Pramāṇa · Search · About · API

The Great Epic of the Bhārata dynasty 9.6

Vulgate (Nīlakaṇṭha's text) 9.6

Language
Sanskrit

9.6.1

sañjaya uvāca |
atha haimavate prasthe sthitvā yuddhābhinandinaḥ |
sarva eva mahāyodhāstatra tatra samāgatāḥ ||

9.6.2

śalyaśca citrasenaśca śakuniśca mahārathaḥ |
aśvatthāmā kṛpaścaiva kṛtavarmā ca sātvataḥ ||

9.6.3

suṣeṇo'riṣṭasenaśca dhṛtasenaśca vīryavān |
jayatsenaśca rājānaste rātrimuṣitāstataḥ ||

9.6.4

raṇe karṇe hate vīre trāsitā jitakāśibhiḥ |
nālabhaśarma te putrā himavantamṛte girim ||

9.6.5

te'bruvansahitāstatra rājānaṃ śalyasannidhau |
kṛtayatnā raṇe rājansampūjya vidhivattadā ||

9.6.6

kṛtvā senāpraṇetāraṃ parāṃstvaṃ yodbhumarhasi |
yenābhiguptāḥ saṅgrāme jayemāsuhṛdo vayam ||

9.6.7

tato duryodhanaḥ sthitvā rathe rathavarottamam |
sarvayuddhavibhāvajñamantakapratimaṃ yudhi ||

9.6.8

svaṅgaṃ pracchannaśirasaṃ kambugrīvaṃ priyaṃvadam |
vyākośapadmapatrākṣaṃ vyāghrāsyaṃ merugauravam ||

9.6.9

sthāṇovṛṣasya sadṛśaṃ skandhanetragatisvaraiḥ |
puṣṭaśliṣṭāyatabhujaṃ suvistīrṇavarorasam ||

9.6.10

bale jave ca sadṛśamaruṇānujavātayoḥ |
ādityasyārciṣā tulyaṃ buddhyā cośanasā samam ||

9.6.11

kāntirūyamukhaiśvaryaistribhiścandramasā samam |
kāñcanopalasaṅghātaiḥ sadṛśaṃ śliṣṭasandhikam ||

9.6.12

suvṛttorukaṭījaṅghaṃ supādaṃ svaṅgulīnakham |
smṛtvā smṛtvaiva tu guṇāndhātrā yatnādvinirmitam ||

9.6.13

sarvalakṣaṇasampannaṃ nipuṇaṃ śrutisāgaram |
jetāraṃ tarasārīṇāmajeyamaribhirbalāt ||

9.6.14

daśāṅgaṃ yaścatuṣpādamiṣvastraṃ veda tattvataḥ |
sāṅgāṃstu caturo vedānsamyagākhyānapañcamān ||

9.6.15

ārādhya tryambakaṃ yatnādvratairugrairmahātapāḥ |
ayonijāyāmutpanno droṇenāyonijena yaḥ ||

9.6.16

tamapratimakarmāṇaṃ rūpeṇāpratimaṃ bhuvi |
pāragaṃ sarvavidyānāṃ guṇārṇavamaninditam ||

9.6.17

tamabhyetyātmajastubhyamaśvatthāmānamabravīt |
yaṃ puraskṛtya sahitā yudhi jeṣyāma pāṇḍavān ||

9.6.18

guruputro'dya sarveṣāmasmākaṃ paramā gatiḥ |
bhavāṃstasmānniyogātte ko'stu senāpatirmama ||

9.6.19

drauṇiruvāca |
ayaṃ kulena rūpeṇa tejasā yaśasā śriyā |
sarvairguṇaiḥ samuditaḥ śalyo no'stu camūpatiḥ ||

9.6.20

bhāgineyānnijāṃstyaktvā kṛtajño'smānupāgataḥ |
mahāseno mahābāhurmahāsena ivāparaḥ ||

9.6.21

enaṃ senāpatiṃ kṛtvā nṛpatiṃ nṛpasattama |
śakyaḥ prāptuṃ jayo'smābhirdevaiḥ skandamivājitam ||

9.6.22

tathokte droṇaputreṇa sarva eva narādhipāḥ |
parivārya sthitāḥ śalyaṃ jayaśabdāṃśca cakrire ||

9.6.23

yuddhāya ca matiṃ cakrurāveśaṃ ca paraṃ yayuḥ |
tato duryodhano bhūmau sthitvā rathavare sthitam ||

9.6.24

uvāca prāñjalirbhūtvā droṇabhīṣmasamaṃ raṇe |
ayaṃ sa kālaḥ samprāpto mitrāṇāṃ mitravatsala ||

9.6.25

yatra mitramamitraṃ vā parīkṣante budhā janāḥ |
sa bhavānastu naḥ śūraḥ praṇetā vāhinīmukhe ||

9.6.26

raṇaṃ yāte ca bhavati pāṇḍavā mandacetasaḥ |
bhaviṣyanti sahāmātyaḥ pañcālāśca nirudyamāḥ ||

9.6.27

duryodhanavacaḥ śrutvā śalyo madrādhipastadā |
uvāca vākyaṃ vākyajño rājānaṃ rājasannidhau ||

9.6.28

yattu māṃ manyase rājan kururāja karomi tat |
tvatpriyārthaṃ hi me sarvaṃ prāṇā rājyaṃ dhanāni ca ||

9.6.29

duryodhana uvāca |
saināpatyena varaye tvāmahaṃ mātulātulam |
so'smānpāhi yudhāṃ śreṣṭha skando devānivāhave ||

9.6.30

abhiṣicyasva rājendra devānāmiva pāvakiḥ |
jahi śatrūn raṇe vīra mahendro dānavāniva ||

Other recensions (1)

Linked texts (1)