Asaphvilasa 4
Āsaphvilāsa 4
- Language
- Sanskrit
Contents
- 4.p1 — 4 parts
4
rudato niśi śaiśavena dūrīkṛtanidrasya gajānanasya gaurī
upagāyati bhītaye yadudyanmadayūthādhipayūthadānakīrttim
4.p1.1
sa kadācidvipulabalavaśībhavadvasumatīvalayavellanīkṛtayaśovimalāṃgukaḥ pracaṇḍabhujadaṇḍamaṇḍalībhavatkodaṇḍaniḥsaratkāṇḍakhaṇḍakṛtāśeṣaśātravaḥ karaṭataṭanirgalanmadadravanirjharāṇāṃ samprati samutpannānāṃ dharādharaśiśūnāmiva riṅgatāṃ mataṅgajānāṃ saṃghaṭṭaiḥ prathamasamāgamatrastanavāṅganānāsāgralambimaktāphalacāpalyamalimlucānāṃ pratikṣuranikaraśilātalasaṃghaṭṭasamucchaladvidyudvallīkṛtavipulavisphuliṅgacchaṭāpaṭalānāṃ vājināṃ rājibhiśca samākulayā sāgarasamānayā senayā samāvṛto viṣamatarāhāvarohābhiḥ svarāvṛttibhiriva kleśapracurapariṇāmasukhābhirvaidikakarmasaraṇibhiriva paddhatibhiranākalitaduḥkhaleśaṃ kaśmīradeśamājagāma yasminnanavaratamaparimitapayodapaṭalaparyāyatatprāleyapuñjapañjaritena paritaḥ sphuratā rajataprākāreṇeva gaurīguruṇā himagiriṇā veṣṭitāparimitakusumāmodamādyanmadhuvratavrātagītamāhātmyaiḥ kairapi pariṇatarasabhāratundilānāṃ phalānāṃ prakareṇopanamraśākhāśatairātitheyairiva gṛhasthairasaṃkhyeḥ śākhibhiḥ śobhitā praphullapadminīpariṣannighūnanodbhūtaparāgapaṭalapāṇḍuritaiścañcupuṭairatirasalampaṭābhirvaraṭābhiḥ kaṇḍūyitakapolānāṃ rājahaṃsānāmāvalibhiḥ sevitairekībhavadindranīlamaṇimayūkhamāṃsalānāntarvibhāvanāviśeṣavilokanīyaśeṣaśikhāmaṇīnāṃ salilānāmākaraiḥ kamanīyatarā niviḍataraśādvalaśyāmalimnā marakatamaṇimayīva samullasati vasumatī
4.p1.2
atha tatra sakalasāmantacakracūḍācumbitanikhilabhūmaṇḍalamaṇḍanāyitacaraṇakamalaparimalalampaṭībhavadbrahalavibudhajanavrātamādyadindindiramañjulaguñjitairmukharitaharidantarālo vilasitahimaśailaśṛṅgaskhalattuṅgagaṅgātaraṅgābhirāmatviṣā śaradbhrālivibhrājiśubhrāṃśuvarakiraṇakāntidviṣā caturudadhipāraśilpā yaśaḥsudhāpaṭalena paripāṇḍaritajagadaṇḍamaṇḍalo'navaratavidvaddrumadrohidāridryamādyaddvipoddāmadarpaughavidrāvaṇaprauḍhapañcānano mahāmahīruha iva dvijakulāyahitaḥ ṛturiva madhuriva sakalasumanaḥprasādano'pi himāṃśuriva sakalāsumanaḥprasādanaḥ samarācitopyamarācitaḥ sārvabhaumasaṃndhiṣu sakaleṣu sāmanteṣu vāṅmayeṣviva kāvyakalāpaḥ kāvyakalāpeṣviva dhvaniḥ dhvaniṣviva raso raseṣviva śṛṅgāraḥ sakalasahṛdayahṛdayaṃgamena mahimnā madhurimṇā ca sambhāvitaḥ sakalaśāstrasārāvagāhī navābasaphajāhī
4.p1.3
kadācit kutukākulatayā vividhasumanaḥsamūhasuṣamāsamāstaraṇasaṃbhāvitaviśvaṃbharāvalayamuparimiladalipuñjamañjulaguñjitairvandivṛndavadanavinirgatavibudhaviṭapivijayavirudāvalībhirivānatakandharairasaṃkhyairavanīruhaiḥ kaṭhinakarakaranikarasaṃtrāsata: śaraṇāgatairiva timirakuṭumberambunikurumbairāpūritābhirvāpībhiśca manoharamekīkṛtamiva trailokyalakṣmīlāvaṇyaṃ niśātopavanaṃ praviśadbhirvāṅmanasavatmātivartipuñjīkṛtasakalakusumasaukumāryasāramayairavayavaiḥ svayamanaṅgeneva nirmitābhiḥ bhṛśaṃ nayananipātasthānībhavadaṅgībhistanutaratanucchāyādanturitavanāntarābhirnikaṣaśilātalollikhitābhiriva kāñcanarekhābhiḥ niviḍataranīlapayodabhrameṇāgatābhiriva saudāminībhirdaravikasitaradanamaṇikiraṇasaraṇisamāpyāyitacakorībhiruparivibhrāmyamāṇenāpi svato nīrājitātmaneva praphullakamalena rājitakarakisalayābhirdūrādunmuktapāyoruhāṇāmunmukhaṃ dhāvatāmunmattamadhuvratānāmālibhirākulīkṛtābhiḥ kābhirapi kiṃciduccapariṇataphalagrahaṇalālasātijṛmbhībhavatkucataṭasamāpatatpriyanayanasaṃkocitena connamitaparāvartitabhujalatābhiranyābhiḥ karakamalakalimukuramaṇḍalapratibimbitapriyavadanacumbanamukulīkṛtādharābhiḥ kābhirapi gāyantībhiḥ sārikāvalivṛthāṅgulīkampasampāditavīṇāgītabhramābhiraṅganābhiranaṅgaḥ samullāsayāmbabhūve taṃ ca guṇānāṃ parasparasaṃsargajanitagurugarvanirvāsanāya vidhinā nirmitamiva sabhāmaṇḍalaṃ
4.p1.4
paramasaundaryasundarīkaraṇalālitalocanalobhanīyamūrtti tāścānaṅgasarvasvāyamānarūpayauvanaśālinīravadhīnābhirāmatāguṇasya nidānāni prathamarasasyāgocaraṃ kavigavīnāṃ tacca nikhilajananayananirmāṇasāphalyamiva vanamālokya caṇḍīśakaratāṇḍavitacaṇḍadaṇḍāhatikhaṇḍakṛtakoṭikoṭirakoṭibhirdharaṇītaladhūlidhavalībhavadaṣṭāṅgābhirāmaiḥ pitāmahādibhiramaranikaraiḥ sevitaṃ bhagavantamamareśvarākhyaṃ sadāśivamarcayitumāyātaḥ kaśmīramaṇḍalamākhaṇḍalo nayanasāhasravikṛtīkṛtānanamātmānaṃ sukṛtiparamparopabhogyāstridaśataruṇīrniśātopavanāpahṛtaramaṇīyatayā nijanayanānāmanandanaṃ nandanaṃ ca nāti bahu mene atha sakalalokanistāravistāritamahopakāraparamparāparādhīnamānasena pratidinamudyadanavadyahṛdyagadyapadyādyanekavidyāvidyotitāntaḥkaraṇaiḥ kavibhirupāsyamānena kṛtayugīkṛtakalikālena kumatitṛṇajālasamācchāditavedavanamārgavilokanāya samuddīpisattarkadahanajvālājālena mūrttimateva navābāsaphakhānamanaḥprasādena dvijakulasevāhevākivāṅmanaḥkāyena māthurakulasamudrendunā rāyamukundenādiṣṭena śrīsārvabhaumasāhijahānaprasādādhigatapaṇḍitarāyapadavīvirājitena tailaṅgakulāvataṃsena paṇḍitajagannāthenāsaphavilāsākhyeyamākhyāyikā niramīyata | seyamanugraheṇa sahṛdayānāmanudinamullasitā bhavatāt iti śrītailaṅgaveṅgināṭīyakulodbhavaśrīpaṇḍitarājajagannāthaviracitā ākhyāyikā samāptā
Linked texts (1)
- Āsaphavilāsa — Jagannātha Paṇḍitarāja, Sanskrit