Suktasamdoha 2

Sūktasaṃdoha 2

Language: Sanskrit

2.922 — 1 part

2.43

rūpeśvaratvakulajātitapobalājñājñānāṣṭaduḥsahamadākulabuddhirajñaḥ
yo manyate'hamiti nāsti paro'dhiko'pi
mānātsa nīcakulameti bhavānanekān

2.44

nītiṃ nirasyati vinītimupākaroti
kīrtiṃ śaśāṅkadhavalāṃ malinīkaroti
mānyānna mānayati mānavaśena hīnaḥ
prāṇīti mānamapahanti mahānubhāvaḥ

2.49

hīnādhikeṣu vidadhātyavivekabhāvaṃ
dharmaṃ vināśayati saṃcinute ca pāpam
daurbhāgyamānayati kāryamapākaroti
kiṃ kiṃ na doṣamathavā kurute'bhimānaḥ

2.46

māne kṛte yadi bhavediha ko'pi lābho
yadyarthahāniratha kācana mārdeve syāt
brūyācca ko'pi yadi mānakṛtaṃ viśiṣṭaṃ
māno bhaveddhruvabhṛtāṃ saphalastadānīm

2.47

mānī vinītimapahantyavinītiraṅgī
sarvaṃ nihanti guṇamastaguṇānurāgaḥ
sarvāpadāṃ jagati dhāma virāgataḥ syādityākalayya sudhiyo na dharanti mānam

2.48

hīno'yamanyajanānopahatābhimānājjāto'hamuttamaguṇastadakārakatvāt
anyaṃ nihīnamavalokayato'pi puṃso
māno vinaśyati sadeti vitarkabhājaḥ

2.49-2

garveṇa mātṛpitṛbāndhavamitravargāḥ
sarve bhavanti vimukhā vihitena puṃsaḥ
anyo'pi tasya tanute na jano'nurāgaṃ
matveti mānamapahastayate subuddhiḥ

2.50

āyāsakopabhayaduḥkhamupaiti martyo
mānena sarvajananinditaveṣarūpaḥ
vidyādayādamayamādiguṇāṃśca hanti
jñātveti garvavaśameti na śuddhabuddhiḥ

2.51

stabdho vināśamupayāti nato'tivṛddhiṃ
martyo nadītaṭagato dharaṇīruho vā
garvasya doṣamiti cetasi saṃnidhāya
nāhaṃ karoti guṇadoṣavicāradakṣaḥ

2.52

hīnānavekṣya kurute hṛdaye'bhimānaṃ
mūrkhaḥ svato'dhikaguṇānavalokya martyān
prājñaḥ parityajati garvamatīva loke
siddhāntaśuddhadhiṣaṇā munayo vadanti

2.53

jihvāsahasrakalito'pi samā sahasrairyasyāṃ na duḥkhamupavarṇayituṃ samarthaḥ
sarvajñedevamapahāya paro manuṣyastāṃ śvabhrabhūmimupayāti naro'bhimānī

2.54

yāṃ chedadahanāṅkanadāhadohavātātāpa̱nnajalarodhavadhādidoṣām
māyāvaśena manujo jananindanīyāṃ
tiryaggatiṃ vrajati tāmatiduḥkhapūrṇām

2.55

yatra priyāpriyaviyogasamāgamānya
preṣyatvadhānyadhanabāndhavahīnatādyaiḥ
duḥkhaṃ prayāti vividhaṃ manasāpyasahyaṃ
taṃ martyavāsamadhitiṣṭhati māyayā̱ṅgī

2.96

yatrāvalokya divi dīnamanā vibhūtimanyāmareṣvadhikakāntisukhādikeṣu
prāpyābhiyogapadavīṃ labhate'tiduḥkhaṃ
tatreti vañcanaparaḥ puruṣo nivāsam

2.97

jāmātṛbhartṛpitṛbāndhavamitraputravastrāsanābharaṇamaṇḍanasaukhyahīnaḥ
dīnānano malinaninditaveṣarūpo
nārīṣu tāsu bhavameti naro nikṛtyā

2.98

śīlavratodyamatapaḥśamasaṃyuto'pi
nātrāśnute nikṛtiśalyadharo manuṣyaḥ
ātyantikīṃ śriyamabādhasukhasvarūpāṃ
śalyānvito vividhadhānyadhaneśvaro vā

2.99

kleśārjitaṃ sukhakaraṃ ramaṇīyamarthyaṃ
dhānyaṃ kṛṣīvalajanasya śikhīva sarvam
bhasmīkaroti bahudhāpi janasya satyaṃ
māyāśikhī pracuradoṣakaraḥ kṣaṇena

2.60

vidveṣavairikalahāsukhaghātabhītinirbhartsanābhibhavanāsuvināśanādīn
doṣānupaiti nikhilānmanujo'timāyī
buddhveti cārumatayo na bhajanti māyām

2.61

yā pratyayaṃ budhajaneṣu nirākaroti
puṇyaṃ hinasti parivardhayate ca pāpam
satyaṃ nirasyati tanoti vinindyabhāvaṃ
tāṃ sevate nikṛtimatra jano na bhavyaḥ

2.12

pracchādito'pi kapaṭena janena doṣo
loke prakāśamupayātitarāṃ kṣaṇena
varco yathā jalagataṃ vidadhāti puṃsāṃ
māyā manāgapi na cetasi saṃnidheyā

2.13

śīto ravirbhavati śītaruciḥ pratāpī
stabdhaṃ nabho jalanidhiḥ saridambutṛptaḥ
sthāyī marudvidahano dahano'pi jātu
lobhānalastu na kadācidadāhakaḥ syāt

2.14

labdhendhanajvalanavatkṣaṇato'tivṛddhiṃ
lābhena lobhadahanaḥ samupaiti jantoḥ
vidyāgamavratatapaḥśamasaṃyamādīnbhasmīkaroti yamināṃ sa punaḥ pravṛddhaḥ

2.19

vittāśayā khanati bhūmitalaṃ satṛṣṇo
dhātūngirerdhamati dhāvati bhūmipāśce
deśāntarāṇi vividhāni vigāhate ca
puṇyaṃ vinā na ca naro labhate sa tṛptim

2.16

vardhasva jīva jaya nanda vibho ciraṃ tvamityādicāṭuvacanāni vibhāṣamāṇaḥ
dīnānano malinaninditarūpadhārī
lobhākulo vitanute sadhanasya sevām

2.17

cakṣuḥkṣayaṃ pracurarogaśarīrabādhākhāntāvighātagatibhaṅgamamanyamānaḥ
saṃskṛtya patranicayaṃ ca maṣīvimarghya
tṛṣṇāturo likhati lekhakatāmupetaḥ

2.18

viśvaṃbharāṃ vividhajantugaṇena pūrṇāṃ
strī garbhiṇīmiva kṛpāmapahāya martyaḥ
nānāvidhopakaraṇena halena dīno
lobhārditaḥ kṛṣati pāpamalokamānaḥ

2.19-2

bhogopabhogasukhato vimukho manuṣyo
rātriṃ divaṃ paṭhanacintanasaktacittaḥ
śāstrāṇyadhītya vividhāni karoti lobhāddhyāpanaṃ śiśugaṇasya vivekaśūnyaḥ

2.70

vastrāṇi sīvyati tanoti vicitracitraṃ
mṛtkāṣṭhalohakanakādividhiṃ karoti
nṛtyaṃ cinoti rajakatvamupaiti martyaḥ
kiṃ kiṃ na lobhavaśavartitayā vidhatte

2.71

lokasya mugdhadhiṣaṇasya vivañcanāni
kurvannaro vividhamānaviśeṣakṛtyā
saṃsārasāgaramapāramavīkṣamāṇo
vāṇijyamatra vidadhāti vivṛddhalobhaḥ

2.72

adhyeti nṛtyati lunāti minoti nauti
krīṇanti hanti vapate cinute vibheti
muṣṇāti gāyati dhinoti bibharti bhinte
lobhena sīvyati paṇāyati yācate ca

2.73

kuntāsiśaktibharatomaratajvalādi
nānāvidhāyudhabhayaṃkaramugrayodham
saṃgrāmamadhyamadhitiṣṭhati lobhayuktaḥ
svaṃ jīvitaṃ tṛṇasamaṃ vigaṇayya jīvaḥ

2.74

atyantabhīmavanajīvagaṇena pūrṇaṃ
durgaṃ vanaṃ bhavabhṛtāṃ manasāpyagamyam
caurākulaṃ viśati lobhavaśena martyo
no dharmakarma vidadhāti kadācidajñaḥ

2.75

jīvānnihanti vividhaṃ vitathaṃ bravīti
steyaṃ tanoti bhajate vanitāṃ parasya
gṛhṇāti duḥkhajananaṃ dhanamugradoṣaṃ
lobhagrahasya vaśavartitayā manuṣyaḥ

2.76

udyanmahānilavaśotthavicitravīcivikṣiptanakramakarādinitāntabhītim
ambhodhimadhyamupayāti vivṛddhavelaṃ
lobhākulo maraṇadoṣamamanyamānaḥ

2.77

niḥśeṣalokavanadāhavidhau samarthaṃ
lābhānalaṃ nikhilatāpakaraṃ jvalantam
jñānāmbuvāhajanitena vivekijīvāḥ
saṃtoṣadivyasalilena śamaṃ nayante

2.78

dravyāṇi puṇyarahitasya na santi lobhātsantyasya cenna tu bhavantyacalāni tāni
santi sthirāṇi yadi tasya na saukhyadāni
dhyātveti śuddhadhiṣaṇo na tanoti lobham

2.79

cakreśakeśavabalāyudhabhūtito'pi
saṃtoṣamuktamanujasya na tṛptirasti
tṛṣṇāṃ vinā na sukhamityavagamya samyaglobhagrahasya vaśino na bhavanti dhīrāḥ

2.80

duḥkhāni yāni narakeṣvatiduḥsahāni
tiryakṣu yāni manujeṣvamareṣu yāni
sarvāṇi tāni manujasya bhavanti lobhādityākalayya vinihanti tamatra dhanyaḥ

2.81

lobhaṃ vidhāya vidhinā bahudhāpi puṃsaḥ
saṃcinvataḥ kṣayamanityatayā prayānti
dravyāṇyavaśyamiti cetasi saṃnirūpya
lobhaṃ tyajanti sudhiyo dhutamohanīyāḥ

2.82

tiṣṭhantu bāhyadhanadhānyapuraḥsarārthāḥ
saṃvardhitāḥ pracuralobhavaśena puṃsā
kāyo'pi naśyati nijo'yamiti pracintya
lobhārimugramupahanti viruddhatattvam

2.83

svecchā vihārasukhato nivasannagānāṃ
bhakṣadvane kiśalayāni manoharāṇi
ārohaṇāṅkuśavinodanabandhanādi
dantī tvagindriyavaśaḥ samupaiti duḥkham

2.84

tiṣṭhanjale'tivimale vipule yathecchaṃ
saukhyena bhītirahito ramāṇacittaḥ
gṛddho raseṣu rasanendriyato'tikaṣṭaṃ
niṣkāraṇaṃ maraṇameti ṣaḍīkṣaṇo'ntra

2.85

nānātaruprasavasaurabhavāsitāṅgo
ghrāṇendriyeṇa madhupo yamarājadhiṣṇyām
gacchatyaśuddhamatiratra gato viśaṅki
gandheṣu padmasadanaṃ samavāpya dīnaḥ

2.86

sajjātipuṣpakalikeyamitīva matvā
dīpārciṣaṃ hatamatiḥ śalabhaḥ patitvā
rūpāvalokanamanā ramaṇīyarūpe
mugdho'valokanavaśena yamāsyameti

2.87

dūrvāṅkurāśanasamṛddhavapuḥ kuraṅgaḥ
krīḍanvaneṣu hariṇībhirasau vilāsaiḥ
atyantageyaravadattamanā varākaḥ
śrotrendriyeṇa samavartimukhaṃ prayāti

2.88

ekaikamakṣaviṣayaṃ bhajatāmamīṣāṃ
saṃpadyate yadi kṛtāntagṛhātithitvam
pañcākṣagocararatasya kimasti vācyamakṣārthamityamaladhīradhiyastyajanti

2.89

dantīndradantadalanaikavidhau samarthāḥ
santyatra raudramṛgarājavadhe pravīṇāḥ
āśīviṣoragavaśīkaraṇe'pi dakṣāḥ
pañcākṣanirjayaparāstu na santi martyāḥ

2.90

saṃsārasāgaranirūpaṇadattacittāḥ
santo vadanti madhurāṃ viṣayopasevām
ādau vipākasamaye kaṭukāṃ nitāntaṃ
kiṃpākapākaphalabhuktimivāṅgabhājām

2.91

tāvannaro bhavati tattvavidastadoṣo
mānī manoramaguṇo mananīyavākyaḥ
śūraḥ samastajanatāmahitaḥ kulīno
yāvadvṛṣīkaviṣayeṣu na śaktimeti

2.92

martyaṃ hṛṣīkaviṣayā yadamī tyajanti
nāścaryametadiha kiṃcidanityatātaḥ
etattu citramaniśaṃ yadamīṣu mūḍho
mukto'pi muñcati matiṃ na vivekaśūnyaḥ

2.93

ādityacandrahariśaṃkaravāsavādyāḥ
śaktā na jetumatiduḥkhakarāṇi yāni
tānīndriyāṇi balavanti sudurjayāni
ye nirjayanti bhuvane balinasta eke

2.94

saukhyaṃ yadatra vijitendriyaśatrudarpaḥ
prāpnoti pāparahitaṃ vigatāntarāyam
svasthaṃ tadātmakamanātmadhiyā vilabhyaṃ
kiṃ tadghurantaviṣayānalataptacittaḥ

2.95

nānāvidhavyasanadhūlivibhūtivātaṃ
tattvaṃ viviktamavagamya jineśinoktam
yaḥ sevate viṣayasaukhyamasau vimucya
haste'mṛtaṃ pibati raudraviṣaṃ nihīnaḥ

2.96-2

dāsatvameti vitanoti vihīnasevāṃ
dharmaṃ dhunāti vidadhāti vinindyakarma
rephśvinoti kurute'tivirūpaveṣaṃ
kiṃ vā hṛṣīkavaśatastanute na martyaḥ

2.97-2

agnirna tṛpyati yathā saritāṃ sahasrairnocendhanairiva śikhī bahudhopanītaiḥ
jīvaḥ samastaviṣayairapi tadvadeva
saṃcintya cārudhiṣaṇastyajatīndriyārthān

2.98-2

āpātamātraramaṇīyamatṛptihetuṃ
kiṃpākapākaphalatulyamatho vipāke
no śāśvataṃ pracuradoṣakaraṃ viditvā
pañcendriyārthasukhamarthadhiyastyajanti

2.99-2

vidyā dayā dyutiranuddhatatā titikṣā
satyaṃ tapo niyamanaṃ vinayo vivekaḥ
sarve bhavanti viṣayeṣu ratasya moghā(?)
matveti cārumatireti na tadgaśitvam

2.100

lokārcito'pi kulajo'pi bahuśruto'pi
dharmasthito'pi virato'pi śamānvito'pi
akṣārthapannagaviṣākulito manuṣyastannāsti karma karute na yadatra nindyam

2.101

lokārcitaṃ gurujanaṃ pitaraṃ savitrīṃ
bandhuṃ sanābhimabalāṃ suhṛdaṃ svasāram
bhṛtyaṃ prabhuṃ tanayamanyajanaṃ ca martyo
no manyate viṣayavairivaśaḥ kadācit

2.102

yenendriyāṇi vijitānyatidurdharāṇi
tasyāvibhūtiriha nāsti kuto'pi loke
ślādhyaṃ ca jīvitamanarthavimuktamuktaṃ
puṃso viviktamatipūjitatattvabodhaiḥ

udyadbṛndaprabandhāṃ paramasukharasāṃ kokilālāpajalpāṃ
puṣpasannaksaukumāryāṃ kusumaśaravadhūṃ rūpato nirjayantīm
saukhyaṃ sarvendriyāṇāmabhimatamabhitaḥ kurvatīṃ mānaseṣṭaṃ
satsaubhāgyā labhante kṛtasukṛtavaśāḥ kāminīṃ martyamukhyām

2.104

akṣaṇoryugmaṃ vilokānmṛdutanuguṇatastarpayantī śarīraṃ,
divyāmodena vakrādapagatamarutā nāsikāṃ, cāruvācā
śrotradvandvaṃ, manojñā daśanamapi rasā tarpayantī mukhābjaṃ
yadvatpañcākṣasaukhyaṃ vitarati yuvatiḥ kāmināṃ nānyadevam

2.105

yā kūrmoṃcāṅghripṛṣṭāruṇacaraṇatalā vṛttajaṅghā varorūḥ
sthūlaśroṇīnitamvā pravipulajaghanā dakṣiṇāvartanābhiḥ
indrābhākṣāmāmadhyā kanakapuṭakucā vārijāvartakaṇṭhā
puṣpasannagvāhuyugmā śaśadharavadanā pakvabimbādharoṣṭhī

2.106

saṃśumbhatpāṇḍugaṇḍā, pracakitahariṇīlocanā, kīranāsā,
sajyeṣvāsānatabhrūḥ, surabhikacacayā, tyaktapadmeva padmā
aṅgeraṅgaṃ bhajantī dhṛtamadanamadaiḥ premato vīkṣyamāṇā
neṭgyasyāsti yoṣā sa kimu varatapo bhaktito no vidhatte

2.107

saṃtyaktavyaktabodhastarudapi bakulo madyagaṇḍūṣasiktaḥ
piṇḍīvṛkṣaśca subhraṃścaraṇatalahataḥ puṣparojāñcamarcyam
saukhyaṃ jānāti yasyākṛtamadanapaterhāvabhāvāspadāyāstāṃ nārīṃ varjayanto vidadhati taruto'pyūnamātmānamajñāḥ

2.108

gaurīṃ dehārdhamīśo harirapi kamalāṃ nītavānatra vakṣo
yatsaṅgātsaukhyamicchuḥ sarasijanilayo'ṣṭām̐rdhavaktro babhūva
gīrvāṇānāmadhīśo daśaśatabhagatāmāptavānstabdhadhairyaiḥ
sām̐ devānāmpīṣṭā manasi suvadanā vartate nṛrna kasya

2.109

yatkāmārti dhunīte sukhamupacinute prītimāviṣkaroti
satpātrāhāradānaprabhavavaravṛṣasyāstadoṣasya hetuḥ
vaṃśābhyuddhārakarturbhavati tanubhuvaḥ kāraṇaṃ kāntakīrtistatsarvābhīṣṭadātṛ pravadata na kathaṃ prārthyate strīsuratnam

2.110

kṛṣṇatvaṃ keśapāśe, vapuṣi ca kṛśatāṃ, nīcatāṃ nābhibimbe,
vakratvaṃ bhrūlatāyāmalakakuṭilatāṃ, mandimānaṃ prayāṇe,
cāpatyaṃ netrayugme, kucakalaśayuge karkaśatvaṃ dadhānā,
citraṃ doṣānapi strī lasati mukharucā dhvastadoṣākaraśrīḥ

2.111

bāhudvandvena mālāṃ, mailavikalatayā paddhatīṃ kharbhavānāṃ,
haṃsīṃ gatyā,nyupuṣṭāṃ madhuravacanato, netrato mārgabhāryām
sītāṃ śīlena, kāntyā śiśirakaratanuṃ, kṣāntito bhūtadhātrīṃ
saubhāgyādya vijigye giripatinayāṃ, rūpataḥ kāmapatnīm

2.112

vakṣojau kaṭhinau, na vāgviracanā, mandā gati,rno mati,rvakraṃ bhrūyugalaṃ, mano na jaṭharaṃ, kṣāmaṃ nitambo na ca,
yugmaṃ locanayoścalaṃ, na caritaṃ, kṛṣṇāḥ kacā, no guṇā,
nīcaṃ nābhisarovaraṃ, na ramaṇaṃ, yasyā manojñākṛteḥ

2.113

strītaḥ sarvajñanāthaḥ suranatacaraṇo jāyate'vādhabodhastatsāttīrthaṃ śrutākhyaṃ janahitakathakaṃ mokṣamārgāvabodhaḥ
tasmāttasmādbhināśo bhavaduritatate: saukhyamasmādvibādhaṃ
budhdaivaṃ strīṃ pavitrāṃ śivasukhakaraṇīṃ sajjanaḥ svīkaroti

2.114

bhṛtyo mantrī vipattau bhavati, ratividhau yātra veśyā vidagdhā,
lajjāluryā vigītā gurujanavinatā, gehinī gehakṛtye,
bhaktyā patyau sakhī, yā svajanaparijane dharmakarmaikadakṣā,
sālpakrodhālpapuṇyaiḥ sakalaguṇanidhiḥ prāpyate strī na martyaiḥ

2.115

kṛtyākṛtye na vetti, tyajati guruvaco, nīcavākyaṃ karoti,
lajjālutvaṃ jahāti, vyasanamatimahadvāhate nindanīyam,
yasyāṃ śakto manuṣyo nikhilaguṇaripormānanīyo'pi loke
sānarthānāṃ nidhānaṃ vitaratu yuvatiḥ kiṃ sukhaṃ dehabhājām

2.116

śaśvanmāyāṃ karoti, sthirayati na mano, manyate nopakāraṃ,
yā vākyaṃ vatkyasatyaṃ, malinayati kulaṃ, kīrtivallīṃ lunāti,
sarvārambhaikaheturviratisukharatidhvaṃsinī nindanīyā
tāṃ dharmārāmabhaṅgīṃ bhajati na manujo māninīṃ mānyabuddhiḥ

2.117

yā viśvāsaṃ narāṇāṃ janayati, śatadhālīkajalpaprapañcai,naṃ pratyeti svayaṃ tu, vyapaharati guṇānekadoṣeṇa sarvān
kṛtvā doṣaṃ vicitraṃ racayati nikṛtiṃ yātmakṛtyaikaniṣṭhāṃ
tāṃ doṣāṇāṃ dharitrīṃ ramayati ramaṇīṃ mānavo no variṣṭhaḥ

2.118

udyajjvālāvalībhirvaramiha bhuvanakṣoṣake havyavāhe
raṅgadvīcau praviṣṭaṃ jalanidhipayasi grāhanakrākule vā
saṃgrāme vāriraudre vividhaśarahatānekayodhāpradhāne
no nārīsaukhyamadhye bhavaśatajanitānantaduḥkhapravīṇe

2.119

vidyuddyotena rūpaṃ rajaniṣu timire vīkṣituṃ śakyate yaiḥ
pāraṃ gantuṃ bhujābhyāṃ vividhajalacarakṣobhināṃ(ṇāṃ) vāridhīnām
jñātuṃ cāro'mitānāṃ viyati vicaratāṃ jyotiṣāṃ maṇḍalasya
no cittaṃ kāminīnāmiti kṛtamatayo dūratastyajanti

2.120

kātra śrīḥ śroṇibimbe sravadudarapurāvastikhadvāravācye,
lakṣmīḥ kā kāminīnāṃ kucakalaśayuge māṃsapiṇḍasvarūpe
kā kāntirnetrayugme jalakaluṣajuṣi, śleṣmaraktādipūrṇe
kā śobhā vakragarte nigadata yadaho mohinastāḥ stuvanti

2.121

vakraṃ lālāghavadyaṃ sakalaśaśibhṛtā, svarṇakumbhadvayena
māṃsagranthī stanau ca, pragaladurumalā syandanāṅgena yoniḥ
nirgacchaddūṣikāsyaṃ yadupamitamaho padmapatreṇa netraṃ
taccitraṃ nātra kiṃcidyadapagatamatirjāyate kāmilokaḥ

2.122

yattvagmāṃsāsthimajjākṣatajarasavasāśukradhātupravṛddhaṃ
viṣṭhāmūtrāsragaśruprabhṛtimalanavasrotramatra tridoṣe
varcaḥ sandhyopamāne kṛmikulanilaye'tyantabībhatsvarūpe
rajyannaṅge vadhūnāṃ vrajati gatamatiḥ śvabhragarbhe kṛmitvam

2.123

chāyāvadyānavadyācirucicapalā khaḍgadhāreva tīkṣṇā
buddhirvā lubdhakasya pratihatakaruṇāvyādhivaccityaduḥkhā
vakrā vā sarpagītiḥ kunṛpagatirivāvadyakṛtyapracārā
citrā vā śakracāpaṃ bhavacakitabudhaiḥ sevyate strī kathaṃ sā

2.124

saṃjñāto'pīndrajālaṃ yaduta yuvatayo mohayitvā manuṣyānānāśāstreṣu dakṣānapi guṇakalitaṃ darśayantyātmarūpam
śukrāsyagyātanāktaṃ tatakuthitamalaiḥ prakṣaratsrotragartaiḥ
sarvairucārapuñjaṃ kuthitajaṭharabhcchidritaṃ yadvadatra

2.125

yā sarvocchiṣṭavakrā hitajanabhuṣaṇāsadguṇāsparśanīyā
pūrvāghamārtyajātā satatamalabhṛtā nindyakṛtyapravṛttā
dānasnehā śunīva bhramaṇakrataratiśvāṭakarmapravīṇā
yoṣā sā sādhulokairavagatajananairdūrato varjanīyā

2.126

duḥkhānāṃ yā nidhānaṃ bhavanamavinayasyārgalā svargapuryāḥ
śvabhrāvāsasya varma prakṛtirapayaśaḥ sāhasānāṃ nivāsaḥ
dharmārāmasya śastrī guṇakamalahimaṃ mūlamanodrumasya
māyāvalī dharitrī kathamiha vanitā sevyate sā vidagdhaiḥ

2.127

śroṇīsaṅgaprapannaiḥ kṛmibhiratiśayāruṃtudaistudyamānā
yatpīḍāto'tidīnā vidadhati calanaṃ locanānāṃ ramaṇyaḥ
tanmanyante'timohādupahatamanasaḥ sadvilāsaṃ manuṣyā
ityetattathyamuccairamitagatiyatiproktamārādhanātaḥ

2.6

iti śrīguṇadoṣavicāraḥ

2.128

durantamithyātvatamodivākarā vilokitāśeṣapadārthavistarāḥ
uśanti mithyātvatamo jineśvarā yathārthatattvāpratipattilakṣaṇam

2.129

vimūḍhataikāntavinītasaṃśayapratīpatānāhanisargabhedataḥ
jinaiśca mithyātvamanekadhoditaṃ bhavārṇavabhrāntikaraṃ śarīriṇām

2.130

parigraheṇāpi yutāstapasvino vadhe'pi dharmaṃ bahudhā śarīriṇām
anekadoṣāmapi devatāṃ janasmimohamithyātvavaśena bhāṣate

2.131

vibodhanityatvasukhitvakartṛtāvi muktitaddhetukṛtajñatādayaḥ
na sarvathā jīvaguṇā bhavantyamī bhavanti caikāntadṛśeti budhyate

2.132

na dhūyamāno bhajati dhvajaḥ sthitiṃ yathānilairdevakulopari sthitaḥ
samastadharmāniladhūtacetano vinītamithyātvaparastathā naraḥ

2.133

samastatattvāni na santi santi vā virāgasarvajñaniveditāni vai
viniścayaḥ karmavaśena sarvathā janasya saṃśītirucerna jāyate

2.134

payoyutaṃ śarkarayā kaṭūyate yathaiva pittajvarabhāvite jane
tathaiva tattvaṃ viparītamajñinaḥ pratīpamithyātvahaśo vibhāsate

2.135

prapūritaścarmalavairyathāśanaṃ na maṇḍalaścarmakṛtaḥ samicchati
kuhetudṛṣṭāntavacaḥ prapūrito jinendratattvaṃ vitathaṃ prapadyate

2.136

yathāndhakārāndhapaṭāvṛto jano vicitracitraṃ na vilokituṃ kṣamaḥ
yathoktatattvaṃ jinanāthabhāṣitaṃ nisargamithyātvatiraskṛtastathā

2.137

dayādamadhyānatapovratādayo guṇāḥ samastā na bhavanti sarvathā
durantamithyātvarajohatātmano rajoyutālābugataṃ yathā payaḥ

2.138

avaiti tattvaṃ sadasattvalakṣaṇaṃ vinā viśeṣaṃ viparītalocanaḥ
yadṛcchayā mattavadastacetano jano jinānāṃ vacanātparāṅmukhaḥ

2.139

trilokakālatrayasaṃbhavā sukhaṃ suduḥsahaṃ yaistrividhaṃ vilokyate
carācarāṇāṃ bhavagartavartināṃ tadatra mithyātvavaśena jāyate

2.140

varaṃ viṣaṃ bhuktamasukṣayakṣamaṃ varaṃ vanaṃ śvāpadavanniṣevitam
varaṃ kṛtaṃ vahniśikhāpraveśanaṃ narasya mithyātvayutaṃ na jīvitam

2.141

karoti doṣaṃ na tamatra keśarī na dandaśūko na karī na bhūmipaḥ
atīva ruṣṭo na ca śatruruddhato yamugramithyātvaripuḥ śarīriṇām

2.142

dadhātu dharmaṃ daśadhā tu pāvanaṃ karotu bhikṣāśanamastadūṣaṇam
tanotu yogaṃ dhṛtacittavistaraṃ tathāpi mithyātvayuto na mucyate

2.143

dadātu dānaṃ bahudhā caturvidhaṃ karotu pūjāmatibhaktito'rhatām
dadhātu śīlaṃ tanutāmabhojanaṃ tathāpi mithyātvavaśo na sidhyati

2.144

avaitu śāstrāṇi naro viśeṣataḥ karotu citrāṇi tapāṃsi bhāvataḥ
atattvasaṃsaktamanāstathāpi no vimuktasaukhyaṃ gatabādhamaśnute

2.145

vicitravarṇāñcitacitramuttamaṃ yathā gaitākṣo na jano vilokate
pradarśyamānaṃ na tathā prapadyate kudṛṣṭijīvo jinanāthaśāsanam

2.146

abhavyajīvo vacanaṃ paṭhannapi jinasya mithyātvaviṣaṃ na muñcati
yathā viṣaṃ raudraviṣo'pi pannagaḥ saśarkaraṃ cārupayaḥ pibannapi

2.147

bhajanti naikaikaguṇaṃ trayastrayo dvayaṃ dvayaṃ ca trayamekakaḥ paraḥ
ime'tra santo'pi bhavanti durdaśā yathārthatattvapratipattivarjitāḥ

2.148

anantakopādicatuṣṭayodaye tribhedamithyātvamalodaye yathā
durantamithyātvaviṣaṃ śarīriṇāmanantasaṃsārakaraṃ prarohati

2.149

alabdhadugdhādiraso rasāvahaṃ tadudbhavo nirjharasaṃ kramiryathā
adṛṣṭajainendravacorasāyanastathā kutattvaṃ manute rasāyanam

2.150

dadāti duḥkhaṃ bahudhātiduḥsahaṃ tanoti pāpopacayonmukhaṃ matim
yathārthabuddhiṃ vidhunoti pāvanīṃ karoti mithyātvaviṣaṃ na kiṃ nṛṇām

2.151

anekadheti praguṇena cetasā vivicya mithyātvamalaṃ sadūṣaṇam
vimucya jainendramataṃ sukhāvahaṃ bhajanti bhavyā bhavaduḥkhabhīravaḥ

2.152

vimuktaśaṅkādisamastadūṣaṇaṃ vimuktatattvapratipattimujjvalam
vadanti samyaktvamanantadarśanā jineśino nākinutāṅghripaṅkajāḥ

2.153

paropadeśena śaśāṅkanirmalaṃ naro nisargeṇa tadā tadaśnute
kṣayaṃ śamaṃ miśramapāgate male yathārthatattvaikarucerniṣedhake

2.154

surendranāgendranarendrasaṃpadaḥ sukhena sarvā labhate bhramanbhave
aśeṣaduḥkhakṣayakāraṇaṃ paraṃ na darśanaṃ pāvanamaśnute janaḥ

2.155

janasya yasyāsti vinirmalā rucirjinendracandrapratipādite mate
anekadharmānvitatattvasūcake kimasti no tasya samastaviṣṭape

2.156

vidhāya yo jainamatasya rocanaṃ muhūrtamapyekamatho vimuñcati
anantakālaṃ bhavaduḥkhasaṃgatiṃ na so'pi jīvo labhate kathaṃcana

2.157

yathārthatattvaṃ kathitaṃ jineśvaraiḥ sukhāvahaṃ sarvaśarīriṇāṃ sadā
nidhāya karṇe vihitārthaniścayo na bhavyajīvo vitanoti durmatim

2.158

virāgasarvajñapadāmbujadvaye yatau nirastākhilasaṃgasaṃgatau
vṛṣe ca hiṃsārahite mahāphale karoti harṣaṃ jinavākyabhāvitaḥ

2.159

bhavāṅgabhogeṣvapi bhaṅgurātmanā jayatsu nārījanacittasaṃtatim
bhavārṇavabhrāntividhānahetuṣu virāgabhāvaṃ vidadhāti sadruciḥ

2.160

kalatraputrādinimittataḥ kacidvinindyarūpe vihite'pi karmaṇi
idaṃ kṛtaṃ karma vininditaṃ satāṃ mayeti bhavyaścakito vinindati

2.161

galanti doṣāḥ kathitāḥ kathaṃcana prataptalohe patitaṃ yathā payaḥ
nayeṣu teṣāṃ vratināṃ svadūṣaṇaṃ nivedayatyātmahitodyato janaḥ

2.162

nimittato bhūtamanarthakāraṇaṃ na yasya kopādicatuṣṭayaṃ sthitim
karoti rekhā payasīva mānase saśāntabhāvo'sti viśuddhadarśanaḥ

2.163

viśuddhabhāvena vidhūtadūṣaṇāṃ karoti bhaktiṃ gurupañcake śrute
śrutānvite jainagṛhe jinākṛtau jineśatattvaikaruciḥ śarīravān

2.164

caturvidhe dharmijane jināśrite nirastamithyātvamale'tipāvane
karoti vātsalyamanarthanāśanaṃ sudarśano gauriva tarṇake nave

2.165

durantarogopahateṣu saṃtataṃ purārjite no vaśatā śarīriṣu
karoti sarveṣu viśuddhadarśano dayāṃ parāmastasamastadūṣaṇaḥ

2.166

viśuddhamevaṃguṇamasti darśanaṃ janasya yasyeha vimuktikāraṇam
vrataṃ vināpyuttamasaṃcitaṃ satāṃ satīrthaktvaṃ labhate'tipāvanam

2.167

damo dayādhyānamahiṃsane tapo jitendriyatvaṃ vinayo nayastathā
dadāti naitatphalamaṅgadhāriṇāṃ yadatra samyaktvamaninditaṃ dhṛtam

2.168

varaṃ nivāso narake'pi dehināṃ viśuddhasamyaktvavibhūṣitātmanām
durantamithyātvaviṣopabhogināṃ na devaloke vasatirvirājate

2.169

adhastanaśvabhrabhuvo na yāti ṣaṇna sarvanārīṣu na saṃjñito'nyataḥ
na jāyate vyantaradevajātiṣu na bhāvanajyotiṣikeṣu sadruciḥ

2.170

na bāndhavā no suhṛdo na vallabhā na dehajā no dhanadhānyasaṃcayāḥ
tathā hitāḥ santi śarīriṇāṃ jane yathātra samyaktvamadūṣitaṃ hitam

2.171

tanoti dharmaṃ, vidhunoti pātakaṃ, dadāti saukhyaṃ, vidhunoti bādhakam
cinoti muktiṃ, vinihanti saṃsṛtiṃ, janasya samyaktvamaninditaṃ dhṛtam

2.172

manoharaṃ saukhyakaraṃ śarīriṇāṃ tadasti loke sakale na kiṃcana
yadatra samyaktvadhanasya durlabhamiti pracintyātra bhavantu tatparāḥ

2.173

vihāya daivīṃ gatimarcitāṃ satā vrajanti nānyatra viśuddhadarśanāḥ
tataścyutāścakradharādimānavā bhavanti bhavyā bhavatīravo(?) bhuvi

2.174

pramāṇasiddhāḥ kathitā jineśinā vyayodbhavadhrauvyayutā vimohitāḥ
samastabhāvā vitathā na vetti yaḥ karoti śaṅkāṃ sa nihanti darśanam

2.175

surāsurāṇāmatha cakradhāriṇāṃ nirīkṣya lakṣmīmamalāṃ manoharām
anena śīlena bhavenmameti yastanoti kāṅkṣāṃ sa dhunoti sadrucim

2.176

malena digdhānavalokya saṃyatānprapīḍitānvā tapasā mahīyasā
naraścikitsāṃ vidadhāti yaḥ parāṃ nihanti samyaktvamasāvacetanaḥ

2.177

vilokya raudratratino'nyaliṅginaḥ prakurvataḥ kandaphalāśanādikam
ime'pi karmakṣayakārakatvatā vicinvate'tipratihanyate ruciḥ

2.178

kudarśanajñānacaritracidrajā nirastatattvārtharucīnasaṃyatān
niṣevamāṇo manasāpi mānavo lunāti samyaktvataruṃ mahāphalam

2.179

jinendracandrāmalabhaktibhāvitā nirastamithyātvamalena dehinā
pradhāryate yena viśuddhadarśanamavāpyate tena vimuktikāminī

2.7

iti sadasatsvarūpanirūpaṇam

2.180

anekaparyāyaguṇairupetaṃ vilokyate yena samastatattvam
tadindriyānindrayabhedabhinnaṃ jñānaṃ jinendrairgaditaṃ hitāya

2.181

ratnatrayīṃ rakṣati yena jīvo virajyate'tyantaśarīrasaukhyāt
ruṇaddhi pāpaṃ, kurute viśuddhiṃ, jñānaṃ tadiṣṭaṃ sakalārthavaddhiḥ

2.182

krodhaṃ dhunīte, vidadhāti śāntiṃ, tanoti maitrīṃ, vihinasti moham,
punāti cittaṃ, madanaṃ lunīte, yeneha bodhaṃ tamuśanti santaḥ

2.183

jñānena bodhaṃ kurute, pareṣāṃ kīrtiṃstatścandramarīcigaurī
tato'nurāgaḥ sakale'pi loke tataḥ phalaṃ tasya mano'nukūlam

2.184

jñānādvitaṃ vetti tataḥ pravṛttīṃ ratnatraye saṃcitakarmamokṣaḥ
tatastataḥ saukhyamabādhamuccaistenātra yatnaṃ vidadhāti dakṣaḥ

2.189

yadajñajīvo vidhunoti karma tapobhirugrairbhavakoṭilakṣaiḥ
jñānī tu caikakṣaṇato hinasti tadatra karmeti jinā vadanti

2.185

caurādidāyādatanūjabhūpairahāryamarghyaṃ sakale'pi loke
dhanaṃ pareṣāṃ nayanairadṛśyaṃ jñānaṃ narā dhanyatamā vahanti

2.187

vinaśvaraṃ pāpasamṛddhidakṣaṃ vipākaduḥkhaṃ budhanindanīyam
tadanyathā bhūtagaṇena tulyaṃ jñānena rājyaṃ na kadācidasti

2.188

pūjyaṃ svadeśe bhavatīha rājyaṃ jñānaṃ triloke'pi sadarcanīyam
jñānaṃ vivekāya, madāya rājyaṃ, tato na te tulyaguṇe bhavetām

2.189-2

tamo dhunīte, kurute prakāśaṃ, śamaṃ vidhatte, vinihanti kopam,
tanoti dharmaṃ, vidhunoti pāpaṃ, jñānaṃ na kiṃ kiṃ kurute narāṇām

2.190

yathā yathā jñānabalena jīvo jānāti tattvaṃ jinanāthadṛṣṭam
tathā tathā dharmamatiprasaktāḥ prajāyate pāpavināśaśaktāḥ

2.191

āstāṃ mahābodhabalena sādhyo mokṣo vibādhāmalasaukhyayuktaḥ
dharmārthakāmā api no bhavanti jñānaṃ vinā tena tadarcanīyam

2.192

sarve'pi loke vidhayo yathārthā jñānādṛte naiva bhavanti jātu
anātmanīyaṃ parihartukāmāstadarthino jñānamataḥ śrayanti

2.193

śakyo vijetuṃ na manaḥ karīndro gantuṃ pravṛttaḥ pravihāya mārgam
jñānāṅkuśenātra vinā manuṣyairvināṅkuśaṃ mattamahākarīva

2.194

jñānaṃ tṛtīyaṃ puruṣasya netraṃ samastatattvārthavilokadakṣam
tejo'napekṣyaṃ vigatottarāyaṃ pravṛttimatsarvajagatatraye'pi

2.195

niḥśeṣalokavyavahāradakṣo jñānena martyo mahanīyakīrtiḥ
sevyaḥ satāṃ saṃtamasena hīno vimuktikṛtyaṃ pratibaddhacittaḥ

2.196

dharmārthakāmavyavahāraśūnyo vinaṣṭaniḥśeṣavicārabuddhiḥ
rātriṃdivaṃ bhakṣaṇasaktacitto jñānena hīnaḥ paśureva śuddhaḥ

2.197

tapodayādānaśamakṣamādyāḥ sarve'pi puṃsāṃ mahimā guṇā ye
bhavanti saukhyāya na te janasya jñānaṃ vinā tena tadeṣu pūjyam

2.198

jñānaṃ vinā nāstyahitānnivṛttistataḥ pravṛttirna hite janānām
tato na pūrvārjitakarmanāśatato na saukhyaṃ labhate'pyabhīṣṭam

2.199

kṣetre prakāśaṃ niyataṃ karoti ravirdine'staṃ punareva rātrau
jñānaṃ triloke sakale prakāśaṃ karoti nācchādanamasti kiṃcit

2.200

bhavārṇavottāraṇapūtanāvaṃ niḥśeṣaduḥkhenadhanadāvavahnim
daśāṅgadharmaṃ na karoti yena jñānaṃ tadiṣṭaṃ na jinendracandraiḥ

2.201

gantuṃ samullaṅghya ca bhavāṭavīṃ yo jñānaṃ vinā muktipurīṃ samicchet
so'ndho'ndhakāreṣu vilaṅghya ca durgaṃ vanaṃ puraṃ prāptumanā vicakṣuḥ

2.202

jñānena puṃsāṃ sakalārthasiddhirjñānādṛte kācana nārthasiddhiḥ
jñānasya matveti guṇānkadācijjñānaṃ na muñcanti mahānubhāvāḥ

2.203

varaṃ viṣaṃ bhakṣitamugradoṣaṃ varaṃ praviṣṭaṃ jvalane'tiraudre
varaṃ kṛtāntāya niveditaṃ svaṃ na jīvitaṃ tattvavivekamuktam

2.204

śaucakṣamāsatyatapodamādyā guṇāḥ samastāḥ kṣaṇataścalanti
jñānena hīnasya narasya loke vātyāhatā vā taravo'pi mūlāt

2.205

mātā pitā bandhujanaḥ kalatraṃ putraḥ suhṛdbhūmipatiśca tuṣṭaḥ
na tatsukhaṃ kartumalaṃ narāṇāṃ jñānaṃ yadevaṃ sthitamastadoṣam

2.206

śakyo vaśīkartumibho'timattaḥ siṃhaḥ phaṇīndraḥ kupito narendraḥ
jñānena hīno na punaḥ kathaṃcidityasya dūre na bhavanti santaḥ

2.207

karoti saṃsāraśarīrabhogavirāgabhāvaṃ vidadhāti rāgam
śīlavratadhyānatapaḥkṛpāsu jñānī vimokṣāya kṛtaḥ prayāsaḥ

2.208

paropadeśaṃ svahitopakāraṃ jñānena dehī vitanoti loke
jahāti doṣaṃ śrayate guṇaṃ ca jñānaṃ janaistena samarcanīyam

2.209

evaṃ vilokyāsya guṇānanekānsamastapāpārinirāsadakṣān
viśuddhabodhā na kadācanāpi jñānasya pūjāṃ mahatīṃ tyajanti

2.8

iti jñānanirūpaṇam

2.210

saddarśanajñānabalena bhūtā pāpakriyāyā viratistridhā yā
jineśvaraistadgaditaṃ caritraṃ samastakarmakṣayahetubhūtam

2.211

śamaṃ kṣayaṃ miśramupāgatāyāṃ tannāśikarma prakṛtau tridhātaḥ
dvidhā sarāgetarabhedataśca prajāyate sādhanasādhyarūpam

2.212

hiṃsānṛtasteyajanātisaṅganivṛttirūpaṃ vratamaṅgabhājām
pañcaprakāraṃ śubhasūtiheturjineśvarairjñātasamastatattvaiḥ

2.213

jīvāsravasthāvarabhedabhinnāsrasāścaturdhātra bhaveyuranye
pañcaprakāraṃ trividhena teṣāṃ rakṣāmahiṃsāvratamukti pūtam

2.214

sparśena varṇena rasena gandhādyadanyathā vārigataṃ svabhāvam
tatprāṃśukaṃ sādhujanasya yogyaṃ pātuṃ munīndrā nigadanti jaināḥ

2.215

uṣṇodakaṃ sādhujanāḥ pibanti manovacaḥkāyaviśuddhilabdham
ekāntatastatpivatāṃ munīnāṃ ṣaḍjīvaghātaṃ kathayanti santaḥ

2.216

hataṃ ghaṭīyantracatuṣpadādi sūryenduvātāgnikarairmunīndrāḥ
pratyantavātena hataṃ vahacca yatprāṃśukaṃ tannigadanti vāri

2.217

bhavatyavaśyāyahimāṃśudhūsarīghanāmbuśuddhodakabindusīkarān
vihāya śeṣaṃ vyavahārakāraṇaṃ manīṣiṇāṃ vāriviśuddhimicchatām

2.218

uṣṇodakaṃ pratigṛhaṃ yadakāri lokaiḥstacchāvakaḥ pibati nānyajanaḥ kadācit
tatkevalaṃ munijanāya vidhīyamānaṃ
ṣaḍjīvasaṃtativirādhanasādhanāya

2.219

yathārthavākyaṃ rahitaṃ kaṣāyairapīḍanaṃ prāṇigaṇasya pūtam
gṛhasthabhāṣāvikalaṃ yathārthaṃ satyaṃ vrataṃ syāddadatāṃ yatīnām

2.220

grāmādinaṣṭādi dhanaṃ pareṣāmagṛhṇato'lpādimunestridhāpi
bhavatyadattagrahavarjanākhyaṃ vrataṃ munīnāṃ gaditaṃ hi loke

2.221

vilokya mātṛsvasradehajāvatstrīṇāṃ trikaṃ rāgavaśena yāsām
vilokanasparśanasaṃkathābhyo nivṛttiruktaṃ tadamaithunatvam

2.222

sacetanācetanabhedatotthāḥ parigrahāḥ santi vicitrarūpāḥ
tebhyo nivṛttistrividhena yatra naiḥsaṅgacamuktaṃ tadapāstasaṅgaḥ

2.223

yugāntaraprekṣaṇataḥ svakāryādivā yathā jantuvivarjitena
yato munerjīvavirādhahānyā gatirvireryā samitiḥ samuktā

2.224

ātmapraśaṃsāparadoṣahāsapaiśūnyakārkaśyaviruddhavākyam
vivarjya bhāṣāṃ vadatāṃ munīnāṃ vadanti bhāṣāṃ samitiṃ jinendrāḥ

2.225

anudgamotpādanavalbhadoṣā manovacaḥkāyavikalpaśuddhāḥ
svakāraṇā yā munipasya bhuktistāmeṣaṇākhyāṃ samitiṃ vadanti

2.226

ādānanikṣepavidhervidhāne dravyasya yogyasya muneḥ sayatnaḥ
ādānanikṣepaṇanāmadheyāṃ vadanti santaḥ samitiṃ pavitrām

2.227

dūre viśāle janajantumukte gūḍhe viruddhe tyajato malāni
pūtāṃ pratiṣṭhāpananāmadheyāṃ vadanti sādhoḥ samitiṃ jinendrāḥ

2.228

samastajantupratipālanārthāḥ karmāśravadvāranirodhadakṣāḥ
imā munīnāṃ nigadanti pañca pañcatvamuktāḥ samitīrjinendrāḥ

2.229

pravṛttayaḥ syāntavacastanūnāṃ sūtrānusāreṇa nivṛttayo vā
yāāstā jineśāḥ kathayanti tisro guptīrvidhūtākhilakarmabandhāḥ

2.230

evaṃ caritrasya caritrayuktairalayodaśāṅgasya niveditasya
vratādibhedena bhavanti bhedāḥ sāmāyikādyāḥ punareva pañca

2.231

pañcādhikā viṃśatirastadoṣairuktāḥ kaṣāyāḥ kṣayataḥ śamādvā
teṣāṃ yathākhyātacaritramuktaṃ tanmiśratāyāmitaraṃ catuṣkam

2.232

saddarśanajñānaphalaṃ caritraṃ te tena hīne bhavato vṛthaiva
sūryādisaṅkena diveva netre naitatphalaṃ yena vadanti santaḥ

2.233

kaṣāyamuktaṃ kathitaṃ caritraṃ kaṣāyavṛddhāvapaghātameti
yadā kaṣāyaḥ śamameti puṃsastadā caritraṃ punareti pūtam

2.234

kaṣāyasaṅgo saha tena vṛttaṃ samārdracakṣurna dinaṃ ca reṇum
kaṣāyasaṅgo vidhunanti tena cāritravanto munayaḥ sadāpi

2.239

niḥśeṣakalyāṇavidhau samarthaṃ yasyāsti vṛttaṃ śaśikāntikāntam
martyasya tasya dvitaye'pi loke na vidyate kācana jātu bhītiḥ

First 200 of 909 passages. Read on

Suktasamdoha 2

Contents