Shivattvaratnakara 13.30

13.30

dṛṣṭvā bhāgīrathīṃ gaṃgāmuvāsa bahulāssamāḥ
yūpā maṇimayāstatra vedyaścāpi hiraṇmayāḥ
tatreṣṭvā tu gatassiddhiṃ sahasrākṣo mahāyaśāḥ
sṛṣṭvā bhūtapatiryatra sarvalokānsanātanaḥ
upāsyate tigmatejā vṛtobhūtai ssamantataḥ
naranārāyaṇau brahmā manuḥsthāṇuśca pañcamaḥ
tatra divyā tripathagā prathamaṃ tu pratiṣṭhitā
brahmalokādapakrāntā saptadhā pravahattyasau
vasvaukasārā nalinī pāvanā ca sarasvatī
jambūnadī ca śītā ca gaṃgā sindhuśca saptamī
acintyā divyasaṃkalpāḥ prabhāvaiśca samanvitāḥ
dṛśyādṛśyā ca bhavati tatra tatra sarasvatī
etā divyāssaptagaṃgā striṣu lokeṣu viśrutāḥ
rakṣāṃsi vai himavati hemakūṭe tu guhyakāḥ
sarpā nāgāśca niṣadhe gokarṇe ca tapovanam
devāsurāṇāṃ ca gṛhaṃ śvetaparvata ucyate
gandharvā niṣadhe śaile nīle brahmarṣayastathā
śṛṃgavāṃstu mahārāja! devānāṃ pratisaṃcaraḥ
ityetāni mahābhāga! saptavarṣāṇi bhāgaśaḥ
bhūtānyupaniviṣṭāni gatimanti dhruvāṇi ca
teṣāmṛddhirbahuvidhā dṛśyate daivamānuṣī
aśakyā parisaṃkhyātuṃ śraddhayā 1)jaivabhūṣayā
yāṃstu pṛcchasi māṃ rājan! divyāmenāṃ śaśākṛtim
pārśve śaśasya dve varṣe ukte ye dakṣiṇottare
karṇau tu nāgadvīpaśca kaśyapadvīpa eva ca
tāmravarṇaśśiro rājan! śrīmānmalayaparvataḥ
eṣa dvitīyo dvīpastu dṛśyate śaśasaṃsthitiḥ
dakṣiṇena tu nīlasya meroḥ pārśve tathottare
uttarāḥ kuravo rājan! trayassiddhaniṣevitāḥ
tatra vṛkṣā madhuphalā nityapuṣpaphalodgamāḥ
puṣpāṇi ca sugandhīni rasavanti phalāni ca