṣeṇa bhavate prāpnoti viśvaṃ bhogyatveneti sarvabhokā pūrvavat ḍuḥ ||

13.17.33

31- ardayati janaṃ pāpinaṃ pīḍayati kālāntakarūpeṇeti ardanaḥ | nandyādilyuḥ ||

13.17.35

45- mahāhanuḥ mahatyau viśvagrāsasamarthe hanū adharottare mukhaphalake yasya sa mahāhanuḥ ||

13.17.36

53- [niyamāśritaḥ] niyamaistaireva āśritaḥ nārāyaṇadakṣiṇāmūrtyādirūpeṇa niyamānāmāśrayabhūta ityarthaḥ ||

13.17.37

62- nakṣatrasādhakaḥ sukṛtāṃ vā etāni jyotīṃṣi yannakṣatrāṇīti śruterākāśe dīpyamānāni śarīrāṇi nakṣatrāṇi teṣāṃ sādhakaḥ | iṣṭādikāriṇāṃ somaloke divyaśarīralābhasya darśanāt ||

13.17.38

73- anaghaḥ yajñaghno'pi niṣpāpaḥ tejīyastvātsvatantratvācca ||

13.17.39

81- paramaṃ tapaḥ ayaṃ tu paramo dharmo yadyogenātmadarśanamiti yājñavalkyokto dharmaḥ ||

13.17.40

90- bajivāhanaḥ bījam avidyākāmakarmātmakaṃ tadeva vāhanam ihalokaparaloke sañcārārthaṃ yasyeti tathā yathoktaṃ- 'ātmānaṃ rathinaṃ viddhi śarīraṃ rathameva tu’ iti | śarīrapa‌damatrāvyaktaparamiti siddhāntaḥ ||

13.17.41

98- abalaḥ niḥsāmarthyaḥ cetanaprayuktiṃ vinā calanākṣamaḥ gaṇyate saṅkhyāyata iti gaṇastattvasamūhaḥ pañcaviṃśatijaḍatatvātmetyarthaḥ | svayaṃ tu ṣaḍviṃśaḥ tattvāni ca sāṅkhyasaptatyām avyaktaṃ mahān ahaṅkāraḥ pañcatanmātrāṇi ekādaśendriyāṇi pañcamahābhūtāni pañcaviṃśo bhokteti ||

13.17.42

106- haraḥ tatpravilāpanasthānaṃ sarvabhāvanaḥ hara iti ca pūrvaṃ kālarūpeṇa sarvakartṛtvasaṃhartṛtve ukte idānīṃ tattvadṛṣṭyeti bhedaḥ | tathā hi caturvidhaḥ pralayaḥ prākṛto brahmāvasāne mahadantānāṃ kāryāṇāṃ nāśaḥ | dainandino brahmadināvasāne trailokyanāśaḥ | nityo'smadādisuṣuptau sarvanāśaḥ | ete trayaḥ sabījā iti utpattimantaḥ ātyantikastu tattvajñānena sakāraṇasya kāryasya nāśaḥ punarutpattihīno mokṣākhya iti śāstraprasiddhiḥ ||

13.17.43

116- mahān pūjyaḥ ||

13.17.44

124- vinataḥ vinayavān | ||

13.17.45

132- ata eva sarvaśubhaṅkaraḥ sarvabhūtābhayapradaḥ ||

13.17.46

aiśvaryamāyatanamāvaraṇāni ca tvaṃ kiṃ kiṃ na yadbhavasi devi śaśāṅkamauleḥ || iti ||

13.17.47

149- suvarcasaḥ sutarāṃ varco'dhyayanatapaādijaṃ tejo yasmin samāsānto'c ārṣaḥ ||

13.17.48

156- ārdracarma gajakṛttistadevāmbaraṃ tenāvṛtaḥ [ārdracarmāmbarāvṛtaḥ ] ||

13.17.49

164- maheśvaraḥ indrādibhya īśvarebhyo mahān ||

13.17.50

173- sarveṣu lālasā prītirasya [sarvalālasaḥ] viśvabandhurityarthaḥ ||

13.17.51

183- ata eva tandritaḥ tandrā tamomayī vṛttiḥ pravṛttinirodhinī tadrahitaḥ anindita iti pāṭhe vyavasāyasya viśeṣaṇam ||

13.17.52

190- madhyama īṣat‌ saumyaḥ ||

13.17.53

199- gambhīram agādhaṃ parairanāsāditatalaṃ balaṃ senā śārīraṃ sāmarthyaṃ vā vāhanaṃ vṛṣabhaśca dharmarūpī yasya saḥ gambhīrabalavahanaḥ ||

13.17.54

206- mahānana iti tada‌nuguṇe śarīramukhe anuvarṇite ||

13.17.55

214- karmaṇāṃ darśādīnāṃ kālaṃ yathoktaṃ vettīti karmakālavit ||

13.17.56

221- hutāśanaḥ agniḥ ||

13.17.57

228- sarvaṃ kālādikaṃ vigraho deho yasya sa sarvavigrahaḥ sandhīti pāṭhe sandhivigrahayānāsanādirūpaḥ ||

13.17.58

240- kālakaṭaṅkaṭaḥ kālasya yamasya kaṭo veṣṭakaḥ āvaraṇamīśvarīyā māyā tāmapi kaṭatyāvṛṇotīti kālakaṭaṅkaṭaḥ kaṭe varṣāvaraṇayoriti dhātuḥ | śāleti pāṭhe vṛkṣāṇāmāvarako vāyustasyāpyāvarako vyomarūpī ||

13.17.59

249- ata eva amukhaḥ bhogasādhanahīnaḥ abhokteti yāvat | sarvatomukha iti pāṭhe tvekaṃ nāma ||

13.17.60

256- srutaḥ sarvatra gataḥ prāptaḥ, karmaṇi ktaḥ ||

13.17.61

263- taraṅgavit taraṅgatulyāni viṣayasukhāni vindati labhate iti tathā taraṅgavit ||

13.17.62

268- yudhi śatruvināśanaḥ spaṣṭārtham ||

13.17.63

275- yajñavibhāgavit yajñiyānāṃ haviṣāṃ vibhāgābhijñaḥ ||

13.17.64

285- dharāṇāṃ diggajaśeṣakūrmādīnāmapyuttamaḥ [dharottamaḥ] ananyādhāraḥ san taiḥ sarvaiḥ sahitasya brahmāṇḍasya dhartā ||

13.17.65

293- sarpā evaṃ cīrasya vastrasya nivāsanaṃ viṣṭambhakaṃ yasya sa sarpacīranivāsanaḥ vasu stambhe'sya rūpam ||

13.17.66

301- balo balarāmastadrūpadhārī balarūpadhṛk balaṃ ca rūpaṃ ca tayordhartā vā ||

13.17.67

308- khagaḥ hārdākāśagaḥ śuddhena rūpeṇetyarthaḥ, hārdākāśa eva tāvadasaṅgastadantargatastu sutarāmasaṅgaḥ san nipātī avaśaśca bhavatyaho mohasya māhātmyamapāramiti bhāvaḥ ||

13.17.68

317- niśācaraḥ niśeva niśā avidyā tayā carati viṣayān bhuṅkte sa tathā ||

13.17.69

325- ata eva sahasradaḥ anantasya dhanāderdātā ||

13.17.70

335- yaśaḥ kīrtipraśca ||

13.17.71

344- siddhaścāsau sādhakaśca [siddhasādhakaḥ] jñānottaraṃ sannyāsamabhīpsan yājñavalkyādirvidvatsannyāsī ||

13.17.72

353- [gavāṃ patiḥ] gavāmindriyāṇāṃ patiścālakaḥ ||

13.17.73

360- madhukaḥ koyaṣṭikākhyaḥ pakṣī tadvallocane yasya sa madhukalocanaḥ madhveva madhukaṃ kṣaudraṃ tadvatpiṅganetra iti vā ||

13.17.74

367- vicāravit viparītaṃ caraṇam antarmukhatayā gamanaṃ tadvettā ||

13.17.75

377- hariḥ hanumān rāmarūpasya viṣṇoḥ sahāyaḥ ||

13.17.76

386- pitāmahaḥ piturviṣṇorapi pitā | indirālokamātā meti lakṣmyā lokamātṛtvasya prasiddhatvena tadbharturviṣṇorlokapitṛtvāt ||

13.17.77

393- yugāvahaḥ yugāni puṇyapāpatāratamyavanti kṛtatretādvāparakalisañjñāni āvahati nirvartayatīti tathā ||

13.17.78

401- niśākaraḥ candraścāndravyākaraṇapraṇetā ||

13.17.79

411- anauṣadhaḥ vrīhyādyannajātīyarahitaḥ abhokteti yāvat ||

13.17.80

421- gatāgataḥ yātāyātavānsaṃsāraḥ | ||

13.17.81

429- samaramardanaḥ samare śatrūṇāṃ mardanaḥ ||

13.17.82

438- haviḥ payaādirūpaḥ ||

13.17.83

446- niravagrahaḥ pratibandhaśūnyo manorathavṛṣṭikarttā ||

13.17.84

454- mahān garbha utpādanīyatve parāyaṇam avaśyaṃ gamyaṃ yasya sa mahāgarbhaparāyaṇaḥ prajananātmakaḥ kandarpa ityarthaḥ ||

13.17.85

461- mahāyaśāḥ ||

13.17.86

469- mahāhanuḥ ||

13.17.87

477- mṛgālayaḥ aṅkādhiropitamṛga ityarthaḥ ||

13.17.88

485- mahāmukhaḥ ||

13.17.89

493- girisādhanaḥ parvata eva sādhanaṃ raṇe jayaheturyasya giridhanvetyarthaḥ ||

13.17.90

501- vāyureva vāhanaṃ deśāddeśāntaraṃ prati gateḥ sādhanaṃ saḥ vāyuvāhanaḥ ||

13.17.91

507- ṛk sahasrāmitekṣaṇaḥ ||

13.17.92

515- sudarśanaḥ maṅgalāvahaṃ darśanaṃ yasya ||

13.17.93

525- sthiraḥ sthāvaraḥ parvatādirūpaḥ ||

13.17.94

535 - kālena mṛtyunā pūjitaḥ kālapūjitaḥ ||

13.17.95

543- gaṇaḥ bhṛṅgiriṭinandikeśvarādistadrūpaḥ ||

13.17.96

552- bhūtaiḥ pūrvācāryairniṣevitaḥ bhūtaniṣevitaḥ ||

13.17.97

560- suniścalaḥ parvatādirūpaḥ ||

13.17.98

571- suśāradaḥ śobhanavāk ||

13.17.99

579- jaleśayaḥ viṣṇurūpī śeṣaparyaṅke jalaśāyī ||

13.17.100

589- analaḥ agniḥ ||

13.17.101

596- mahāyudhaḥ ||

13.17.102

605- surārihā ||

13.17.103

614- ata eva śivaḥ śuddhaḥ nirupādhirityarthaḥ | yathoktaṃ vāyusaṃhitāyām - viśuddhiḥ śivatā svataḥ iti ||

13.17.104

625- dharaḥ ||

13.17.105

634- bhūtānāṃ bhāvanaṃ rajjvāmuragasyevāsminniti bhūtabhāvanaḥ ||

13.17.106

642- analaśca | pūrvaṃ bhūtarūpeṇoktāvatra tadabhimānidevatārūpāviti viśeṣaḥ ||

13.17.107

651- guṇauṣadhaḥ aiśvaryajñānavairāgyadharmādīnāmauṣadhavaduddīpakaḥ ||

13.17.109

665- bahupradaḥ ||

13.17.110

675- mahauṣadhaḥ vrīhiyavarūpaḥ ||

13.17.111

681- siṃhavāhanaḥ siṃhayuktaṃ vāhanaṃ ratho'sya ||

13.17.112

689- sabhāṃ dharmaparīkṣāsthānam avatīti sabhāvanaḥ ||

13.17.113

693- aninditaḥ ||

13.17.114

702- ata eva prāṇadhāraṇaḥ ||

13.17.115

712- hariḥ harati bhaktānāṃ duḥkhamiti hariḥ ||

13.17.116

718- jitendriyaḥ ||

13.17.117

726- apsarogaṇasevitaḥ ||

13.17.118

733- sarvagandhasukhāvahaḥ yugapatsarveṣāṃ gandhānāṃ viṣayasparśānāṃ sukham āvahatīti tathā ||

13.17.119

742- guṇādhikaḥ ||

13.17.120

748- devo divi suparvaṇaḥ divi svarge yaḥ suparvā indrasañjño mahān tasya deva ārādhanīyaḥ ||

13.17.121

756- mahāpathaḥ śiṣṭācārarūpaḥ ||

13.17.122

761- mahābalaḥ mahāṃścāsau balaśca mahābalaḥ balaśabdānmatvarthīyo'rśa ādyacpratyayaḥ balavān vīra ityarthaḥ ||

13.17.123

770- bahukarkaśaḥ saṃhartṛtvāt ||

13.17.124

778- taponidhiḥ mahāmuniḥ ||

13.17.125

787- harati śarīraṃ deśāddeśāntaraṃ prati nayatīti hariḥ pādābhimāninī devatā trivikrama ityarthaḥ ||

13.17.126

795- acalopamaḥ niścalaḥ tattvajñānītyarthaḥ ||

13.17.127

801- ata eva saphalodayaḥ ||

13.17.128

811- sahaḥ sarvaṃ sahate maṣaryatīti sahaḥ ||

13.17.129

817- utthānaḥ sarvakarmaṇām uttiṣṭhantyasmādityutthānaḥ ||

13.17.130

824- mahān atyuccaḥ ||

13.17.131

834- vikurvaṇaḥ karotīti kurvā vigataḥ kurvā yasmāt vikurvaṇaḥ karmāprāpya ityarthaḥ samāsānta ārṣaḥ ||

13.17.132

842- guruḥ ||

13.17.133

850- kṛṣṇapiṅgalaḥ hariharamūrtiḥ viṣṇurnārāyaṇaḥ kṛṣṇa iti kṛṣṇaśabdasya harau nidhibhede kapau rudre piṅgalaḥ kapile'nyavaditi nānārthakośāt, piṅgalaśabdasya hare ca prasiddhidarśanāt puruṣaṃ kṛṣṇapiṅgalaṃ daridraṃ nīlalohitetyādiśruterapyayamevārthaḥ, nīlagrīvo vilohita iti lohitapadena rudrasyāpi grahaṇāt | yadi tu nīlalohitatvaṃ rudrasya pūrvaṃ lohitaḥ paścānnīla iti kālabhedena vā kaṇṭhe nīlaḥ sarvāṅge lohita iti vā vāmāṅge nīlo dākṣaṇāṅge lohita iti deśabhedena vā āvarakaprakṛtyaṃśena nīlastatpravartakapuruṣāṃśena lohita iti guṇabhedena vā gṛhyate, tadā guṇavācinoḥ śabdayordravyavācitvaṃ tadvattvācca tarekadeśavācitvamiti viprakṛṣṭārthakalpanā | asmākaṃ tu vilohitakṛṣṇapada‌yormukhyavṛttyaiva śivakeśavavācitvaṃ dṛṣṭaṃ tena tatparyāyayornīlapiṅgalapada‌yorapi hariharavācitvaṃ vaktuṃ yujyate | tathā ca kṛṣṇa piṅgalapadena nīlalohitapadena vā hariharāveva grāhyau | nirṇītārthakapadāntarasamabhivyāhārasāmarthyāda‌nirṇītārthakasyāpi padasyārtho vyavasthāpayituṃ śakya eveti yuktamutpaśyāmaḥ | yadyapi pūrvavādyukteṣvapyartheṣu kuśakāśāvalambane na kiñcitpramāṇamunnetuṃ śakyaṃ tathāpi ṛjumārgeṇa siddhyatyarthe vakreṇa sādhanāyogāt śivaviṣṇunāmnāmanyonyasminprayogadarśanācca tayorekasyaiva vyūhadvayātmatvādatra idameva vyākhyānamiṣṭam | na caivamindrāgnipadavat dvivacanena bhāvyaṃ tatpuruṣādipadeṣviva kṛṣṇaścāsau piṅgalaścetyabhedenaiva pada‌yoranvayopapattau bhedasūcakadvivacanāyogāt | hariharayorabhedasya ca prāgeva pratipāditatvāditi dik | tadayaṃ saṅgrahaḥ ||

13.17.134

856- jalodbhavaḥ jale 'salila eko'draṣṭā' iti śruterekārṇave udbhava āvirbhāvo yasya māyāvītyarthaḥ ||

13.17.135

865- tigmatejāḥ svayambhuvaḥ brahmaṇo dṛṣṭyā tigmatejāḥ duḥsahaparākramaḥ svaśiraśchedakatvāt ||

13.17.137

880- umāyāḥ śailaputryāḥ dhavo bhartā umādhavaḥ | ||

13.17.138

888- śvetapiṅgalaḥ arddhanārīnaṭeśvaro dakṣiṇārddhe karpūragauraḥ vāmārddhe kanakapiṅgalaḥ | ye tu śvetapiṅgalapadasyārthaṃ kṛṣṇapiṅgalapadena bruvate te śvetamapi kṛṣṇīkartuṃ samarthā mahānto bhavantīti ||

13.17.139

895- dharmasādhāraṇo varaḥ puṇyānurūpaprasādātmā ||

13.17.140

901- vivasvān viśeṣeṇa vaste ācchādayatyanena bhuvanamiti vivaḥ aṃśujālaṃ tadvān sūyate iti savitā kṛto bahulamiti vārtikātkarmaṇi tṛc bāhulakāt yajñe'bhiṣūyamāṇaḥ amṛtaḥ somaḥ aṃśuraṃśuṣṭedevasometi mantraliṅgāt | apāma somamamṛtā abhūmeti amṛtatvasādhanatvaśruteśca somasya vivasvattvamamṛtatvaṃ ca jñeyaṃ tena tripada‌mekaṃ nāma ||

13.17.141

909- saṅkhyāsamāpanaḥ ṛtvādisaṅkhyāsamāptirūpaḥ saṅkrāntidarśapūrṇamāsādirūpaḥ ||

13.17.142

919- ādyo nirgamaḥ aṅkurarūpī ahamiti prathamo'dhyāsaḥ ||

13.17.143

930- triviṣṭapaṃ svargasādhanadharmaḥ ||

13.17.144

936- devāsuraparāyaṇaḥ puṃstvamārṣam ||

13.17.145

941- devāsuragaṇāśrayaḥ āśraṇīyaḥ ||

13.17.146

946- devāsuravarapradaḥ brahmarudrādirūpeṇa ||

13.17.147

953- ātmasambhavaḥ svataḥsiddhaḥ ||

13.17.148

964- nararṣabhaḥ nareṣvapi śreṣṭhaḥ ||

13.17.150

984- nirāmayaḥ nirdoṣaḥ ||

13.17.151

992- [brahmavarcasaḥ] brahmavarcasaṃ vidyātapaḥsamudbhavaṃ tejaḥ tadvān arśaādyacpratyayānto'yam ||

13.17.152

999- śuciḥ nirmalacittaḥ ||

13.17.153

1008- jagat avyākṛtādighaṭāntanaśvaravasturūpaḥ gacchati nityaṃ rūpāntaraṃ prāpnotīti jagaditi vyutpatteḥ pradhānādīnāmapi jagattvaṃ calaṃ guṇavṛttamiti kāpilasiddhāntācca evaṃ ca ya ādau sthira uktaḥ sa eva jagadityukte sthire bhūmātmani jagatkalpitamityuktaṃ bhavati, tataśca 'ātmaivedaṃ sarvaṃ brahmaivedaṃ sarvaṃ tattvamasyahaṃ brahmāsmyayamātmā' ityādi śāstrasiddhaṃ brahmādvaitaṃ pratipāditaṃ bhavatīti śivam ||

13.17.154

yatheti | bahūnāṃ madhye sahasraṃ pradhānāni nāmānyuddhṛtya stuto'sītyardhasyārthaḥ ||

13.17.158

etaddhīti | paramaṃ brahma utkṛṣṭā brahmaprāptisādhanabhūtā vidyā | etāṃ japan paraṃ brahma kaivalyam adhigacchatītyadhyāhṛtya yojyam ||

13.17.159

ātmasaṃsthākaraḥ ātmani pratīci saṃsthā'nanyavyāpārarūpā parisamāptiḥ tāṃ karoti mokṣaprada ityarthaḥ ||

13.17.160

tathaiveti | bahubhirjanmabhirīśānaṃ stavaiḥ stuvantastuṣyanti ca ramanti cetiḥ prathamadvitīyacaturthasthairanvayaḥ ||

13.17.161

bhaktyā ārādhyo'yamiti niścayena bhāvena prītyā ||

13.17.162

vrajannityādyekavacanāni bahuvacanārthāni supāṃ sulugiti vā vibhakterārṣaḥsuḥ ||

13.17.165

ananyā abhedena śivo'hamasmīti bhāvanayā | tathā ca śrutiḥ - 'atha yo'nyāṃ devātāmupāste'nyo'sāvanyo'hamiti na sa veda yathā paśureva sa devatānām' iti | bhedenopāsanaṃ nindati-bhave śive kāraṇe bhaktirasya puṃsaḥ bhāvino bhāgyāt sarvayuktasya sarvasādhanavataḥ sarvathā sarvaiḥ prakārairutpannā bhavatīti sambandhaḥ ||

Linked texts (1)

Mahābhārata — Vyāsa, Sanskrit