Candrapidacaritra p6
Candrāpīḍacaritra p6
- Language
- Sanskrit
p6
asti vindhyāṭavyāṃ padmasarasaḥ paścime tīre mahān jīrṇaḥ śālmalīvṛkṣaḥ | tasya koṭare nivasanaḥ piturahamevaikaḥ sūnurabhavam | mamaiva jāyamānasya prasavavedanayā jananī me lokāntaramagamat | matsaṃvardhanaparastāto'pi kālavaśāt śabarahastagato'bhavat || tadā kṣutpipāsāturaṃ bhūmau nipatya viceṣṭamānaṃ māmupādāya, snānārthamāgataḥ, bhagavato jābālestanayaḥ, hārīto nāma tāpasakumāraḥ, nātidūravartinamāśramamanayat | tatra sakutūhalaiḥ sarvairmunikumārairahamahamikāsammānītena nīvārakaṇanikareṇa phalarasena copacaryamāṇaṃ māṃ vilokya, bhagavān jābālirnāma maharṣiḥ, divyena cakṣuṣā madvṛttamavagatya, kiṃcidiva kṛtasmitaḥ 'svasyaivāvinayasya phalamanenānubhūyate' ityavocat || śrutaitat, sarve tāpasāḥ tamevaṃ vyajijñapan—'bhagavan ! āvedyatām—yadanena kṛtamaparasmin janmani | ko'yamabhūt ? bhaviṣyati ca ?' iti | ityevamuktaḥ sa mahāmunistānavādīt— "śrūyatāṃ yadi kutūhalam || āsīdujjayinyāṃ tārāpīḍo nāma rājā | sa ca rājalakṣmīlīlopadhānena bāhunā saptadvīpavalayāṃ vasuṃdharā vijitya, śukanāsanāmni mantriṇi rājyabhāramāropya, sukhamuvāsa || bhūyasāpi kālena sutamukhadarśanasukhamalabhamānaḥ, kadāciccarame yāminīyāme svapne sakalāntaḥpurapradhānabhūtāyā vilāsavatyā vadane sakalakalāparipūrṇamaṇḍalaṃ śaśinaṃ praviśantamadrākṣīt | tasminneva kṣaṇe samāhūya śukanāsāya taṃ svapnamakathayat | sa taṃ.samupajātaharṣaḥ pratyuvāca — 'deva ! saṃpannāḥ sucirādasmāka prajānāṃ ca manorathāḥ | katipayairevāhnobhirasaṃdehamanubhavati svāmī sutamukhakamalāvalokanasukham | adya khalu mayāpi svapne divyākṛtinā dvijena vikacaṃ puṇḍarīkamutsaṅgaṃ devyā manoramāyā nihitaṃ dṛṣṭam | avitathaphalāśca prāyo niśāvasānasamayadṛṣṭā bhavanti svapnā ' iti
Linked texts (1)
- Kādambarīsaṅgraha — M. R. V. Krishnamachari, Sanskrit