Rasaratnakara 2.3
Rasaratnākara 2.3
- Language
- Sanskrit
2.3.1
RRĀ, 2, 3
divyayogaguṭikārasāyanaṃ krāmaṇena rahitaṃ na sidhyati /
śīghrasiddhikarameva sevyatāṃ krāmaṇārtham anupānamatra vai //
2.3.2
kākatumbī kākamācī nirguṇḍī ca kumārikā /
gojihvā saindhavaṃ guñjā hy ārdrakaṃ ca samaṃ samam //
2.3.3
piṣṭvā tena praleptavyā mūṣā sarvāṅgulāvadhi /
pāradaṃ vyomasattvaṃ ca kāntaṃ tīkṣṇaṃ ca muṇḍakam //
2.3.4
tāpyasattvaṃ ca tulyāṃśaṃ sarvaṃ saṃcūrṇya mardayet /
dinaṃ jambīrajairdrāvaistanmūṣāyāṃ vinikṣipet //
2.3.5
ācchādyālepya kalkena cāndhayitvā viśoṣayet /
karīṣāgnau divārātraṃ puṭe paktvā samuddharet //
2.3.6
punaḥ praliptamūṣāyāṃ kṣiptvā ruddhvā puṭet tataḥ /
ityevaṃ daśamūṣāsu praliptāsu vipācayet //
2.3.7
jāyate guṭikā divyā mṛtasaṃjīvanī parā /
vaktre śirasi kaṇṭhe vā karṇe vā dhāritā kare //
2.3.8
hemnā suveṣṭitā samyagvayaḥstambhakarī parā /
valīpalitakālāgnimṛtyuśaṅkāvināśanī //
2.3.9
varṣamātrān na saṃdeho jīved varṣaśatatrayam /
śuddhapalaikaṃ tu gavāṃ kṣīraiḥ pibetsadā //
2.3.10
anena tv anupānena dehe saṃkramate rasaḥ /
samukhaṃ pāradaṃ kāntaṃ muṇḍalohābhrasattvakam //
2.3.11
tattvaṃ mṛtaṃ vajraṃ sarvaṃ jambīrajair dravaiḥ /
saptāhaṃ mardayet tulyaṃ kṛtvā golaṃ samuddharet //
2.3.12
nirguṇḍī saindhavaṃ kṣaudraṃ gojihvā kākatuṇḍikā /
piṣṭvā tu lepayedgolaṃ sarvato 'ṅgulamātrakam //
2.3.13
taṃ ruddhvā vajramūṣāyāṃ pacedyāmaṃ tu bhūdhare /
liptvā ruddhvā punaḥ pācyamityevaṃ pakṣamātrakam //
2.3.14
yavaciñcāpalāśottharājīkārpāsabījakaiḥ /
supiṣṭair lepayenmūṣāṃ tanmadhye pūrvagolakam //
2.3.15
ṭaṅkaṇaṃ śvetakācaṃ ca dattvā pṛṣṭhe nirudhya ca /
khadirāṅgārayogena dhamed yāvad drutaṃ bhavet //
2.3.16
tatastaṃ viḍaliptāyāṃ mūṣāyāṃ ca niveśayet /
tattulyaṃ dāpayetsvarṇaṃ jayettaṃ dhaman dhaman //
2.3.17
jīrṇe svarṇe samuddhṛtya taptakhalve vimardayet /
tryahaṃ divyauṣadhidrāvair vajramūṣāndhitaṃ dhamet //
2.3.18
jāyate guṭikā divyā nāmnā vajreśvarī parā /
vaktrasthā sā jarāṃ mṛtyuṃ hanti saṃvatsarātkila //
2.3.19
śastrastambhaṃ ca kurute brahmāyur yacchati dhruvam /
kṛṣṇāṣṭamyāṃ samādāya sahadevīṃ su cūrṇayet //
2.3.20
karṣaikāṃ bhakṣayed ājyairanu syāt krāmeṇa hitam /
āraktaṃ meghanādaṃ tu tathā pāṣāṇabhedakam //
2.3.21
strīstanyasahitaṃ piṣṭvā tena mūṣāṃ pralepayet /
bhagaikaṃ mṛtavajrasya svarṇacūrṇasya ṣoḍaśa //
2.3.22
kṣiptvā tasyāṃ nirudhyātha yāmamātraṃ dṛḍhaṃ dhamet /
uddhṛtya nikṣipetkhalve śuddhasūtaṃ ca tatsamam //
2.3.23
mardayec cārdrakadrāvair yāvadbhavati golakaḥ /
caṇḍālīkandamādāya strīstanyena su peṣayet //
2.3.24
anena golakaṃ liptvā vajramūṣāyāṃ nirodhayet /
paktvā gajapuṭe grāhyā guṭikā vajrasundarī //
2.3.25
varṣaikaṃ dhārayedvaktre jīvedbrahmadinatrayam /
brahmavṛkṣasya tvakcūrṇaṃ kṣīrairnityaṃ palaṃ pibet //
2.3.26
krāmaṇaṃ hy anupānaṃ syāt sādhakasyātisiddhidam /
tadudbhavamalair liptaṃ tāmraṃ tu dhamanena hi //
2.3.27
jāyate kanakaṃ divyaṃ satyaṃ śaṃkarabhāṣitam /
samukhasya rasendrasya pūrvavatkāñcanaṃ samam //
2.3.28
jārayed viḍayogena tato mardyaṃ dinatrayam /
divyauṣadhaiḥ sagomūtrair vajramūṣāndhitaṃ dhamet //
2.3.29
uddhṛtya dhārayedvaktre guṭikā hemasundarī /
palārdhaṃ gandhakaṃ cājyair dviguṇair lehayedanu //
2.3.30
varṣaikena jarāṃ hanti jīved ācandratārakam /
śuddhasūtaṃ mṛtaṃ vajraṃ vyomasattvaṃ sahāṭakam //
2.3.31
amlavarge samaṃ sarvaṃ mardayed divasatrayam /
tadgolakaṃ dṛḍhaṃ kṛtvā chāyāyāṃ śoṣayettataḥ //
2.3.32
brahmakārpāsabījāni rājikā yavaciñcikā /
vandhyā sarvaṃ samaṃ piṣṭvā pūrvagolaṃ pralepayet //
2.3.33
ruddhvā gajapuṭe pacyāt samuddhṛtyātha lepayet /
ruddhvā mūṣāyāṃ dhamedgāḍhaṃ guṭikā vajrakhecarī //
2.3.34
jāyate dhāritā vaktre vatsarān mṛtyunāśinī /
bhūtāravaṭacūrṇaṃ tu palaikaṃ sitayā yutam //
2.3.35
bhakṣayet krāmaṇārthaṃ tu brahmāyurjāyate naraḥ /
kārpāsyāḥ kākamācyāśca kanyāyāśca daladravaiḥ //
2.3.36
śuddhasūtaṃ dinaṃ mardyaṃ kṣālyam amlaiḥ samuddharet /
tadrasaṃ niṣkacatvāri niṣkārdhaṃ tāmracūrṇakam //
2.3.37
pādonaniṣkamabhrotthaṃ sattvaṃ pādaṃ ca hāṭakam /
hematulyaṃ muṇḍacūrṇaṃ sarvamamlairvimardayet //
2.3.38
dinānte golakaṃ kṛtvā jambīrasyodare kṣipet /
tridinaṃ dolakāyantre pācayet sāranālake //
2.3.39
uddhṛtya dhārayedvaktre guṭikā vyomasundarī /
varṣamātrāj jarāṃ hanti jīvedbrahmadinaṃ naraḥ //
2.3.40
citramūlasya cūrṇaṃ tu sakṣaudraṃ kāntapātrake /
āloḍya bhakṣayet karṣamanu syātkrāmaṇe hitam //
2.3.41
niṣkamekaṃ svarṇapattraṃ triniṣkaṃ śuddhapāradam /
jambīraśarapuṅkhotthadravair mardyaṃ dināvadhi //
2.3.42
tadgolaṃ bandhayedvastre paced gokṣīrapūrite /
dolāyantre divārātraṃ guṭikā hāṭakeśvarī //
2.3.43
jāyate dhāritā vaktre jarāmṛtyuvināśinī /
varṣamātrān na saṃdeho jīvedvarṣāyutaṃ naraḥ //
2.3.44
dinaikaṃ triphalācūrṇaṃ kvāthaiḥ khadirabījakaiḥ /
bhāvitaṃ madhusarpirbhyāṃ palaikaṃ krāmakaṃ lihet //
2.3.45
rasaniṣkatrayaṃ śuddhaṃ niṣkaikaṃ tāmracūrṇakam /
ciñcāphalāmlatakrābhyāṃ khalve mardyaṃ dināvadhi //
2.3.46
tadgolaṃ bandhayed vasrais takraciñcāmlapūrite /
dolāyantre dinaṃ pacyādguṭikārkaprabhāvatī //
2.3.47
varṣaikaṃ dhārayedvaktre sūryatulyo bhaven naraḥ /
pālāśabījajaṃ tailaṃ gokṣīraiḥ karṣamātrakam //
2.3.48
krāmakaṃ hy anupānaṃ syāj jarāmṛtyuharaṃ param /
svarṇamekaṃ kāntamekaṃ pañcatāraṃ dvipāradam //
2.3.49
tribhāgaṃ vyomasattvaṃ syāt ṣaḍbhāgaṃ śulbacūrṇakam /
sarvametatkṛtaṃ sūkṣmaṃ taptakhalve dinatrayam //
2.3.50
mardayedamlavargeṇa dolāyantre sakāñjike /
tadgolaṃ tridinaṃ pacyādguṭikā surasundarī //
2.3.51
jāyate dhāritā vaktre varṣānmṛtyujarāpahā /
bhūtāravaṭamūlaṃ ca karṣaṃ kṣīraiḥ pibedanu //
2.3.52
svarṇatārārkamuṇḍaṃ ca vaṅgasīsābhrasattvakam /
etatsarvaṃ samaṃ cūrṇaṃ cūrṇāṃśaṃ mṛtavajrakam //
2.3.53
sarvatulyaṃ śuddhasūtaṃ sarvaṃ divyauṣadhidravaiḥ /
mardayed dinamekaṃ tu vajramūṣāndhitaṃ dhamet //
2.3.54
guṭikā vajratuṇḍeyaṃ jāyate dhāritā mukhe /
jarāmṛtyuṃ śastrasaṃghaṃ nāśayedvatsarātkila //
2.3.55
vajrakāyo mahāvīro jīvedvarṣaśatatrayam /
kumāryāḥ svarasaṃ grāhyaṃ guḍena saha loḍayet //
2.3.56
palaikaṃ krāmakaṃ lehyamanupānaṃ sadaiva hi /
svarṇacūrṇaṃ tu bhāgaikaṃ tribhāgaṃ śuddhapāradam //
2.3.57
pādabhāgaṃ mṛtaṃ vajraṃ tatsarvaṃ kṣīrakandajaiḥ /
dravaiśca devadālyutthaistaptakhalve dināvadhi //
2.3.58
mardayet kāntacūrṇaṃ ca vajratulyaṃ kṣipec ca vai /
vajramūṣāndhitaṃ dhāmyaṃ guṭikā kāmasundarī //
2.3.59
jāyate dhāritā vaktre varṣānmṛtyujarāpahā /
niṣkatrayaṃ brahmatailaṃ gavāṃ kṣīraṃ paladvayam //
2.3.60
miśritaṃ pāyayec cānu lakṣāyurjāyate naraḥ /
lohapātre drute gandhe pādāṃśaṃ pāradaṃ kṣipet //
2.3.61
kiṃcic cālyaṃ tu kāṣṭhena muhūrtād avatārayet /
śatāvarī kṣīrakando vajravallīndravāruṇī //
2.3.62
pāṭhā punarnavā ciñcā lāṅgalī suradālikā /
etāsāṃ vastrapūtaiśca dravairmardyaṃ dinatrayam //
2.3.63
tasmin pātre lohamuṣṭyā chāyāśuṣkaṃ vaṭīkṛtam /
lohasampuṭagaṃ ruddhvā saṃdhiṃ mṛllavaṇair dṛḍham //
2.3.64
taṃ dhamet khadirāṅgāre yāvadāraktamuddharet /
utkhanyotkhanya tanmadhyād uddharet tadrasaṃ punaḥ //
2.3.65
kācaṭaṅkaṇasaṃyuktaṃ mūṣāyāṃ cāndhitaṃ pacet /
gāndhārīguṭikā siddhā varṣaṃ vaktre sthitā sadā //
2.3.66
kākatuṇḍībījatailaṃ karṣaikaṃ nasyamācaret /
krāmakaṃ hy anupānaṃ syāj jīvedvarṣasahasrakam //
2.3.67
śuddhasūtasamaṃ gandhaṃ mardanāt kajjalīkṛtam /
tat tāmrasampuṭe ruddhvā lavaṇena mṛdā dṛḍham //
2.3.68
śuṣkaṃ dīpāgninā pacyād yāmaikaṃ bhasmayantrake //
2.3.69
sampuṭasyordhvalagnaṃ tatsamuddhṛtyātha mardayet /
tulyapāradasaṃyuktaṃ pūrvavatsampuṭe pacet //
2.3.70
uddhṛtya tulyasūtena saṃyuktaṃ marditaṃ pacet /
ityevaṃ saptadhā kuryātpunaḥ pāradaṭaṅkaṇam //
2.3.71
tulyaṃ tulyaṃ kṣipet tasmin dinaṃ sarvaṃ vimardayet /
vajramūṣāgataṃ ruddhvā dhmāte khoṭo bhavedrasaḥ //
2.3.72
mārtaṇḍī guṭikā hy eṣā varṣaikaṃ yasya vaktragā /
valīpalitamukto 'sau jīvedācandratārakam //
2.3.73
palāśabījajaṃ tailaṃ palaikaṃ kṣīratulyakam /
krāmaṇaṃ prapiben nityaṃ tatkṣaṇān mūrchito bhavet //
2.3.74
tasya vaktre gavāṃ kṣīraṃ stokaṃ stokaṃ niṣecayet /
prabuddhe kṣīramannaṃ syādbhojane paramaṃ hitam //
2.3.75
tasya mūtrapurīṣābhyāṃ tāmraṃ bhavati kāñcanam /
vāyuvego mahāsiddhaś chidrāṃ paśyati medinīm //
2.3.76
kākamācyamṛtādrāvaiḥ pāradaṃ tālakaṃ samam /
mardayed dinamekaṃ tu kṛtvā golaṃ viśoṣayet //
2.3.77
nikṣiped vajramūṣāyāmācchādya lohaparpaṭaiḥ /
ruddhvā saṃdhiṃ dhamedgāḍhaṃ khoṭabaddho bhavedrasaḥ //
2.3.78
lohaparpaṭakaṃ dattvā tadvad dhāmyaṃ tridhā punaḥ /
varṣaikaṃ dhārayedvaktre guṭikā tārakeśvarī //
2.3.79
vākucībījakarṣaikaṃ gavāṃ kṣīraiḥ pibedanu /
vyomasattvaṃ mṛtaṃ vajraṃ svarṇatārārkamuṇḍakam //
2.3.80
tīkṣṇaṃ kāntaṃ tālakaṃ ca śuddhaṃ kṛtvā vimiśrayet /
sūkṣmacūrṇaṃ samaṃ sarvaṃ cūrṇāṃśaṃ śuddhapāradam //
2.3.81
tridinaṃ cāmlavargeṇa marditaṃ cāndhitaṃ dhamet /
vidyāvāgīśvarī khyātā guṭikā vatsarāvadhi //
2.3.82
yasya vaktre sthitā tasya jarā mṛtyurna vidyate /
karṣaṃ jyotiṣmatītailaṃ krāmaṇārthaṃ pibetsadā //
2.3.83
vākpatirjāyate dhīro jīvec candrārkatārakam /
kāntapāṣāṇamākṣīkaṃ ṭaṅkaṇaṃ karkaṭāsthi ca //
2.3.84
snuhyarkakṣīrabhūnāgaṃ sarvametatsamaṃ bhavet /
strīstanyena dinaṃ mardyaṃ tena mūṣāṃ pralepayet //
2.3.85
tanmadhye drutasūtaṃ tu vajrabhasma samaṃ samam /
kṣiptvā ruddhvā puṭe pacyādgajākhye yāmamātrakam //
2.3.86
tataḥ praliptamūṣāyāṃ kṣiptvā ruddhvā dhameddhaṭhāt /
evaṃ punaḥ punaḥ kāryaṃ vajrasūtaṃ milatyalam //
2.3.87
tatastasyaiva dātavyaṃ samaṃ kācaṃ saṭaṅkaṇam /
evaṃ mūṣāśate deyaṃ tulyaṃ tulyaṃ dhaman dhaman //
2.3.88
tejaḥpuñjo rasendro'sau bhaven mārtaṇḍasaṃnibhaḥ /
guṭikā vajratuṇḍeyaṃ vaktrasthā mṛtyunāśinī //
2.3.89
varṣamātrān na saṃdeho rudratulyo bhaven naraḥ /
tasya mūtrapurīṣābhyāṃ pūrvavatkāñcanaṃ bhavet //
2.3.90
pañcāṅgaṃ bhakṣayetkarṣaṃ rudantyā madhusarpiṣā /
ṭaṅkaṇaṃ karkaṭāsthīni ūrṇā caiva śilājatu //
2.3.91
mahiṣīkarṇanetrotthaṃ malaṃ strīstanyakaiḥ samam /
piṣṭvā talliptamūṣāyām abhrasattvaṃ kṣipeddhamet //
2.3.92
sattvatulyaṃ kṣipettatra pūrvavad drutapāradam /
dravaṃ divyauṣadhīnāṃ ca dattvā tatraiva taddhamet //
2.3.93
milito jāyate baddhaḥ pūrvavat kācaṭaṅkaṇaiḥ /
dhmāto mūṣāśatenāyaṃ tejaḥpuñjo bhavedrasaḥ //
2.3.94
varṣaikaṃ dhārayedvaktre śivatulyo bhaven naraḥ /
ajarāmarakārīyaṃ guṭikā gaganeśvarī //
2.3.95
bilvabījotthitaṃ tailaṃ niṣkamātraṃ pibedanu /
udare jāyate vahniḥ pibetkṣīraṃ punaḥ punaḥ //
2.3.96
sākṣāj jātismaratvaṃ ca kavitvaṃ śrutadhāraṇam /
khecaratvamadṛśyatvaṃ jāyate nātra saṃśayaḥ //
2.3.97
agnimantho vajravallī sūraṇaṃ vanaśūraṇam /
citrakaśca dravaireṣāṃ śuddhasūtaṃ dināvadhi //
2.3.98
mardayettaptakhalve tu taṃ rasaṃ palamātrakam /
palaṃ palaṃ tālavaṅgau tatsarvaṃ cāmlavetasaiḥ //
2.3.99
mardayed dinamekaṃ tu kṛtvā taṃ golakaṃ punaḥ /
catuḥpalāṃ nāgamūṣāṃ kṛtvā tasyāṃ tu tatkṣipet //
2.3.100
catuḥpale śuddhatāmrasampuṭe tāṃ nirodhayet /
mṛṇmūṣāyāṃ tu tāṃ ruddhvā āraṇyotpalakaiḥ puṭet //
2.3.101
śatadvayapramāṇaistu svāṅgaśītaṃ samuddharet /
sarvaṃ divyauṣadhadrāvair mardayed divasatrayam //
2.3.102
caturniṣkamitā kāryā vaṭikā śoṣayettataḥ /
ekaikāṃ vajramūṣāyāṃ ruddhvā tīvrāgninā dhamet //
2.3.103
ānandaguṭikā hy eṣā vaktrasthā mṛtyunāśinī /
vatsarān nātra saṃdeho jīvedbrahmadinatrayam //
2.3.104
tailaṃ vātāribījotthaṃ gokṣīrair niṣkamātrakam /
krāmaṇārthaṃ piben nityaṃ śīghrasiddhikaraṃ param //
2.3.105
vajrabhasmasamaṃ sūtaṃ haṃsapādyā dravaistryaham /
marditaṃ dvaṃdvaliptāyāṃ mūṣāyāṃ cāndhitaṃ puṭet //
2.3.106
bhūdharākhye divārātrau samuddhṛtyātha tasya vai /
pūrvāṃśaṃ pāradaṃ dattvā haṃsapādyā dravaistryaham //
2.3.107
marditaṃ dvaṃdvaliptāyāṃ mūṣāyāṃ cāndhitaṃ dhamet /
tatkhoṭaṃ dhamanācchodhyaṃ kācaṭaṅkaṇayogataḥ //
2.3.108
nakṣatrābhaṃ bhaved yāvattāvaddhāmyaṃ punaḥ punaḥ /
tadrasaṃ vyomasattvaṃ ca kāñcanaṃ ca samaṃ samam //
2.3.109
samāvartya tataḥ kāryā guṭikā vaktramadhyagā /
vajrakhecarikā nāma vatsarān mṛtyunāśinī //
2.3.110
valīpalitanirmukto divyakāyo bhaven naraḥ /
nirguṇḍīmunicūrṇaṃ tu karṣamājyaiḥ pibedanu //
2.3.111
kāntaṃ śulbaṃ samaṃ cūrṇaṃ vajramūṣāndhitaṃ dhamet /
tatkhoṭasiddhacūrṇaṃ tu gandhakāmlena mardayet //
2.3.112
ruddhvā samyakpuṭe pacyātsamuddhṛtyātha mardayet /
pūrvavatkramayogena puṭed vārāṃścaturdaśa //
2.3.113
vajreṇa dvaṃdvitaṃ svarṇamanenaiva tu rañjayet /
mūṣāmadhye dhamann evaṃ saptavāraṃ samaṃ kṣipet //
2.3.114
tatkhoṭaṃ cūrṇitaṃ bhāvyaṃ strīpuṣpeṇa dināvadhi /
tattulyaṃ drutasūtaṃ tu sarvaṃ yāmaṃ vimardayet //
2.3.115
veṣṭayed bhūrjapattreṇa vastre baddhvā pacet tryaham /
dolāyantre sāranāle jātaṃ golaṃ samuddharet //
2.3.116
gāndhārī jīvanī caiva lāṅgalī cendravāruṇī /
etāsāṃ piṇḍakalkena veṣṭayetpūrvagolakam //
2.3.117
andhayitvā dinaṃ pacyādbhūdhare taṃ samuddharet /
punarlepyaṃ punaḥ pācyaṃ caturdaśadināvadhi //
2.3.118
guṭikā jāyate divyā nāmnā ratneśvarī tathā /
vaktrasthā varṣamātraṃ tu nanditulyo bhaven naraḥ //
2.3.119
jīvedvarṣasahasrāṇi divyatejā mahābalaḥ /
varṣadvādaśaparyantaṃ yasya vaktre sthitā tu sā //
2.3.120
tasya prasvedasamparkādaṣṭalohāni kāñcanam /
jāyante nātra saṃdehaḥ satyamīśvarabhāṣitam //
2.3.121
pañcāṅgacūrṇaṃ madhvājyai rudantyutthaṃ lihedanu /
svarṇaṃ kṛṣṇābhrasattvaṃ ca tāraṃ tāmraṃ sucūrṇitam //
2.3.122
samāṃśaṃ dvaṃdvaliptāyāṃ mūṣāyāṃ cāndhitaṃ dhamet /
tatkhoṭaṃ bhāgacatvāri bhāgaikaṃ mṛtavajrakam //
2.3.123
mākṣikaṃ tīkṣṇakāntaṃ ca bhāgaikaikaṃ sucūrṇitam /
samastaṃ dvaṃdvaliptāyāṃ mūṣāyāṃ cāndhitaṃ dhamet //
2.3.124
tatkhoṭaṃ sūkṣmacūrṇaṃ tu cūrṇāṃśaṃ drutasūtakam /
tridinaṃ taptakhalve tu mardyaṃ divyauṣadhidravaiḥ //
2.3.125
ruddhvātha bhūdhare pacyādahorātrātsamuddharet /
drutasūtaṃ punastulyaṃ dattvā mardyaṃ puṭettathā //
2.3.126
ityevaṃ saptavārāṃstu drutaṃ sūtaṃ samaṃ samam /
dattvā mardyaṃ puṭe pacyāj jāyate bhasmasūtakaḥ //
2.3.127
bhasmasūtasamaṃ gandhaṃ dattvā ruddhvā dhamed dṛḍham /
jāyate guṭikā divyā vikhyātā divyakhecarī //
2.3.128
varṣaikaṃ dhārayedvaktre jīvetkalpasahasrakam /
tasya mūtrapurīṣābhyāṃ sarvalohasya lepanāt //
2.3.129
jāyate kanakaṃ divyaṃ samāvarte na saṃśayaḥ /
paladvayaṃ bhṛṅgarājadravyaṃ cānu pibetsadā //
2.3.130
pūrvoktaṃ bhasmasūtaṃ vā guñjāmātraṃ sadā lihet /
varṣaikaṃ madhunājyena lakṣāyurjāyate naraḥ //
2.3.131
valīpalitanirmukto mahābalaparākramaḥ /
svarṇaṃ vaikrāntasattvaṃ ca dvaṃdvitaṃ jārayedrase //
2.3.132
samāṃśaṃ tu bhaved yāvattatastenaiva sārayet /
samena jāyate baddho dhārayettaṃ mukhe sadā //
2.3.133
saṃvatsaraprayogeṇa jarākālāpamṛtyujit /
kumāryā dalajaṃ drāvaṃ sitāyuktaṃ pibedanu //
2.3.134
svarṇavaikrāntabaddho'yaṃ brahmāyuryacchate nṛṇām /
vaikrāntasattvatulyāṃśaṃ śuddhasūtaṃ vimardayet //
2.3.135
dinaṃ divyauṣadhadrāvais tadgolaṃ nigaḍena vai /
liptvā lavaṇagarbhāyāṃ vajramūṣyāṃ nirodhayet //
2.3.136
chāyāyāṃ śoṣayetsaṃdhiṃ tridinaṃ tuṣavahninā /
svedayedvā karīṣāgnau divārātramathoddharet //
2.3.137
tadgolaṃ nigaḍenaiva liptvā tadvan nirudhya ca /
chāyāśuṣkaṃ dhamedgāḍhaṃ bandhamāyāti niścitam //
2.3.138
varṣaikaṃ dhārayedvaktre jīved brahmadinatrayam /
vaikrāntaguṭikā hy eṣā sarvakāmaphalapradā //
2.3.139
karṣaikaṃ triphalācūrṇaṃ madhvājyābhyāṃ lihedanu /
hemnā yaddvaṃdvitaṃ vajraṃ kuryāttatsūkṣmacūrṇitam //
2.3.140
etaddeyaṃ guhyasūte mūṣāyāmadharottaram /
pādamātraṃ prayatnena ruddhvā saṃdhiṃ viśoṣayet //
2.3.141
bhūdharākhye dinaṃ pacyātsamuddhṛtyātha mardayet /
divyauṣadhaphaladrāvais taptakhalve dināvadhi //
2.3.142
ruddhvātha bhūdhare pacyād dinaṃ laghupuṭaiḥ puṭet /
samuddhṛtya punastadvanmardyaṃ ruddhvā dinatrayam //
2.3.143
tuṣāgninā śanaiḥ svedyam ūrdhvādhaḥ parivartayan /
jāyate bhasmasūto'yaṃ sarvayogeṣu yojayet //
2.3.144
drutasūtasya bhāgaikaṃ bhāgaikaṃ pūrvabhasmakam /
śuddhanāgasya bhāgaikaṃ sarvamamlena mardayet //
2.3.145
andhamūṣāgataṃ dhāmyaṃ khoṭo bhavati tadrasaḥ /
dhametprakaṭamūṣāyāṃ yāvan nāgakṣayo bhavet //
2.3.146
drutasūtaprakāreṇa drāvayitvā tv imaṃ rasam /
nikṣipetkacchape yantre viḍaṃ dattvā daśāṃśataḥ //
2.3.147
svarṇādisarvalohāni krameṇaiva ca jārayet /
pratyekaṃ ṣaḍguṇaṃ paścād vajradvaṃdvaṃ ca jārayet //
2.3.148
triguṇaṃ tu bhavedyāvattato ratnāni vai kramāt /
jārayed drāvitāny eva pratyekaṃ triguṇaṃ śanaiḥ //
2.3.149
tato yantrātsamuddhṛtya divyauṣadhadravairdinam /
mardyaṃ ruddhvā dhamedgāḍhaṃ jāyate guṭikā śubhā //
2.3.150
pūjayedaṅkuśīmantrairnāmneyaṃ divyakhecarī /
yasya vaktre sthitā hy eṣā sa bhavedbhairavopamaḥ //
2.3.151
divyatejā mahākāyaḥ khecaratvena gacchati /
yatrecchā tatra tatraiva krīḍate hy aṅganādibhiḥ //
2.3.152
mahākalpāntaparyantaṃ tiṣṭhatyeva na saṃśayaḥ /
tasya mūtrapurīṣābhyāṃ tāmraṃ bhavati kāñcanam //
2.3.153
palāśapuṣpacūrṇaṃ tu tilāḥ kṛṣṇāḥ saśarkarāḥ /
sarvaṃ palatrayaṃ khāden nityaṃ syāt krāmaṇe hitam //
2.3.154
cūrṇam aśvakhurasyaiva guhyasūte samaṃ kṣipet /
tridinaṃ mātuluṅgāmlaistatsarvaṃ mardayed dṛḍham //
2.3.155
sūtatulyaṃ mṛtaṃ vajraṃ tasmin kṣiptvātha mardayet /
taptakhalve dinaṃ cāmlaistadgolaṃ cāndhitaṃ puṭet //
2.3.156
dinaikaṃ bhūdhare yantre bhāgaikaṃ pūrvapāradam /
kṣiptvā tasmin dṛḍhaṃ mardyaṃ mātuluṅgadravairdinam //
2.3.157
ruddhvātha pūrvavatpacyātpunardeyaśca pāradaḥ /
mardyaṃ pācyaṃ yathāpūrvamevaṃ kuryāc ca saptadhā //
2.3.158
rasaṃ punaḥ punardattvā syādevaṃ bhasmasūtakaḥ /
yojayetsarvayogeṣu jarāmṛtyuharo bhavet //
2.3.159
bhāgaikaṃ nāgacūrṇasya bhāgaikaṃ pūrvabhasmanaḥ /
drutasūtasya bhāgaikaṃ khoṭaṃ kuryāc ca pūrvavat //
2.3.160
tadvaddhāmyaṃ gate nāge drāvitaṃ jārayetpunaḥ /
pūrvaval loharatnāntaṃ jīrṇe baddhā sthitā mukhe //
2.3.161
pracaṇḍakhecarīnāmnī guṭikā khe gatipradā /
pūrvaval labhate vīraḥ phalamatyantadurlabham //
2.3.162
nirguṇḍīmūlacūrṇaṃ tu karṣaṃ takraiḥ pibedanu /
śuddhasūtasya dātavyaṃ kalāṃśaṃ mṛtavajrakam //
2.3.163
tatsarvamamlavargeṇa taptakhalve dinatrayam /
mardayitvā tatastena lepayetsamabhāgataḥ //
2.3.164
pakvabījasya pattrāṇi tāni bhānudalaiḥ punaḥ /
veṣṭitāni nirudhyātha nikhanec culligarbhataḥ //
2.3.165
ācchādya jvālayettatra kāṣṭhāgniṃ divasatrayam /
uddhṛtya dvaṃdvaliptāyāṃ mūṣāyāṃ taṃ nirodhayet //
2.3.166
karīṣāgnau puṭe pacyādahorātrātsamuddharet /
vāsanāmukhite sūte tulyametadvinikṣipet //
2.3.167
amlena mardayedyāmaṃ jātaṃ golaṃ samuddharet /
kṣipejjambīragarbhe taṃ vastre baddhvā tryahaṃ pacet //
2.3.168
dolāyantre sāranāle jāyate guṭikā śubhā /
kaṅkālakhecarī nāmnā vaktrasthā mṛtyunāśinī //
2.3.169
varṣaikaṃ dhārayedyastu sa jīvedbrahmaṇo dinam /
gandhakaṃ gugguluṃ tulyamājyaiḥ karṣaṃ lihedanu //
2.3.170
kṛṣṇābhrakasya sattvaṃ tu kāntamākṣīkakāñcanam /
tīkṣṇaṃ sauvīracūrṇaṃ ca tulyaṃ ruddhvā dhamed dṛḍham //
2.3.171
tatkhoṭaṃ sūkṣmacūrṇaṃ tu drutasūtasamaṃ bhavet /
sūtārdhaṃ māritaṃ vajraṃ sarvamamlena mardayet //
2.3.172
dinaikaṃ taptakhalve tu taṃ ruddhvā bhūdhare pacet /
ahorātrātsamuddhṛtya tatsamaṃ pūrvasūtakam //
2.3.173
dattvā divyauṣadhadrāvairmardyaṃ sarvaṃ dināvadhi /
pūrvavadbhūdhare pacyād drutasūtaṃ punaḥ samam //
2.3.174
dattvā mardyaṃ punaḥ pacyādityevaṃ saptavārakam /
etadbhasmasamaṃ gandhaṃ dattvā cāndhyaṃ dhamed dṛḍham //
2.3.175
jāyate guṭikā divyā kālavidhvaṃsikā parā /
yasya vaktre sthitā hy eṣā tasya kālaḥ karoti kim //
2.3.176
varṣaṣaṭkaprayogeṇa jīvetkalpasahasrakam /
tadgātrasvedamātreṇa sarvalohāni kāñcanam //
2.3.177
jāyante nātra saṃdehaḥ śivāmbu krāmakaṃ pibet /
svarṇatārārkakāntaṃ ca tīkṣṇacūrṇaṃ samaṃ samam //
2.3.178
dvaṃdvamelāpaliptāyāṃ mūṣāyāṃ cāndhitaṃ dhamet /
tatkhoṭaṃ cūrṇitaṃ kṛtvā cābhiṣiktaṃ tu pūrvavat //
2.3.179
samukhe jārayetsūte yāvatpañcaguṇaṃ kramāt /
divyauṣadhadravaistaṃ vai mardayed divasatrayam //
2.3.180
andhamūṣāgataṃ dhmātaṃ jāyate guṭikā śubhā /
nāmnā pañcānanā dhāryā vaktre saṃvatsarāvadhi //
2.3.181
valīpalitanirmukto jīvec candrārkatārakam /
hastikarṇī samūlā tu cūrṇyā madhvājyasaṃyutā //
2.3.182
snigdhabhāṇḍe tu tāṃ ruddhvā dhānyarāśau niveśayet /
trisaptāhātsamuddhṛtya palaikaṃ bhakṣayedanu //
2.3.183
ṛddhikhaṇḍe tu yatproktaṃ vividhaṃ rasabandhanam /
atra tasyaiva vakṣyāmi dehavedhakramaṃ yathā //
2.3.184
jāritair bandhitais tais tai rasarājaiḥ pṛthakpṛthak /
kārayedguṭikāṃ divyāṃ badarāṇḍapramāṇakām //
2.3.185
sā dhāryā vatsaraṃ vaktre svānurūpaphalapradā /
guṭikā śatavedhī syādyugāyuṣyakarī nṛṇām //
2.3.186
sahasravedhī guṭikā aṣṭakalpāntarakṣikā /
lakṣavedhakarī yā tu sā datte viṣṇuvadbalam //
2.3.187
vedhikā daśalakṣe yā sā rudrapadadāyinī /
koṭivedhakarī yā sā īśvaratvakarī nṛṇām //
2.3.188
vedhikā daśakoṭīnāṃ sā sadākhyapadapradā /
guṭikārbudavedhī yā sā śrīkaṇṭhapadapradā //
2.3.189
samyagbhavapadaṃ datte guṭikā śaṅkhavedhikā /
dhūmravedhī tu yā siddhā sā śaktipadadāyinī //
2.3.190
parāśaktipadaṃ datte sparśavedhakarī tu yā /
śabdavedhakarā yā tu sā yasya vatsarāvadhi //
2.3.191
vaktre sthitā sa vai siddho nityaṃ nityapadaṃ labhet /
svecchācārī vajrakāyo vajrapātairna bhidyate //
2.3.192
tasya mūtrapurīṣābhyāṃ sarvalohāni kāñcanam /
jāyante svedasamparkād gātrasaṃsparśanādapi //
2.3.193
sarveṣām uktayogānām anu syācchuddhagandhakam /
palārdhaṃ bhakṣayen nityaṃ rasasaṃkrāmaṇe hitam //
2.3.194
kāli kāli mahākāli māṃsaśoṇitabhojini /
raktakṛṣṇamukhe devi rasasiddhiṃ dadasva me //
2.3.195
svāhā anena siddhamantreṇa śakticakraṃ prapūjayet /
kālikāṃ bhairavaṃ siddhān kumārīṃ sādhitaṃ rasam //
2.3.196
tato rasāyanaṃ divyaṃ sevayet siddhimāpnuyāt /
guṭikāṃ dhārayedvaktre pūrvamantraṃ japetsadā //
2.3.197
rasamantraprayogeṇa śīghraṃ siddhimavāpnuyāt /
kālāntarasasiddhiryā proktā manthānabhairave //
2.3.198
tadarthaṃ pañca tattvāni ṣaṣṭhaṃ jīvaṃ ca sādhayet /
kākinyāḥ puṣpakāle tu saṅgaṃ kṛtvā samāharet //
2.3.199
tadyonisthaṃ rajobījaṃ gaganaṃ taṃ vidurbudhāḥ /
kākinyutpannaputrasya sadyoviḍvāyurucyate //
2.3.200
tejastu kākinīpuṣpaṃ jalaṃ tatputraśoṇitam /
kākinīputrasarvāṅgaṃ pṛthivītattvamucyate //
First 200 of 222 passages. Read on
Linked texts (1)
- Indrajāla — Śivaśarman, Sanskrit