Shivattvaratnakara 41.48

41.48

giridurgaṃ toyadurgaṃ giripāṣāṇanirmitam
iṣṭakābhiḥ kṛtaṃ durgaṃ durgaṃ syānmṛttikāmayam
vanadurgaṃ marordurgaṃ durgaṃ syāddārunirmitam
naradurgaṃ ca navamaṃ teṣāṃ vakṣyāmi lakṣaṇam
dugārohaṃ ca śailāgramudakena samanvitam
giridurgaṃ samākhyātaṃ nayaśāstraviśāradaiḥ
agādhenātha toyena veṣṭitaṃ jalajaṃ bhavet
pāṣāṇaracitaṃ durgamaśmadurgaṃ prakīrttitam
iṣṭakābhiḥ kṛtaṃ samyak sudhāliptaṃ sunirmalam
iṣṭakādurgamākhyātaṃ parikhāveṣṭitaṃ mahat
mṛdā viracitaṃ yattu tad durgaṃ mṛttikāmayam
vanadurgaṃ samākhyātaṃ ghanaṃ kaṇṭakaśākhibhiḥ
antasthaissancitaṃ toyaṃ bahiḥsthānāṃ tu durlabham
marudurgaṃ samākhyātaṃ marudeśena saṃyutam
dārubhirveṇubhiḥ klṛptaṃ durgaṃ dārumayaṃ smṛtam
śastrahastairmahāyodhairnirmitaṃ naradurgakam
eteṣāmuttamaṃ durgaṃ girijaṃ jalajaṃ tathā
madhyamānītarāṇyāhuḥ kaniṣṭhe naradāruje
durgāyantrāṇi kāryāṇi nānāpraharaṇāni ca
durgadvārāṇi guptāni kāryāṇyapi ca bhūbhujā
saṃcayaṃ cātra sarveṣāmāyudhānāṃ prakalpayet
aśmanāṃ ca prabhūtānāṃ siktānāṃ tathaiva ca
sarveṣāṃ śilpabhāṇḍānāṃ tanna saṃcaya iṣyate
auṣadhānāṃ ca sarveṣāṃ vāditrāṇāṃ tathaiva ca
yavasānāṃ prabhūtānāmindhanānāṃ ca saṃcayam
guḍasya sarvatailānāṃ ghṛtasya madhunastathā
tathā ca sarvadhānyānāṃ pāṃsugomayayostathā
anyāni sarvavastūni durge sañcinuyānnṛpaḥ
maulyaṃ bhṛtaṃ tathā maitraṃ śreṇamāṭavikaṃ balam
amaitramaparaṃ ṣaṣṭhaṃ saptamaṃ nopalabhyate
vaṃśakramāgataṃ maulyaṃ bhṛtaṃ draviṇadānataḥ
maitrīkaraṇato maitraṃ śreṣṭhametadbalatrayam
sambaddhaṃ janmakarmabhyāṃ niścitaṃ samayeñca yat
tadbalaṃ śreṇamākhyātaṃ tacca madhyamamiṣyate
parvatopāntasaṃvāsi niṣādaṃ mlecchajātijam
adhamaṃ tatsamākhyātaṃ balamāṭavikaṃ budhaiḥ