Shivattvaratnakara 45.1
Śivattvaratnākara 45.1
- Language
- Sanskrit
45.1
atha navamastaraṃgaḥ
gatvāsau nṛpatiḥ kutra kiṃ kiṃ racitavānidam
mahyaṃ brūhi guro! tasya śravaṇe kautukaṃ mahat
putra! te tatsamāsena varṇayāmyadbhutaṃ śṛṇu
yasya saṃśravaṇānnṛṇāṃ hṛdayaṃ vismayāspadam
rāmeśvarādiliṃgāni nānākṣetrāṇi tatra ca
dṛṣṭvā snātvā ca tīrtheṣu tattatyeṣu ca sādaram
dakṣiṇāṃ diśamutsṛjya jagāhe diśamuttarām
dṛṣṭvā tatrāpi liṃgāni kṣetratīrthāni bhūriśaḥ
kramātsamāviśatkāśīṃ bhavāśīviṣabarhiṇīm
gaṃgāṃ nijapayobindusaṃgāpahṛtaduṣkṛtām
viśveśaṃ cāpi viśveśaṃ yataḥ prāpussurāsurāḥ
prāpyāvagāhya bahudhā sampūjyāpi krameṇa tān
nirgatya ca tato nīlakaṇṭhanepālamāśritaḥ
kedāreśaṃ tato dṛṣṭvā prāptaḥ kāśmīramaṇḍalam
kurukṣetraṃ tato'paśyatkrameṇaiva tataḥ param
dillīnāmakametarhi prāgindraprasthasaṃjñitam
nagaraṃ prekṣya tasyāntaḥ praveśāya kṛtaspṛhaḥ
vrajannasiṃ dvāribaddhamadrākṣīdekamagrataḥ
apṛcchacca pratīhārān kimetaditi kautukī
ayamaṃkuśakhānena śastrāśastrividhau paṭuḥ
mayā samaṃ yoddhukāmo gṛhṇātviti niveśitaḥ
śrutveti vacanaṃ teṣāṃ smṛtvā pūrvatanīṃ kathām
kauravaprerito mātsyanagare mallatallajaḥ
baddhvā dvāri gadāṃ yoddhuṃ bhīmenāsīnniṣūditaḥ
mayā niṣūdanīyo'yamiti nirdhārayan hṛdi
asimānāyayāmāsa baddhaṃ tadanuyāyinā
tataḥ so'ṅkuśakhāno'pi pratihāramukhoktitaḥ
tatrapravṛttaṃ vṛttāntaṃ sarvamevaṃ niveditaḥ
dillīśvaro'tha so'nyenamākārya nṛpamādiśat
śastrāśastriraṇaṃ kartuṃ sahatenāsimapyadāt
atha svabhujaśaktyāsīn dattān nava daśāpi ca
kramātkampena saṃchinnān dṛṣṭvā vismitamānase
45.1.p1
dillīśvare nijaṃ rāmeśvaraliṃgaprasādataḥ
samprāptaṃ lakṣaṇāḍhyaṃ taṃ khaḍgaṃ hastena so'grahīt
tato bahuprakārāṇi maṇḍalāni pradarśayat
asau vīraḥ pravīrāṇāṃ darśayan hastalāghavam
nikhārayorastyācakarṣa kṛpāṇaṃ pratiyoginaḥ
kṛpāṇasyātitaikṣṇyena lāghavena karasya ca
khaṇḍito'pi dvidhā tiṣṭhan yathāpūrvamadṛśyata
sulakṣaṇatvāt khaḍgasya tatra tasya śramādapi
vijitastena vīreṇa pratiyogyī durāsadaḥ
lakṣaṇāni punaḥ kāni guṇāstānme nirūpaya
yairlabhyate raṇāgreṣu jayalakṣmīrnārgalā
nandanākarṇaya svairaṃ kathayāmi tavepsitam
pramāṇadoṣarekhāśca jātiṃ deśāṃśca devatāḥ
jñātvaiva khaḍgamādadyādāyussaubhāgyavṛddhaye
pañcāśadaṃgulaṃ śreṣṭhaṃ catvāriṃśacca madhyamam
ṣaṭtriṃśadbhiḥ kaniṣṭhaṃ syātsvāṃguṣṭhodaranāmakam
sphuṭitaṃ piṭakaṃ viddhaṃ bhagnarekhaṃ tvacoddhṛtam
jalamārgaṃ jalasrāvi sidmalaṃ vakradhāriṇam
iti doṣāssamākhyātāḥ phalaṃ teṣāṃ kramācchṛṇuve
sphuṭitena bhavenmṛtyuḥ piṭako gotraghātakaḥ
viddhāddāridryamāpnoti bhagnātkīrtirvinaśyati
jalamārgādbhavedbhaṃgo jalasrāvī bhayāvahaḥ
sidmale kuṣṭhadāridryaṃ vakradhāro duyatiṃ haret
prākāraśaṃkhacakrāṇi toraṇaṃ cāmaraṃ dhvajam
matsyakūrmādi mālāṃkaṃ śobhanaṃ khaḍgamīdṛśam
liṃgaṃ sapīṭhaṃ dṛśyeta yasmin khaḍge sunirmale
taṃ khaḍgaṃ dhārayedrājā āyurārogyakārakam
45.1.p2
prākāro dṛśyate yatra garuḍaśca sunirmalaḥ
45.1.p3
taṃ khaḍgaṃ dhārayedrājā viṣavajrabhayāpaham
Linked texts (1)
- Śivatattvaratnākara — Basappa Nāyaka 1684, Sanskrit