Jivanandanataka (Anandaramamakhin) 3
Jīvānandanāṭaka (Ānandarāmamakhin) 3
- Language
- Sanskrit
Contents
3.1
iti dvitīyo'ṅkaḥ
tṛtīyo'ṅkaḥ
(tataḥ praviśati paścādbaddhaṃ puruṣaṃ kiṅkareṇa vikarṣan vicāro nāgarikaḥ |)
nāgarikaḥ—aṅga gada, kastvamasi
puruṣaḥ—(svagatam |) kimahamaṃ jñāto'smyanena gada iti
nāgarikaḥ—kiṃ vicārayasi | yadi satyaṃ gado'si tato mokṣyase
puruṣaḥ—(svagatam |) nāhamanena jñātaḥ
bibhrāṇo bhujabāhuvakṣasi kṛtaṃ puṇḍratrayaṃ bhasmanā
hastopāttaviśuddhatāmrakalaśo rudrākṣamālī gale
dhṛtvā vaidikaveṣamāviśamiha svasvāminā prerito
dṛdrogo'hamareravekṣitumanā jīvasya rājñaḥ sthitim
3.2
anantaramanena nāgarikeṇa saṃyamitaḥ | bhavatu | evaṃ bravīmi | (prakāśam |)
ārye, muñca mām | vipraścikanāmamupajīvyedaṃ jaṭharahatakaṃ puṣṇāmi
nāgarikaḥ—astvetat | kuto rātrisaṃcāraḥ
puruṣaḥ—yasyakasyacidyatkiṃcidbhāviphalamuktvā pāritoṣikaṃ gṛhāmīti
nāgarikaḥ—kiṃ divasaste tatkarmaṇo na paryāptaḥ
puruṣaḥ—bāḍham | śrūyatām
yāmo yātyavilambitaṃ dinamukhe snānādibhiḥ karmabhiḥ
paścādbhikṣitumārabhe pratidinaṃ dhānyāni vā taṇḍulān | .
tairannādyupapādya dhūrjaṭimukhāndevānnivedyātithīnsaṃtarpyāścata eva yāti divasaḥ śeṣaḥ kutaḥ saṃcaraḥ
3.3
kiṃkaraḥ—aye, yuktamidam | iha tu yāmādūrdhvaṃ rudhyate nagarasaṃcāraḥ
puruṣaḥ—yadīdānīṃ yāmādūrdhvaṃ kālastarhi na saṃcarāmi svapsyāmi
kiṃkaraḥ—kutra nidrāsthānam
puruṣaḥ—dharmaśālāyām
nāgarikaḥ—kimidaṃ rājamandiraṃ tava dharmaśālā | atra hi
noṃkāraḥ pluvate na gītiraṭati svāheti na śrūyate
na nyāyavyavahāratāravacasaḥ saṃghībhavanti dvijāḥ
nātyuccaiḥ pṛṣadājyahoma surabhirdhūbhyā jarīmṛmbhate
bhaktāḥ pañcajanāḥ svapanti parito na strī kumāro na ca
3.3.p1
puruṣaḥ—astvidaṃ rājamandiraṃ tathāpi supraveśamasmatsadṛśāmiti śrutamasti
nāgarikaḥ—supraveśamiti kasmāttvayā śrutam
puruṣaḥ—āryamiśrebhya eva
nāgarikaḥ—hanta, kimasmābhiridaṃ kathitam
puruṣaḥ—nahi nahi | anyajanaiḥ
nāgarikaḥ—kaiste kathitam | yadidaṃ paricitajanasyāpi rājaśāsanamantareṇa duṣpraveśam, kiṃ punaraparicitasya te
kiṃkaraḥ—visaṃsthulevāsya vacanavyaktiḥ gṛhīta iva corastarakatārakavilocanaḥ paśyannayaṃ vaktuṃ na śaktaḥ pratyuttaraṃ tataścara iva lakṣyate
nāgarikaḥ—tarhi śikṣayatu bhavānimam
kiṃkaraḥ—are, kathaya tathyam | mṛṣāvādinastava vaidikatā rājaśāsanasya na virodhinī | (iti kaśāmudyacchati |)
puruṣaḥ—mā tāḍaya | tathyaṃ vadāmi
nāgarikaḥ—yadi tathyaṃ vadasi tadā vijñānamantriṇaṃ darśayitvā saṃbhāvayiṣyāmi
kiṃkaraḥ—pratīhāryā dhāraṇayā saha prāsādamadhirūḍho mantrī | tatsaṃnidhau tvamapi neṣyase
puruṣaḥ—(svagatam |) tathā cenmama durlabhameva jīvitam | (prakāśaṃ bhītimabhinīya |) abhayaṃ me dīyatāṃ yadi tathyameva śrotavyam | (iti praṇamati |)
nāgarikaḥ—dattabhayo'si | kathayātmānam
puruṣaḥ—(utthāya prāñjaliḥ |) hṛdrogo'smi | visṛja māṃ dayayā
nāgarikaḥ—cāra evāyaṃ vaidikaveṣamavalambyāgato dattābhayaśca
kiṃkaraḥ—tarhi kiṃ kartavyam
nāgarikaḥ—'sarvamidaṃ rājakāryaṃ tvayā kasmaicidapi na kathanīyam'
iti śapathaṃ gṛhītvā purādbahirvisṛjyatām | athavā kimanena varākeṇa
kathanīyam | dattābhayo'yamiti mantriṇe nivedya kathaṃcinmocayitavyaḥ
kiṃkaraḥ—tathā karomi | (iti niṣkrāntaḥ |)
3.3.p2
nepathye kukkuṭadhvaniḥ
3.3.p3
nāgarikaḥ—(ākarṇya |) kathaṃ rajanīvirāmaḥ
3.3.p4
punarnepathye
3.4
vaitālikaḥ—
patyāvastaṃ vrajati vigalaccañcarīkāñjanāśrutrāsānmlānekṣaṇadṛśamito rāgamakaikrameṇa
drāgāliṅgedapi kumudinīmityapanyāyaśaṅkī
kūkkrūśabdaṃ visṛjati javātkukkuṭaḥ pūrvameva
3.5
dvitīyo vaitālikaḥ—
rāgaṃ mukhena daradarśitatārakeṇa
māṃ vyañjatīmapi sametya kareṇa gāḍham
āliṅgyate kumudinīti ruṣāparārdriṃ
yātāṃ niśāṃ drutamasuvrajatīva candraḥ
3.6
api ca
prātarjātamiti drutaṃ praśithilaṃ baddhvā dukūlaṃ dṛḍhaṃ
dhammillaṃ cyutamālyamapyupavanānnirgatvarīrittvarīḥ
ākṛṣṭāṃśukapallave kaṭhinayorāliṅgya vakṣojayorāghrāyānanapaṅkaje ca kathamapyujjhantyaho kāminaḥ
3.7
nāgarikaḥ—tadadhunā rājakārye cāvahitastiṣṭhāmi| (iti niṣkrāntaḥ|)
śuddhaviṣkambhakaḥ
(tataḥ praviśati prāsādādhirūḍhaḥ pratīhāryā dhāraṇayā darśitamārgo mantrī |)
mantrī—saṃprati hi
sopānāni hiraṇmayāni paritaḥ pratyuptaratnānyahaṃ
pādābhyāṃ samatītya kiṃkaragaṇālambī svayaṃ pāṇinā
bhittiṣvālikhitairvṛtaṃ khagamṛgastrīpuṃsavṛkṣācalairārukṣaṃ naṭilākṣaśailadhavalaṃ prāsādamabhraṃliham
3.8
(vicintya svagatam |) aho durantatā rājadharmā̍ṇām
ātmānaṃ parirakṣya duṣkaratapovṛddhadvijārādhanairdīnīyeṣu ca bhaktipūrvamasakṛddānapradānairapi
daṇḍaṃ daṇḍayitavyamātraviṣayaṃ kṛtvā dharitrītale
rājñā dharmapathe matiṃ kramayatā saṃrakṣitavyāḥ prajāḥ
3.9
kiṃ bahunā
svaśreyasārthaṃ yatate'niśaṃ yo rājñā kilānena pṛthagvimarśaḥ
svasminnamātyeṣu suhṛtsu rāṣṭre durgeṣu koṣeṣu baleṣu kāryaḥ
3.10
nirjñātasarvatantreṣu vigūḍhāmovamantreṣu mantriṣu vinyastasamastakāryabharasya tu
rājño niścintataiva | paraṃtu teṣāṃ vyākṛpyante durantayā cintayā hṛdayāni
sāmantāvinameyurityupacayaḥ kopasya siddhyediti
sthāneṣu dviṣatāṃ sthitīrapi carāḥ paśyeyurāptā iti
syādāyopagamo yatheti vibhavaistuṣṭāḥ pravīrā bhaṭā
varteranniti mā malimlucagaṇādbhūrudvijeteti ca
3.11
ahamapi rājñā vinyastasamastakāryabhāratayā yatsatyaṃ vyākula eva
tathā hi
kāryeṣūkteṣu rājñā katicidapi mayā sādhitānyeva pūrvaṃ
sādhiṣyante parastātkaticana katiciccāpi sādhyanta eva
kiṃcānukteṣu sadyaḥ kimapi kila kuśāgrīyayātmīyabuddhyā
paryālocyaiva tattatsamayasamucitaṃ kartumutkaṇṭhito'smi
3.11.p1
ata eva sarvatra tatratatra vyāpṛte mayā puraguptyai matsadṛśa eva ko'pi
viniyukto vicāranāmā nāgarikaḥ | tatprakṛtakārye vyāpṛtavyam | kaḥ ko'tra bhoḥ
3.11.p2
praviśya
3.12
dauvārikaḥ—vijayatāṃ devaḥ
mantrī—bhadra, madvacanenānuśāsanīyāḥ paurā nagaralaṃkārāya
ālimpantāṃ sudhābhiḥ purasadanagatā bhittayo bhṛtyavargai
rambhāstambhāḥ kriyantāṃ kapiśaphalabhṛtaḥ pārśvayordvārabhūmeḥ
badhyantāṃ toraṇāni śritanavamaṇibhirdāmabhiḥ santu rathyāḥ
saṃsṛṣṭāścāmbusiktāḥ pratigṛhamupari grathyatāṃ ketanālī
3.13
yataḥ saṃpratyeva siddhapratijño rājā samāgamiṣyati
dauvārikaḥ—yadājñāpayatyāryaḥ | (iti niṣkrāntaḥ |)
mantrī—(saddaṣṭikṣepaṃ paritṛtyāvalokya ca |) aho ripūṇāṃ purāvaskandanaprakāraḥ | tathā hi | pāṇḍunā preritā rogāḥ,
mūrdhānaṃ vyāptukāmāḥ śatamatha navatirlocane cādhicittvā
nāsāmaṣṭādaśāsyaṃ khalu caturadhikā saptatirhṛcca pañca
vakṣojau pañca śūlaiḥ saha samagaṇanaiḥ kukṣimaṣṭau ca gulmāḥ
sārdhasthānānyupetaṃ triguṇagaṇanayā pañcakaṃ ca vraṇānām
3.14
atha ca svayameva mantribhūtasya yuvarājasya pāṇḍoḥ puroparodhavaicitrī
vācāmativartate panthānam | (sāmarṣaṃ sāvahityaṃ cākāśe |) sādhu mantridhurīṇa,
sādhu | anayā guptaprayogaprakāragauravayā dhiṣaṇayā śauryeṇa ca daityaguruṃ
vṛṣaparvāṇaṃ cādhiśeṣe | (sopahāsam !) mayi- (ityardhokte viramati |)
dhāraṇā—(sasmitam |) amaccassa vākyaseseṇa takkīadi dhīrodattattaṇam | (ka)
amātyaḥ—askhalitāsādhāraṇakāryāvadhāraṇadhaureyaskhalitāni tava manīṣitāni bhavanti | (iti puro vilokya |) aho nagarālaṃkāracāturī paurāṇām
kīrṇānyambupṛṣanti kiṃkaragaṇairabhyantare tāḍitānyātodyāni niketakeka carry out here:
niketakekinaṭanaprārambhamūlāni ca
baddhā mandiramārgasīmasu hasannāthāpanītāṃśukavyaktorojasalajjasiddhayuvativyākṛṣṭaceladhvajāḥ
3.15
api ca
manye rambhāḥ puramṛgadṛśāmūrusaubhāgyacauryāddhṛddhā bhṛtyaiḥ pratigṛhamapi dvārapārśvadvayeṣu
ambhogārtkathamapi hṛtā yantritoccairvitāne
tāsāṃ vaktrāmbujaparimalagrāhiṇī padmamālā
3.16
kiṃ ca | sudhālepadhavalīkṛtasaudhavasatayaḥ paurayuvatayaḥ śāradābhragataparamādbhutataḍillatāvibhramamudbhāvayanti | kiṃ ca, cañcarīkagaṇaścitralikhitasahakāramañjarīkalitotkalikayā saṃcaramāṇo'pi kadaryamavanīpatimupagato vanīpakaloka iva niṣphala eva nivartate | katicana niketanāni ca nūtanālikṣitenāhinakulenāśvamahiṣeṇa govyāghreṇa ca bhittiṣu nirvairasattvānyanukurvanti
catvarāṇi tapodhanāśramapadasya | (anyato'valokya sahākam |)
dṛṣṭvākṛṣṭakacāmudastacibukāṃ patyā karābhyāṃ balātkāmapyeṇadṛśaṃ karau vidhuvatīmāsvādyamānādharām
ālekhye puraśilpinā viracitāṃ bhittau bahirmandirānnāryaḥ sasmitanamravakrakamalāḥ karṣanti yūnāṃ manaḥ
3.17
nanvidānīmatra nagaralaṃkāradarśino rājñaḥ samāgamaṃ pratīkṣamāṇāḥ paurāstasya paramupacārāya saṃnahyanti | tathā hi
sthāpyante gṛhavāsavediṣu ghaṭāḥ saṃveṣṭitāstantubhiḥ
pratyagrāmradalaprasādhitamukhā vipraiḥ payaḥpūritāḥ
kanyābhirghṛtasiktavartinikarairnīrājanābhājanaiḥ
sādhyante samameva lājasumanaścitrāṇi pātrāṇi ca
3.17.p1
(vicintya |) kathamasau rājā lipsitaṃ phalaṃ labdhvā samāyāsyati | kathamasya sāmbaśivaprasādamantareṇa lipsitaphalalābhaḥ | kathaṃ vā kaṭhorāṇi tapāṃsi vinānena sulabhaḥ śivaprasādaḥ | kathamanena svakālavikasvaraśirīṣadalakomalaśarīreṇa sukarā kaṭhorā tapaścaryā | na caitasya tādṛśatapaścaraṇādṛte'khilapuruṣārthasādhanaṃ bhagavataścandrakalāvartasasya nirantaradhyānaṃ saṃbhāvyate
nalinīdalāntarālataralodabindusamasyandā durnirodhā hi cittavṛttayaḥ | tadidānīṃ madīyamāntaḥkaraṇaṃ durantacintodadhau nimajya punarunmajjati | athavā
kasya kimasaṃbhāvitamanukūlatāmupagate daive | (dakṣiṇabhujaspandamabhinīya |) kathamasthāne mama vicāraḥ | sarvaṃ sughaṭitaṃ bhaviṣyati
3.17.p2
nepathye
3.18
vaitālikaḥvātaṃ prāvṛṣikaṃ nirudhya sahasā gātraprakampapradaṃ
saṃphullāni vidhāya cārukamalānyāsādya haṃsāgamam
diṣṭyā labdhavatā prasādamadhikaṃ vāpījalādhārayoḥ
sadyaḥ śāradavāsareṇa dhavalo megho'mbaraṃ prāpitaḥ
3.18.p1
mantrī—(śrutvā saharṣam |) samadyuta (?) prāṇanirodhena nirdhūtasakalatapovighnena viśuddhādvaitajñānasādhanena samārādhitayordhūrjaṭidhararājakanyayoḥ prasādena
rājñā raso hastagataḥ kṛta ityanena vaitālikavacanena sūcyate
3.18.p2
punarnepathye
3.19
diṅmaṇḍalasya vimalīkaraṇe pravīṇānni̱rvighnamutsṛjati nīrajabandhuraṃśūn
paṅkaśca pānthapadayogamamṛṣyamāṇaḥ
saṃśoṣametya śakalībhavati kṣaṇena
3.20
mantrīḥ—(śrutvā |) etenāpi vacasā nirogīkaraṇasamarthānrasānprayoktuṃ
rājñastasya ca yakṣmahatakasya vinaśituṃ prāptaḥ kālo'yamiti ca sūcyate
(sabahumānam |) sādhu re vaitālika, sādhu | yadadhunā gūḍhābhiprāyeṇa bhavatā
bodhitavyaṃ bodhitam | tadeva vṛttaṃ saprakāramavagamayituṃ rājānaṃ pratyudgamanena
bahumantuṃ ca tatraiva gacchāmi | (ityutthāya ākāśe |) are yakṣmahataka, bhavadīyamataḥparaṃ paśyāmi śauṇḍīryam | (puro vilokya |) kathamāgata eva devaḥ
yato devī puromārgapradarśinī puro dṛśyate | yaiṣā
dhammille ghanasaṃnibhe sitataḍidvalyeva mallisrajā
vakrendo rucireṇa nābhitilakavyājātkalaṅkena ca
hāreṇa stanakokayorapi bisasvacchena cāyāminā
pādāmbhoruhayośca haṃsakayugeṇārāviṇā rājate
3.21
ayamapi mahārājastasyā anupadmāgacchati | saṃprati hi etasya
vicāravigamādidaṃ vilasati prasannaṃ mukhaṃ
gṛhītasuṣamaṃ himavyapagamādivāmbhoruham
viṣāṇina iva pratidviradadarśanāmarṣiṇo
gatiśca kila medinīṃ namayatīva dhīroddhatā
3.21.p1
tataḥ praviśati jīvo buddhiśca
3.22
jīvaḥ—aho śrutismṛtivihitānāṃ karmaṇāṃ prabhāvaḥ | yāni mayā
samayeṣu samanuṣṭhitāni madīyamāntaḥkaraṇamaśodhayan | śodhite ca tasminmagavaddraktirnāma kāpi kalpalatā prathamamaṅkuritā paścādupacitaparicayā ca sā
mama hṛdayānurañjanī krameṇa bhagavantau parameśvarau sākṣāddarśitavatī | anitarasādhāraṇayā ca tayā prasannau bhagavantau saṃpratyabhilaṣitānarasagandhakādīnprasādīkṛtyārpitavantau | agre'pi tasyā eva mahimnā sakalamapyabhilaṣitaṃ pumarthaṃ
lapsyāmahe
buddhiḥ—ajjautta, kiṃ ede rasagandhaā aṇṇaṇivvekkhā saaṃ jevva
vibakkhakkhavaṇaṃ ṇivvahanti | (ka)
rājā—devi, divyopadhībhiḥ śodhitāḥ santo vividharasāyanadvārā uktasāmarthyā hyete
devī—tā evvaṃ saṃvihāṇasamattheṇa keṇa vi hodavvam | (kha)
rājā—vijñānaśarmaivātra nirvoḍhā | yataḥ
ṛṣireva vijānāti dravyasaṃyogajaṃ guṇam
vijñānaśarmaṇaḥ ko'nyaḥ sarvajñānanidhirrṣaṣiḥ
3.23
kiṃ ca
maheśatejaḥsaṃbhūto rasaḥ kāruṇikāgraṇīḥ
yaḥ svaniṣṭhamurarīkṛtya parapīr̤āṃ vyapohati
3.24
taduktam—
'mūrcchitvā harati rujaṃ bandhanamanubhūya muktido bhavati
amarīkaroti hi mṛtaḥ ko'nyaḥ karuṇākaraḥ sūtāt
3.25
'
'suragurugodvijahaṃsāpāyakalāpodbhavaṃ kilāsādhyam
śvitraṃ mahadapi śamayati ko'nyastasmātpavitrataraḥ
3.26
'
gandhakasyāpi māhātmyamuktam—
'ye guṇāḥ pārade proktāste guṇāḥ santi gandhake
śuddho gandho haredrogānkuṣṭhamṛtyujarādikān
agnikārī mahānuṣṇo vīryavṛddhiṃ karoti ca
3.27
'
kiṃ ca pratidinaṃ niṣevyamāṇairataiḥ priyaratīnāṃ yuvatīnāmanabhimatānāṃ
puṃsāṃ jarāmuparudhya tāsāmabhimite yauvane teṣāṃ sthāpanaṃ bhavati
devī—(salajaṃ sahaṣṭikṣepaṃ ca |) saṃpatto eso viṇṇāṇaṇāmaheo amacco
tāṃ ṇammālāvassa ṇa eso samao | (ka)
rājā—(vilokya |) aye, mantrivṛhaspatiḥ saṃprāptaḥ | (sānuśayam |)
kartavyo vidhiritthamityamiti māmuktvā jigīṣudvipaṃ
svasyaivopari rājyatantramakhilaṃ draṣṭavyamāsajya ca
adyedaṃ kriyate kariṣyata idaṃ paścādakāri tvidaṃ
prāgeveti durantayā kṛśatanaṃ paśyāmyamuṃ cintayā
3.28
etadanujñayaiva nirvicāramānasena mayā kṛtaṃ bhagavadārādhanam
mantrī—(upasṛtya |) svasti saphalamanorathābhyāṃ svāmibhyām
jīvaḥ—bhavatsāhāyyamevātra hetuḥ
buddhiḥ—evamappamatteṇa cittavāvāreṇa sahāyattaṇaṃ kuṇanto dīhāū
hoi | (kha)
rājā—atra niṣīdatu bhavān
mantrī—(upaviśya |) nirvighnena kāryasiddhirrjāteti manorathānāmupari vartāmahe
rājā—tadeva vaktukāmo'smi
mantrī—avahito'smi
rājā—tvaduktamārgeṇa prathamaṃ padmāsanaṃ baddhvā tathaivopāviṣṭo'ham
śuddhāntaḥkaraṇena saṃtataparidhyālārkakoṭiprabhaprāleyadyutikoṭiśītalaśivārūḍhāṅkagaṅgādharaḥ
sānandāśrukaṇo dṛśoḥ sapulako gātreṣu sapraśrayastutyuktirvadane kṛtāñjalipuṭo mūrdhanyabhūvaṃ ciram
3.29
tadanu mayi prasādābhimukhaḥ prajvaladagniśikhākalāpakapilajaṭāmaṇḍalāṭavīviluṭhajjāhnavīcaravālahaṃsāyamānacandralekhaḥ kaṇṭhagatakālakūṭadyutiyamunobhayapārśvaniḥsarannirjharāyamāṇarudrākṣamālikaḥ parihitaśārdūlacarmasaṃdarśanabhītamiva mṛgamekaṃ saṃrakṣituṃ kare bibhrāṇaḥ karāntare ca praṇatajanaduradṛṣṭaśilābhañjanaṃ ṭaṅkaṃ ca kaṃcana bhagavānkāñcanagiridhanvā girikanyāsameto māmetadavocata—
dhyānena te prasanno'smi vṛṇīṣva varamarpaye
ityuktavantaṃ taṃ devamayāce rasagandhakān
3.30
tatastena dīyamānānrasagandhakānagrahīṣam | punaśca praṇamya sapraśrayamayāciṣam | devadeva,
phalinyaḥ phalahīnā yāḥ puṣpiṇyo yā apuṣpikāḥ
guruprasūtāstā muñcantvaṃhaso na iti śrutiḥ
3.31
yasmai dadāsi taṃ rugbhyaḥ sarvābhyaḥ pārayāmahe
iti somenauṣadhayaḥ saṃvadantīti ca śrutiḥ
3.32
ataḥ sarvāstāḥ siddhauṣadhayaḥ somāyattāḥ sa ca bhagavataḥ śirobhūṣaṇamatraiva saṃnihitaḥ | ataḥ
śodhayituṃ rasagandhānkartuṃ ca rasauṣadhāni vividhāni
divyauṣadhīśca sarvā dāpaya maulisthitena candreṇa
3.33
tataśca bhagavadājñayā tena somena sarvāstā mahyaṃ dattāḥ | (iti mantrihaste'rpayati |)
mantrī—(saharṣaṃ gṛhītvā dṛṣṭvā ca |) saptakañcukādidoṣanirākaraṇena śuddhānetānauṣadhībhiḥ saha śatrujayāya prayokṣyāmahe
devī—kittiā te sattūjaṇā kiṃvāmaheā a kassi samae purovarohaṃ
kidavanto | (ka)
mantrī—śrūyatāṃ tāvat
puṇḍarīkapuraṃ rājñi praviṣṭe randhralābhataḥ
svarājānujñayā pāṇḍurudhatsainikaiḥ puram
3.34
yakṣmahatakasyāṃssacchatrorbahavaḥ sainikāḥ
grahaṇyaramaryatīsāraśūlārśaḥpāṇḍukāmalāḥ
viṣūcikākuṣṭhagulmasaṃnipātajvarādayaḥ
3.35
devī—amacca, ettiaṃ purovarohasaṃrambhaṃ kuṇanteṇa sahasaiṇieṇa teṇa
jakkhahadaeṇa amhāṇaṃ kiṃ accāhidaṃ kādavvam | (ka)
mantrī—devi, purānniṣkramayitavyā vayamityeva tasya hatāśasya durāśābhiniveśaḥ
devī—aho aṇattaṇīṇattaṇaṃ jakkhahadaassa | jo amhesu purādo ṇikkantesu saaṃ kahiṃ ṭhāissaṃti appaṇo vi ṇāsaṃ ṇa gaṇedi | (kha)
mantrī—satyamuktaṃ devyā
mahāpātakasaṃbhūtestasya pāpasya yakṣmaṇaḥ
vairāyitamidaṃ citraṃ svavināśamapīcchataḥ
3.36
yaduktamabhiyuktaiḥ—
'apathyasevinaścaurā rājadāraratā api
jānanta eva svānarthamicchantyārabdhakarmataḥ
3.37
' iti
ye nighnanti nirarthakaṃ parahitaṃ te ke na jānīmahe
hyevaṃ yā samabhāṇi bhartṛhariṇā kāṣṭhā parā pāpinām
tāmetāmatiśete eṣa saparīvārasya nāśaṃ nijasyotpaśyannapi niṣkramāya yatate yo naḥ purātpātakī
3.37.p1
astyatra laukiko'pyābhāṇakaḥ—'svanāśācchedena śatroramaṅgalamāpādayatyanātmanīno mūrkhaḥ' iti
devī—tā kahiṃ dāṇiṃ ettiāṇaṃ rogāṇaṃ ṇiggaho suaro | (ka)
mantrī—devi, mā bhaiṣīḥ | nikhilaroganisargavairiṇi rase svādhīne kaḥ
śatrujaye saṃdehaḥ
rājā—tarhi kuto vilambyate
mantrī—ahaṃ punaradhunā rasamoṣadhībhiḥ saha saṃyojayituṃ gacchāmi | devenāpi viśramyatām
3.37.p2
iti niṣkrāntāḥ sarve
3.37.p3
iti tṛtīyo'ṅkaḥ
caturtho'ṅkaḥ
3.37.p4
tataḥ praviśati vidūṣakaḥ
Linked texts (3)
- Śrīkaṇṭhacarita — Maṅkha, Sanskrit
- Jīvānanda — Ānanda, Sanskrit
- Jīvānanda (Ānandarāya Adhvarin) — Ānandarāya Adhvarin, Sanskrit