Shivattvaratnakara 107.34

107.34

sadbhāryā putramitrāṇi rājyaiśvaryasukhāni ca
āvaddhāni ca vairāṇi mṛtyussarvaṃ vināśayet
bho ! janāḥ ! kiṃ na paśyadhvaṃ ? sahasreṣvapi madhyataḥ
janāśśatāyuṣaḥ pañca bhavanti na bhavanti vā
aśītikāśca triṃśeran kecit saptatikā narāḥ
paramāyussthitiścāṣṭristadapyāyurna niścitam
yasya yāvad bhavedāyurdehibhiḥ pūrvakarmabhiḥ
tasyārdhamāyuṣo rātrirharate'tra mṛtopamā
bālabhāve ca mohena vārdhake jarayā tathā
varṣāṇāṃ viṃśatiryāti dharmakāmārthavarjitāḥ
āgantukairbhavaiḥ puṃsāṃ vyādhiśokairanekadhā
hīyate'rdhaṃ ca tatrāpi yaccheṣaṃ taddhi jīvitam
jīvitānte ca maraṇaṃ mahāghoramavāpnuyāt
punaḥ punaḥ karmavaśāt koṭiyoniṣu jāyate
dehabhedena yaḥ puṃsāṃ viyogaḥ karmasaṃkṣayāt
maraṇaṃ tad vinirdiṣṭaṃ na nāśaḥ paramārthataḥ
mahārāmaḥ ? praviṣṭaḥ syācchidyamāneṣu marmasu
yad duḥkhaṃ maraṇe jantorna tasyeha samaṃ kvacit
hā mātaḥ ! hā pitaḥ ! kānte ! krandatyevaṃ suduḥkhitaḥ
maṇḍūka iva sarpeṇa grasyate mṛtyunā jagat
bāndhavaiśca pariṣvaktaḥ priyaiśca parivāritaḥ
niśvasan dīrghamuṣṇaṃ ca mukhena pariśuṣyatā
caturdhvanteṣu khaṭvāyāḥ parivṛtya muhurmuhuḥ
sammūḍhaḥ kṣipatetyarthaṃ hastapādamitastataḥ
khaṭvāyā vāñchate bhūmiṃ bhūmeḥ khaṭvāṃ tato mahīm
vivastrastyaktalajjaśca mūtraviṣṭhāpariplutaḥ
yācamānaśca salilaṃ śuṣkakaṇṭhāsyatālukaḥ
cintayānaśca vittāni kasyaitāni mṛte mayi
nakhāgraiśca khanan bhūmiṃ kālapāśena karṣitaḥ
mriyate paśyatāmeva gale ghuraghurāyate
jīvastṛṇajalakāvad dehāddehaṃ viśedasau
saṃprāpyottamavaṃśe ca dehaṃ tyajati paurvikam
maraṇāt prārthanāduḥkhamadhikaṃ hi vivekinaḥ
kṣaṇikaṃ maraṇe duḥkhamanantaṃ prārthanākṛtam