Tantrayukti 4.36_2

4.36_2

yadyapi bhaṭṭārakaprasthānena ca paripraśnavyākaraṇavyutkrāntābhidhānahetvākhyāścatasrovaśiṣyante tathāpi ācāryeṇa tantreṇānibaddhā ityatra nocyante. athavā tantrayuktitvameva tāsāṃ nāṅgīkriyate. tatra cāgnyatiyogoktau vātādiviśeṣeṇāvasthāpanaṃ sambhavaprasādāllabhyamevādyuktam..
sarasaḥ suptapadmasya ravidīdhitayo yathā.
yathā gṛhasya dīpābhāstathā tantrasyayuktayaḥ..
adhīyānopi tantrāṇi tantrayuktyavicakṣaṇaḥ.
nādhigacchati tantrārthamarthaṃ bhāgyakṣaye yathā..
sarasa ityādi subodham. tantrayuktyavicakṣaṇaḥ etāsu ṣaṭtriṃśattantrayuktiṣvasamarthastantrārthaṃ nādhigacchati na prāpnoti yathā bhāgyakṣaye dhanam..
vākyārthayojanādetā yuktayastviṣṭasiddhidāḥ.
asadvādiprayuktānāṃ vākyānāṃ pratiṣedhakāḥ..
līnavyatyāsaleśoktigaditānāṃ prakāśakāḥ.
vākyanyāyodadheḥ sāraṃ gṛhītvaivaṃ vyavasthitāḥ..
etā yuktayo vākyārthasya yojanāddhetoḥ sveṣṭasiddhiṃ dadati. yāni cāsadvādināmarthasambandhapradarśanaparaṇi vākyāni teṣāṃ pratiṣedhakāḥ. līnagaditānāṃ vyatyāsagaditānāṃ ca prakāśakāḥ. līnaṃ tadyat sphuṭaṃ vaktuṃ na pāryate. vyatyāsaḥ parasparavivartanam. leśoṃśena sparśaḥ. uktirvacanabhaṅgiḥ. etāśca yuktayo vākyanyāyodadherasaṃkhyaprakārasambhavino geyasyeva jātayaḥ sāraṃ gṛhitvā evaṃ vyavasthitāḥ. padārthayojanāstu vyutpannānāṃ prasiddhā evetyata ācāryeṇa noktāḥ.