Shivattvaratnakara 88.1

88.1

avartata mahīpālo labdhvānandaparamparām
iti śrīmadanāthānantasakalatattvottīrṇaṣaḍadhvopādānabindukāraṇacidambaraśaktisamanvitaparameśvaraprasādāsāditaśivādvaitavidyāviśārada
śrīmatkeladivasavarājendraviracitavedāgamāntargatavividhavidyātantrasārabhūte
śrīśivatattvaratnākare saptamakallole
sāhityaśāstre nāṭaketihāsasvarūpanirūpaṇaṃ nāma ṣaṣṭhastaraṅgaḥ.
atha saptamastaraṃgaḥ
svāmin ! putrocitāste ke ? kathayasva mahotsavāḥ
yairānandamasāmānyamavāpeti prakīrtitam
teṣāṃ ca śravaṇe prītiradhikā vartate hṛdi
putra ! yatte'bhilaṣitaṃ tadbravīmi punaśśṛṇu
putrāṇāmupabhogo'yamadhunā parikīrtyate
jāte garbhe bhavet strīṇāṃ pāṇḍuraṃ gaṇḍamaṇḍalam
kucayoścūcukaṃ kṛṣṇaṃ jaṭharaṃ kiñcidunnatam
tṛtīye māsi saṃprāpte kuryāt puṃsavanakriyām
śravaṇe mṛgaśīrṣe ca haste puṣye punarvasau
mūle puṃsaṃjñite dhiṣṇye vāre'ṅgāre bṛhaspatau
māṣadvitayamadhyasthaṃ yavaṃ ghṛtasamanvitam
prāśayettu patiḥ patnīṃ vedamantramanusmaran
evaṃ puṃsavane jāte garbhasthaḥ puruṣo bhavet
aṣṭame māsi ṣaṣṭhevā dhiṣṇye punnāmake punaḥ
sīmantonnayanaṃ kuryādaṣṭamaṅgalasaṃyutam
udumbaraphalaiḥ klṛptaṃ kuryāt kaṇṭhavibhūṣaṇam
kuśapuṣpavimiśreṇa śalalyagreṇa mūrdhani
sīmantonnayanaṃ kuryād bhāryāyāḥ pṛthivīpatiḥ
vaiṇikairvādayadbhiñca 1) somarāgaṃ manoharam
uccārayatsu vipreṣu sāmamantrān śubhākṣarān
paṭahādibhiranyaiśca tūryaiḥ pañcamahāsvanaiḥ
aṣṭamaṅgalanāmānaṃ kuryādutsavamūrjitam
toṣayed dvijamukhyāṃśca gobhūsvarṇāmbarādibhiḥ
saṃpūrṇe navame māsi jāte putre manoharam
jātakarma prakurvīta svagṛhyoktavidhānataḥ
sauvarṇamudrikālipte prāśayenmadhusarpiṣī
bālakaṃ tu tato mātuḥ pāyayecca payodharam
tatrāmyudayikaṃ śrāddhaṃ hemnā kurvīta bhūpatiḥ
daśamāddvisādūdhvaṃmuttarātritaye mṛge
aśvinī rohiṇī svātī revatī mūla puṣyayoḥ