Vikramarkacaritra 4.1

4.1

iti vikramāyāśiṣamavadat | āsthāya ca samucitamāsanamātmanaḥ kalāvaidagdhyamadarśayat | rājāpi paraṃ santuṣṭastaṃ vastrābharaṇādinā sambhāvya papraccha'bhoḥ kamalākara kutra kutra vyacaraḥ ? kiṃ kimadbhutamadrākṣīḥ' iti | kamalākaraḥ 'ahaṃ bahūndeśānvyacaram | pratyāgacchaṃśca kāñcīnagare'dbhutamekamapaśyam' iti prāha | tato rājani 'tatkim ? kathaya' iti pṛcchati sa
tadadbhutamācacakṣe | anantaraṃ saṃhaiva tena kāñcīnagaramāgatya naramohinyā niratiśayaṃ rūpamavalokya vismitastasyā gṛhaṃ praviveśa | sāpi tau rājārhaṇopacāreṇa toṣayitvā savinayamevaṃ rājānaṃ vyajijñapat - 'deva dhanyāsmi
pavitramabhūdidaṃ bhavanam, yato bhavataścaraṇakamaladhūlibhūṣitamabhūt | adya bhojanaparigraheṇa janamimaṃ kṛtārthayatu devaḥ' iti | rājā 'idānīmevāhaṃ bhuktvā samāgato'smi | śrutisukhena bhāṣitenaiva te tuṣṭo'smi' iti prāha
tatastayā dattāṃ tāmbūlavīṭikāṃ jagrāha | itthaṃ rātrau praharo'tīyāya | naramohinī tu suṣvāpa | dvitīye prahare rākṣasaḥ samāgatya naramohinīmekākinīṃ
mañce suptāṃ dṛṣṭvā nirjagāma | tadā rājā taṃ keśe gṛhītvā kṛpāṇena kaṇṭhamacchinat | tatkolāhalaṃ śrutvā naramohinī prabudhya hataṃ rākṣasaṃ vilokya paraṃ
santuṣṭā rājānamastauṣīt - 'deva bhavatprasādādahaṃ nirbhayā jātāsmi | adyaprabhṛti mama rākṣasopadravo nivṛttaḥ | asmādupakārātkathamahamuttīrṇā bhaveyam | itaḥ prabhṛti yadājñāpayati bhavāṃstadācaritumahamāyattāsmi' iti
rājā 'yadi mayoktaṃ kariṣyasi tarhyamuṃ kamalākaraṃ bhajasva' ityāha | tataḥ
sā naramohinī kamalākaramabhajata | vikramo'pyujjayinīmagamat”| iti
sāḷabhañjikoktāṃ kathāṃ śrutvā bhojastūṣṇīṃ nivavṛte
iti navamamupākhyānam
atha daśamamupākhyānam
bhūyo'pi kadācidbhojabhūpālo yāvatsiṃhāsanamārukṣattāvadaparā pāñcālikā niṣidhya 'bho rājanvakramasyevaudāryādayo guṇā yadi tvayi vidyante tadāsminnāsane samupaviśa' ityāha | tato rājani 'kathaya tasyaudāryādivṛttāntam' iti pṛcchati pāñcālikā prāha- “bho rājañśrūyatām | vikrame siṃhāsanamidamāsthāya viśvambharāṃ pālayati yogī kaścidujjayinīṃ pratyāgacchat | sa ca vedavedāṅgādisakaḷaśāstravicakṣaṇaḥ | kiṃ bahunā | tatsadṛśo
nānyo'sti bhūtale | sa sākṣātsarvajña eva | ekadā vikramastasya prasiddhiṃ
niśamya tamāhvātuṃ purohitaṃ trivikramaṃ preṣayāmāsa | sa ca tadantikaṃ gatvā
namaskṛtyābravīt - 'bhoḥ svāmin rājā vikramo bhavantaṃ draṣṭumicchati | tadāgacchatu bhavān' iti | yogī prāha - 'rājadarśanena kimasmākamasti prayojanam | paśya -
bhuñjīmahi vayaṃ bhikṣāmānnā vāso vasīmahi
śayīmahi mahīpṛṣṭhe kurvīmahi kimīśvaraiḥ