The Great Epic of the Bhārata dynasty 3.86.5

3.86.5

triyugau dharmasya bhāryāyāṃ mūrtisañjñāyāṃ kṛtayuge'vatīrṇau naranārāyaṇau | tāveva dvāparānte'pi keśavārjunāviti purāṇapuruṣāvetau nāsmadādivanmānuṣāviti bhāvaḥ | puṇḍarīkākṣau sākṣādviṣṇū | yadvā trīṇi yugāni yugalāni ṣaḍaiśvaryāṇi bhagasañjñāni vā ṣaḍaṅgāni vā yayostau triyugau tāni ca purāṇāntare smaryante | ‘aiśvaryasya samagrasya jñānasya yaśasaḥ śriyaḥ | vairāgyasya ca dharmasya ṣaṇṇāṃ bhaga itīṅganā' | iṅganā sañjñā | 'sarvajñatā tṛptiranādibodhaḥ svatantratā nityamaluptaśaktiḥ | anantaśaktiśca vibhorvibhujñāḥ ṣaḍāhuraṅgāni maheśvarasya' iti | anye tu jñānaiśvarye vīryabale tejaḥparākramau ceti trīṇi yugalānītyāhuḥ tatra jñānam anaparodhaṃ traikālikārthasphuraṇam | aiśvaryam icchānabhighātaḥ | balamupakrāntanirvāhaḥ | vīryaṃ kāmamantraśaktiḥ | tejaḥ parābhighātaḥ | parākramo yathākālamutthānamiti tadvyācakṣate ca tannirmūlaṃ punaruktidoṣādayuktaṃ ca ||