Caitanyacandrodaya 8.2
Caitanyacandrodaya 8.2
- Language
- Sanskrit
8.2
tathāpi
kati na vihitaṃ stotraṃ kākuḥ katīha na kalpitā
kati na racitaṃ prāṇatyāgādikaṃ bhayadarśanam
kati na ruditaṃ dhṛtvā pādau tathāpi sa jagmivānprakṛtimahatāṃ tulyau syātāmanugrahanigrahau
8.2.p1
rājā—(sotkaṇṭham |) punaratrāgamiṣyanti
bhaṭṭācāryaḥ—atha kim | saṅginastvatra vartante
rājā—kathamekākī calitaḥ
bhaṭṭācāryaḥ—tādṛśaḥ kathamekākī | tathāpi mayā samīcīnā viprāḥ
saṅge niyuktāḥ santi
rājā—kiyaddūraṃ tāvat
bhaṭṭācāryaḥ—godāvarīṃ yāvatte yāsyanti | bhagavāṃstu setubandhaparyantaṃ gamiṣyatītyanumīyate
rājā—brāhmaṇāstāvaddūraṃ kimu na preṣitāḥ
bhaṭṭācāryaḥ—tasyānanumateḥ | godāvarīparyantaṃ tu rāmānandānurodhātteṣāṃ saṅgo'ṅgīkṛtaḥ
rājā—kastāvattasyānurodhaḥ
bhaṭṭācāryaḥ—gantavyamiti niścaye kṛte mayoktaṃ godāvarītīre rāmānando vartate, so'vaśyamevānugrāhyaḥ
rājā—kathaṃ tasyedaṃ saubhāgyam
bhaṭṭācāryaḥ—mahārāja, sa khalu sahajavaiṣṇavo bhavati | pūrvamayamasmākamupahāsapātramāsīt | saṃprati bhagavadanugrahe jāte tanmahimajñatā
no jātā
rājā—śruto'sti mayā tvayi yādṛśastasyānugraho jātaḥ
bhaṭṭācāryaḥ—bhagavatprabhāvo hi svataḥ prakāśau
8.2.p2
praviśya
8.2.p3
dauvārikaḥ—bhaṭṭācārya, bhavatpreṣitā viprā godāvarīto nivartitā
bhavantaṃ pratīkṣante
bhaṭṭācāryaḥ—utkaṇṭhate rājā | praveśyantāmihaiva
dauvārikaḥ—yathājñāpayasi | (iti punastānādāya praviśati |)
bhaṭṭācāryaḥ—aho, āgacchatāgacchata
8.2.p4
viprā upasṛtya rājānamāśīrbhirabhyarcya sārvabhaumaṃ praṇamanti
8.2.p5
rājā—upaviśyāmūlaṃ kathayata
8.2.p6
sarve upaviśanti