Caitanyacandrodaya 6.20

6.20

sārvabhaumabhaṭṭācāryaḥ—ācārya, sthīyatām
(gopīnāthācāryo'rdhaniṣkrānta eva mukundaṃ hastenākṛṣya pratyāvṛtyopaviśati |)
sārvabhaumabhaṭṭācāryaḥ—ācārya, amumālokya snehaśokatāralyaṃ jātam | nīlāmbaracakravartisaṃbandhādayamatīva snehāspadaṃ naḥ | alpīyasi vayasi
turīyāśramo gṛhītaḥ kathamanena | kastāvadasya mahāvākyopadeṣṭā
gopīnāthācāryaḥ—keśavabhāratī
sārvabhaumabhaṭṭācāryaḥ—hanta, kathamayaṃ bhāratīsaṃpradāye pravartitavānvā
gopīnāthācāryaḥ—nāsya tathā bāhyāpekṣā | kevalaṃ tyāga evādaraḥ
sārvabhaumabhaṭṭācāryaḥ—kiṃ tāvadvāhyam
gopīnāthācāryaḥ—saṃpradāyotkarṣādi
sārvabhaumabhaṭṭācāryaḥ—samīcīnaṃ nocyate | āśramamaujjvalyaṃ na
vāhyam
gopīnāthācāryaḥ—kevalaṃ gauravāyeti bāhyametat
sārvabhaumabhaṭṭācāryaḥ—gauraveṇa kimaparāddham | tanmayaivaṃ bhaṇyate bhadratarasāṃpradāyikabhikṣoḥ punaryogapaṭṭaṃ grāhayitvā vedāntaśravaṇenāyaṃ saṃskaraṇīyaḥ
gopīnāthācāryaḥ—( sāsūyamiva | ) bhaṭṭācārya, na jñāyate'sya mahimā
bhavadbhiḥ | mayā tu yadyaddaṣṭamasti tenānumitamayamadhīśvara eveti
mukundaḥ—( svagatam | ) sādhu bho ācārya, sādhu | dagdhaṃ me jīvitaṃ
nirvāpitamasti bhavatā
śiṣyāḥ—kena pramāṇeneśvaro'yamiti jñātaṃ bhavatā
gopīnāthācāryaḥ—bhagavadanugrahajanyajñānaviśeṣeṇa hyalaukikena pramāṇena | bhagavattattvaṃ laukikena pramāṇe pramātuṃ na śakyate alaukikatvāt
śiṣyāḥ—nāyaṃ śāstrārthaḥ | anumānena na kathamīśvaraḥ sādhyate
gopīnāthācāryaḥ—īśvarastena sādhyatāṃ nāma | na khalu tattattvaṃ
sādhayituṃ śakyate | tattu tadanugrahajanyajñānenaiva tasya pramākaraṇatvāt
śiṣyāḥ—kva dṛṣṭaṃ tasya pramākaraṇatvam
gopīnāthācāryaḥ—purāṇavākya eva
śiṣyāḥ—paṭhyatām
gopīnāthācāryaḥ—
athāpi te deva padāmbujadvayaprasādaleśānugṛhīta eva hi
jānāti tattvaṃ bhagavanmahimno na cānya eko'pi ciraṃ vicinvan