Caitanyacandrodaya 10.14

10.14

tato jagadānandenolayoḥ pārśvayoḥ kadalīstambhapūrṇakumbhamukuladīpāvalībhiḥ suracanāviśeṣeṇa śivānandavāṭīparyantamabhimaṇḍitaṃ vartmārūḍhaḥ smitasumadhuravadano jagadānandakṛtamiti manyamāno vāme vāsudevavāṭīpathamapi
tathāvidhamālokya kimito'gre gantavyaṃ kimiti iti saṃdihāno vāsudevenoce
'bhagavan, agrataḥ śivānandavāṭīmevālaṃkuru' iti | tathā kurvāṇo jagadānandena
dhāritacaraṇāmbujastadīyabhagavadgṛhaṃ praviṣṭaḥ | anantaraṃ taccaraṇodakaṃ gṛhapaṭalopari kiṃcidvikīrya kiyadantaḥpure parijanebhyo jagadānandenaiva dattam
anantaraṃ muhūrtaṃ sthitvā vāsudevavāṭīmāgatya kṣaṇamavasthāya punastaraṇimaRUhya
calitavati bhagavati caraṇajalagrahaṇārthamākaṇṭhamagnānāṃ janānāṃ yadvaigryaṃ jātaṃ
tadavalokya bhagavatastathā karuṇā jātā yathā sarvaireva caraṇajalaṃ prāptamāsīt
tatastaṭavartmanaiva sarvalokāścalitā na ke'pi nivavṛtire
rājā—tatastataḥ
puruṣaḥ—tato'dvaitavāṭīmalyetya haridāsenābhivanditastathaiva taraṇivartmanā navadvīpasya pāre kuliyānāmagrāme mādhavadāsavāṭyāmuttīrṇavān | navadvīpalokānugrahahetoḥ saptadināni tatra sthitavān | tatra ca navadvīpātpāragamane
ya ātaraḥ kākiṇikaikamātra āsītprativyakti sa tu krameṇa
baṃhīyasīṣvapyatha nauṣu so'bhūtkārṣāpaṇānāmadhikādhiko'pi