Vikramarkacaritra 4.3

4.3

tasyāṃ ca rātrau cirajīvī sukhopaviṣṭaḥ sanpakṣiṇo'pṛcchat | 'bhoḥ putrāḥ
paritaḥ paryaṭanto bhavantaḥ kimadbhutamapaśyata' iti | tatra paṭucañcurnāma kaścitprāha | ' nāhaṃ kimapyadbhutamadrākṣam | api tu paredyurmama mahadduḥkhaṃ bhaviṣyati' iti | cirajīvī— kiṃ tat ? paṭucañcuḥ— idānīṃ kathanamātreṇa
kiṃ tadupaśāmyati ? | cirajīvī— bhoḥ putra yaḥ suhṛde svaduḥkhaṃ nivedayati
sa sukhī bhavati | tadākarṇya paṭucañcurātmaduḥkhamakathayat — 'tāta śrūyatām | astyuttaradeśe śaivālako nāma parvataḥ | tatsamīpe palāśanagaraṃ nāmāgrahāro'sti | tatra ca parvate kaścidrākṣasaḥ pratidinaṃ nagaramārgāntāñjanānbalātparvataṃ nītvā bhakṣayannāsīt | ekadā tu janāḥ 'bho rākṣasa yathecchaṃ
tvanmukhāgataṃ puruṣaṃ mā bhakṣaya | vayaṃ tubhyamekaikaṃ puruṣaṃ pratidinamāhārārthaṃ
dāsyāmaḥ' ityabhyarthāṃcanta | so'pyetadaṅgīcakāra | anantaraṃ mahājanaiḥ
pratidinaṃ gṛhakrameṇaikaikaṃ puruṣaṃ tasmai prāyacchan | evaṃ mahānaticakrāma kālaḥ
adya mama pūrvajanmanimittabhūtasya brāhmaṇasya balivāsaraḥ saṃprāptaḥ| tasya tveka
eva putraḥ | yadi taṃ dadyāttadā saṃtativicchedo bhavet | yadyātmānameva prayacchati tadā bhāryātyantavṛddhā vidhavā bhavet | vaidhavyaṃ punarmahadduḥkhamabalānām | tathā ca rāmāyaṇe -
patihīnā tu yā nārī kāmaṃ bhavatu putriṇī
dhanadhānyaiḥ supūrṇāpi vidhevetyucyate budhaiḥ