Jivananda 4.1.p1

4.1.p1

aho pamādo | rāasamīvaṃ gamissaṃ ti mahāṇasasamīvaṃ gado mhi
ado evva taha vattulataṇuaragodhūmāpūvasaṃhitasarāvehiṃ māhisadahimaṇḍamissidamāsaviraiabhakkhavisesaṇibiḍiabhāaṇehiṃ paritattambarisabhajjidacaṇaacaapūriapiṇḍaehiṃ phāṇiasaṃkaliajavadhāṇāsamullasidavisālāmattehiṃ duddhadahisakkarāsalilabhāvidavivihapithuarāsisaṃpuṇṇavisaṅkaḍacasaavisesehiṃ malliamuulapuñjadhavalasālitaṇḍulannasamuccaavirājidatammamaabhāṇḍagaṇabbhantaraṭṭhāvidasuvaṇṇasavaṇṇasūpaṇihāṇapiṭharehiṃ
kittaparivakkavantākakāraillapaḍolakosātaīṇippāvarāamāsakadalīpaṇasakubbhaṇḍappamuhasalāṭukhaṇḍamayaśākaṣaṇḍamaṇḍidabahuvidhabhāaṇavisesehiṃ
a parisohamāṇassa mahāṇasassa visamaro gandho | ghumaghumāadi me
ṇāsābilam | silasilāadi tālurasaṇāmūle suṇiggattaraṃ lālājalam
pajjaladivva haṇūmantavālaggalaggaggisihāgahidagharaparamparaṃ laṅkāuraṃ via
bubhukkhāuraṃ me udaram | (kiṃcitpurato vilokya |) iha khu mahāṇasaduvāradese avaṇadapuvvakāo viloīadi culhipāvaapajjalaṇatthaphukkārapavaṇavikkiṇṇabhasidalesapuñjadhūsaramukho ṇiḍiladīsantaviralasedambukaṇio karaṅgulīlagagahiṅguparimalasaṃtappidasamīvagadajaṇaghāṇendio īsasaṃkamideṅgālalañchidaparidhāṇapaḍo dakkhiṇakaraggahīdadavvīsiharataṇutaradīsantavilosiasāapāavappho aṇṇakaralambitendhaṇasaalo bhaddamuho
ṇāma paurogavo | tā eṇaṃ evva pucchāmi | ae bhaddamuha, tue pakkesu
bhakkhavisesu kiṃ vi kiṃ vi maha hatthe dādavvaṃ jaṃ bhakkhia edaṃ
suṭṭhu edaṃ ṇetti viāria kahemi jaṃ suṭṭhu taṃ parivesia raṇṇo
hatthādo pāritosiaṃ geṇhadu bhavaṃ | (sāmarṣam |) kahaṃ eso dāsīeputto 'jai tuha bubhukkhā tado raṇṇo samīpaṃ gadua bhoaṇaṃ dādavvaṃ ti
puccha | ahaṃ udaraṃbhariṇo tuha kiṃ vi ṇa dāissaṃ' ti bhaṇia mahāṇasabbhantaraṃ gado | hodu | rājasamīpaṃ gamissam | (iti parikramyāvalokya ca |) kahaṃ ettha rājasamīve viaṇe alagaddeṇa giṇhia bilaṃ
pavesido maṇḍūo via kiṃ vi aṇakkharaṃ palavanto amacco vedhaveo ciṭṭhai | tā samaaṃ paḍivālaissam | (iti tiṣṭhati |) (ka)