Vikramarkacaritra 7.4

7.4

iti ca
athaikadā suranagaryāṃ bhadrāsanamalaṃkurvāṇe sahasrākṣe, aṣṭādaśa sahasrāṇi maharṣayaḥ , trayastriṃśatkoṭayo devāḥ , aṣṭau lokapālāḥ , ekonapañcāśanmarudgaṇāḥ , dvādaśādityāḥ , candrāṅgārakādayo nava grahāḥ , nāradādayo divyarṣayaḥ ,
menakāprabhṛtayo'psarasaḥ , sarve gandharvādayo gaṇāśca tamasevanta | tadānīṃ ca
nāradaḥ ‘vikramasadṛśaḥ paropakārī mahāsattvasaṃpanno vā narapatirbhūmaṇḍale nāsti’ iti sabhāyāṃ prastāvādrāṭ | tadākarṇya sā sabhā paraṃ vismayamāyayau
tadā kāmadhenurācabhāṣe — ‘bhoḥ sabhyāḥ kimatra vismayanīyamasti ? | yataḥ ,
dāne tapasi vīrye ca vijñāne vinaye naye
vismayo naiva kartavyo bahuratnā vasundharā