Shivattvaratnakara 45.44

45.44

ketakīphalasaṃkāśaśśubhaprākāra īdṛśaḥ
taruṇakeśasaṃkāśaṃ prākārairdṛśyasūkṣpakaiḥ
pañjaraṃ nāma tallohaṃ jāṃgale tu samudbhavam
liṃgaṃ sapīṭhaṃ dṛśyeta prākāro dṛśyasūkṣpakaḥ
sthūladīrghaśca madhye tu bahuvarṇatilāṃśakaiḥ
anūpadeśajaṃ lohaṃ sukṛṣṇaṃ kṛṣṇapañjaram
prākāraiḥ kuṇḍalākārairyadvā khaṇḍendusannibhaiḥ
halakodaṇḍasaṃkāśairlohaṃ sādaraṇodbhavam
prākārairvartulairdīrghaiḥ priyaṃgucchāyayānvitaiḥ
suvarṇapañjaraṃ nāma lohaṃ kāliṃgasambhavam
bhujaṃgagatisaṃkāśaistailavindusamanvitaiḥ
prākārairdṛśyate yattu lohaṃ kāmbhojasambhavam
prākārairnīlavarṇaiśca dīrghasūkṣmamanoharaiḥ
nīsāraṃ tu tallohaṃ (nīlaparvatasannibham
tailavindusamākārairlatāmaṇḍalasannibhaiḥ
kṛṣṇasāraṃ tu tallohaṃ) gūrjareṣu samudbhavam
supāṇḍuraistu susnigdhaiḥ prākāraissūkṣmadīrghakaiḥ
śvetasāraṃ tutallohaṃ mahārāṣṭrasamudbhavam
prakārairvartulaissūkṣmaiḥ pāṇḍucchāyaissunirmalaiḥ
medikaṃ nāma tallohaṃ karṇāṭeṣu samudbhavam
athātassaṃpravakṣyāmi śastrāṇāṃ mānalakṣaṇam
narasya madhyamaṃ parva madhyamāṃgulisambhavam
mānāṃgulamidaṃ śreṣṭhaṃ dvitīyaṃ parvamadhyamam
tanmānaṃ dviguṇīkṛtya cāṣṭabhāgāhṛtau punaḥ
aṣṭāyāmā dhvajādyāstu kramaśassambhavantyapi
dhvaje'rthasiddhirmaraṇaṃ ca dhūmeḥ siṃhe jayaḥ syācchunake ca rogaḥ
vṛṣe ca saukhyaṃ ca khare tu duḥkhaṃ gaje sukhaṃ niṣphalatā ca kāke