Shivattvaratnakara 106.1

106.1

piṇḍotpattinirūpaṇaṃ nāma prathamastaraṅgaḥ
atha dvitīyastaraṃgaḥ
bhagavan ! garbhavāse ca nirgame cāpi dehinaḥ
jāyate sumahad duḥkhamiti pūrvaṃ nirūpitam
ataḥ paraṃ vā bālyādisthavirāntavayassvapi
sukhasyānubhavo loke narāṇāṃ vidyate na vā?
adhunā saṃśayo bhūyānasti me manasi prabho !
nirūpayedaṃ sarvaṃ me saṃśayaṃ vinivartaya
yatpṛṣṭaṃ bhavatā putra ! tad bravīmi punaḥ śṛṇu
puṃsāṃ varṣaśataṃ hyāyustatrārdhaṃ nidrayā gatam
taraṅgacañcarārāśeḥ sampadaḥ kṣaṇabhaṃgurāḥ
dināni trīṇi catvāri narāṇāṃ yauvanaṃ smṛtam
duḥkhaṃ janma jarā duḥkhaṃ duḥkhaṃ mṛtyuḥ punaḥ punaḥ
evaṃvidhasya jīvasya sukhasyānubhavaḥ kutaḥ
avyaktendriyavṛttitvādbālye duḥkhaṃ mahat punaḥ
icchannapi na śaknoti vaktuṃ kartuṃ ca tatkriyām
dantotthāne mahad duḥkhaṃ mūḍhena vyādhinā tataḥ
bālarogaiśca vividhaiḥ pīḍā bālagrahairapi
tṛḍbubhukṣāparītāṅgaḥ kvacittiṣṭhati cāraṭan