Shivattvaratnakara 65.1

65.1

atha dvādaśastaraṃgaḥ
svāmin ! yābhissahārāme sukhaṃ bhūryanvabhūditi
udīritaṃ mṛgākṣyastā guro ! brūhi kiyadvidhāḥ
kīdṛgvilāsaśālinyaḥ kīdṛgguṇapariṣkṛtāḥ
kīdṛśaḥ kṛtayassarvametad brūhi kalānidhe!
śṛṇu nandana ! tatsarvaṃ varṇayāmi yathākramam
somaśśaucaṃ dadau tāsāṃ gandharvāśca śubhāṃ giram
agnissarvāṅgakāntiṃ ca kasmānneṣṭatamāḥ striyaḥ
striyaḥ pavitramamalaṃ naitā duṣyanti karhicit
madhye dharitryāḥ purameva sāraṃ pure gṛhaṃ sadmani caikadeśaḥ
tatrāpi śayyā śayane varastrī ratlojjvalā rājyasukhasya sāraḥ
na hārairna ca mātaṅgairna rathairnaca pattibhiḥ
strīṇāmapāṅgadṛṣṭayaiva jīvate jagatāṃ trayam
acāpalaṃ bhayaṃ lajjā dākṣiṇyamanukūlatā
madhurasvarataudāryaṃ paṭutvaṃ priyavāditā
manaśśucitvaṃ lāvaṇyaṃ guruśuśrūṣaṇe ratiḥ
dharmajñatārjavaṃ satyaṃ kauśalaṃ sarvakarmasu
hṛṣṭatā smitabhāṣitvaṃ patidoṣanigūhanaṃ
vyavāyasaukhyamityete yoṣitāṃ pravarā guṇāḥ
strīṇāṃ rūpavatī śreṣṭhā surūpāsu sayauvanā
ratikauśalasārajñā gītavijñā ca nartakī
uttarottarametāsu śreṣṭhā pūrvaguṇairyutā
etaissarvaguṇairyuktā durlabhā ramaṇī bhuvi
jātisvabhāvaguṇadeśajadharmaceṣṭābhāveṅgiteṣu vikalo ratitantramūḍhaḥ
labdhvāpi hi svalati yauvanamaṅganānāṃ
kiṃ nārikelaphalamāpya kapiḥ karoti
padminī citriṇī cātha śaṅkhinī hastinī tathā