Caitanyacandrodaya 10.4
Caitanyacandrodaya 10.4
- Language
- Sanskrit
10.4.1
strī—tado tado | (ga)
puruṣaḥ—tato daivāttasminkāle tatrāgatena bhagavaccaitanyapārṣadena śivānandena tamudantamatyantasaṃdihyamānatayāyadidṛkṣuṇā manasi kṛtam—'aho,
kimetasya darśanena, sākṣādeva mayā dṛṣṭo'sti bhagavān | tadālokasukhasadṛśaṃ kimasya darśanena bhaviṣyati sukham | naiva' iti nivartamānaina punarmanasi
kṛtam—'aho, yadyayaṃ sarvalokabahirvartamānaṃ māṃ svayamevāhūya svasamīpaṃ
nītvā māmakamiṣṭamantraṃ prakhyāpayati tadā satyamevātra tasyāveśo jātaḥ' iti
cintayitvā prasāriṇo janasamūhasya bahiḥ sthitavati śivānande yāvadāveśaṃ
tūṣṇīṃ sthito'pyasau 'kaḥ ko'tra bhoḥ, dūre vartamānaḥ śivānanda āhūyatām'
iti nideśamātreṇa dhāvadbhireva katibhiritastato nāmagrāhaṃ vicinvadbhiratidūre sthitaṃ tamādāya tannikaṭamāyayau | anantaraṃ ca tena 'śivānanda, bhavatā
manasi vicāritaṃ yat, tadākarṇyatāṃ bhavadīya iṣṭamantraścaturakṣaro gauragopāladevatākaḥ' ityākalayya tena nirṇītaṃ satyaiveyaṃ pratheti
strī-ajjautta, tīttao keriso | (ka)
puruṣaḥ- tṛtīyastu cintanamātrāvirbhāvo yaḥ so'pi śrūyatām- 'ekadā
tasyaiva śivānandasya bhāgineyaḥ śrīkānta ekaka eva prathamaṃ śrīpuruṣottamamāgatya bhagavaccaitanyacaraṇau dadarśa | asminneva samaye kautukavaśātpurīśvarasvarūpādisamakṣaṃ bhagavatā kiṃcijjagade jagadekabandhunā 'śrīkānta, asminnabde'dvaitādayo dayoddhurā vaktavyāste yathā nāyānti, mayaiva tatra gantavyam'
iti | api ca śivānando'pi bhagavanmātulo vaktavyaḥ pauṣe māsi tatropasannena mayā bhavitavyam, tatra jagadānando'sti tatraiva bhikṣā kartavyā' iti
10.4.2
nivṛttena śrīkāntena bhagavatsandeśe kathite sati sarve'dvaitādayaścalanodyamācchithilībabhūvuḥ | śivānandastu bhagavadāgamanamabhilaliśiṣurbha gavadbhikṣāyāmidaṃ
lagiṣyatīti kṛtvā bhagavatpriyatvena vāstūkavāstukadalīgarbhotthākaniśādisāmagrīsamavadhānāya sthitavān
strī-tado tado | (kha)
puruṣaḥ-tato daivādgodāvarītaḥ samāyātena rāmānandarāyeṇopabodhito
bhagavān na gantumīṣṭe
strī-tado tado | (ga)
puruṣaḥ-tato'sau śivānandaḥ śrīnṛsiṃhānandabrahmacārīti prathitaṃ paramayogīndraṃ sākṣānnṛsiṃhamiva pradyumnabrahmacāritvena pūrvakhyātāvapi bhagavataiva
nṛsiṃhopāsanāsiddhatvena nṛsiṃhānanda iti kāritasaṃjñaṃ samaye samuvāca —
'svāmin, āyāsyāmi' iti kṛtvā bhagavānnāyātaḥ | vāstūkaśākamavalokya
manoduḥkhameva jāyate
strī-tado tado | (ka)
puruṣaḥ-tatastenoktam | mayaivānetavyo dinadvayamapekṣatāmiti tatprabhāvajño'sau tathaiva śraddadhe | sa ca nṛsiṃhānando nṛsiṃhānando'pi taṃ samayamārabhya
samādhistho dinadvayāntare śivānandamāhūya 'aye, bhagavaccaitanyo rāghavālaye
samānīto'sti | prātaratrāgamiṣyati mayaiva paktavyaṃ bhikṣā ca dātavyā'
iti śrutvā tasminnapi tathodyukte sati svayamuṣasi kṛtasnānaḥ śucitaro
bhūtvā pāke pravṛttaḥ svecchāpūrvaṃ yatheṣṭameva pācitavān | anantaraṃ tasminneva
samaye śrīcaitanyasya jagannāthasya nṛsiṃhasya ca pṛthak trayo bhogā vibhajya
niṣpāditāḥ | anantaraṃ tattannāmnā samarpya bahirbhūya nimīlitacakṣurāntareṇa
cakṣuṣā paśyati trīneva bhogānaka eva bhagavānbhuṅkte | anantaraṃ saṃjātamahānando
10.4.3
galadaśrudhāraḥ sāravamuccaiḥ praṇayāmarṣakṛtākṣepamiva bhadraṃ bho bhadraṃ jagannāthena
saha tavaikyamato jagannāthasya bhogo bhujyatāṃ nāma, mama nṛsiṃhasya bhogaḥ
kathaṃ bhujyate, nṛsiṃho'dya mayāyamupoṣita ityuccairākrandañśivānandenoktam
svāmin, kathamākruśyate' iti
strī-tado tado | (kha)
puruṣaḥ-tatastenoktam 'tava gosvāminā caitanyena bhogatrayameva bhuktaṃ
nṛsiṃhasyopavāso jātaḥ' iti
strī-tado tado | (ga)
puruṣaḥ-tataḥ śivānandenoktam- 'svāmin, nṛsiṃhārthamanyā bhogasāmagrī kartavyeti | tathākṛte svastho babhūveti sthite śivānandasya saṃśayo jātaḥ
- 'kimanenāveśavaśādevoktamathavā satyameva' iti manasi kṛtvā punaranyasminsaṃvatsare puruṣottamamāsādya bhagavaccaitanyasavidhe gataḥ | prasaṅgato nṛsiṃhānandasya tanmahimakathane'vāntarabhūtā pākakriyā tasyātisamīcīnetyapi vadati
bhagavati sarveṣu saṃdihāneṣu mayā gate saṃvatsare pauṣe māsi tasya bhikṣā kṛtā
tatra tasya pākakauśalaṃ jñātamityukte punaḥ sarve saṃdigdhā eva sthitāḥ | śivānandastu niḥsaṃdeho babhūveti vyākhyātaste trividho'nugrahaprakāraḥ
strī—accariaṃ accariaṃ | tā edaṃ pi kahehi | rāmāṇandeṇa kahaṃ tattha
gantuṃ ṇiseho kido | (ka)
puruṣaḥ—priye, sa tāvadbhagavato'tipraṇayī tadvicchedaṃ na sahate | tena
taduparodhānmathurāṃ jigamiṣurapi varṣadvayamadya śva iti kṛtvā vilambito
bhagavān
strī—ado varaṃ etthajjeva vaṭṭissadi | athavā mahurāṃ gamissadi | (kha)
puruṣaḥ—priye, adhunā tu ciramanunīya tameva rāmānandaṃ tenānumataṃ
gauḍavartmanyeva gantumudyato'sti
strī—ajjautta, puṇo ettha āamissadi | (ga)
10.4.4
puruṣaḥ—atha kim
strī—ettha atthi saṃdeho | jado mahurā kkhu edassa piaṭṭhāṇaṃ | (gha)
puruṣaḥ—yadyapyevaṃ tathāpi
āpāāmaraṃ prāṇina uddhidhīrṣornīlācalendoratibhārametat
laghūkariṣyanpuruṣottamastho bhūyo'pi bhāvī puruṣottamo'yam
10.4.p1
strī—āṃ, hoi evaṃ hoi | (ṅa)
10.4.p2
nepathye
10.4.p3
bhaṭṭācārya, kathaṃ rāmānandenāsminkarmaṇi kṛtānumatiḥ
10.4.p4
puruṣaḥ—priye, śrutamidaṃ yadabhihitaṃ mayā tadevādhunā tadvicchedavidhuro
gajapatirapi sārvabhaumena saha saṃkathayannāste | tadāvāmapi bhagavantaṃ nīlācalacandraṃ gānenopasthātuṃ gacchāva | (iti niṣkrāntau |)
10.4.p5
praveśakaḥ
10.4.p6
tataḥ praviśatyāsanastho rājā sārvabhaumaśca