Shivattvaratnakara 33.1

33.1

atha daśamastaraṃgaḥ
samproktaṃ basaveśasya svecchāvirbhāvakhelanam
tatkṛtānugrahasyāpi kramassvāmin! nirūpitaḥ
ākarṇyaitatpramudito'bhavaṃ sarvakalārṇava !
yadi vādipuro dharmo dhūsaratvaṃ (sameṣyati
utpātāśca bhaviṣyanti samantādyojanadvayam
etadvayaṃ) śrotumicchā mama saṃprati vartate
saprapañcamatiprājña ! tadvayaṃ me nirūpaya
kumārānanyasāmānyā guṇāste harṣayanti naḥ
yadanvayujyataitarhi brūmastatrottaraṃ śṛṇu
kalessthitiṃ pravakṣyāmi śṛṇuṣva susamāhitaḥ
dharmaḥ kaliyuge prāpte tripādo na pravartate
tāmasaṃ yugamāsādya hariḥ kṛṣṇatvameti ca
yaḥ kaścidatra dharmātmā kriyāyogarato bhavet
naraṃ dharmaparaṃ dṛṣṭvā sarve'sūyāṃ prakurvate
vratācārāḥ praṇaśyanti dhyānayajñādayastathā
upadravā bhaviṣyanti hyadharmasya pravartanāt
(asūyāniratāssarve dambhācāraparāyaṇāḥ
prajāścālpāyuṣassarvā bhaviṣyanti kalau yuge)
yugadharmāssamākhyātā sthūlāssaṃkṣepato mune!
sarve dharmāḥ praṇaśyanti kṛṣṇe kṛṣṇatvamāgate
tasmātkalirmahāghorassarvapāpasya sādhakaḥ
brāhmaṇāḥ kṣatriyā vaiśyā śśūdrā dharmaparāṅmukhāḥ
ghore kaliyuge prāpte dvijā vedaparāṅmukhāḥ