Ashtangasamgraha 11

Śaśilekhā 11

Language: Sanskrit

11.23

11.25

sūpe sādhuḥ sūpyaḥ | teṣāṃ sūpyānāṃ mudgā uttamāḥ pravarāḥ | atilaghavaḥ svalpavātalāśca | teṣu mudreṣu madhye haritāḥ śādvalavarṇā varāḥ śreṣṭhāḥ | kṛṣṇāstvavarāḥ | makuṣṭhāstu krimikarāḥ | masūrāḥ pralepādibhiryuktāḥ paramatyarthena varṇakarāḥ saṅgrahaṇāśca ||

11.27

rājamāṣo guruḥ prabhūtapurīṣaḥ | rūkṣotivātalaśca | kulatthāḥ kaṣāyamadhurā rūkṣā uṣṇavīryāḥ raktapittakarāḥ pīnasādināśanāśca | śukrāśmarīṃ ghnanti | śukraṃ retaḥ tenāśmarī vakṣyamāṇā | dṛṣṭiṃ darśanaśaktiṃ ca nāśayanti | saṅgrahaṇā laghavastīkṣṇā amlavipākā vidāhinaḥ ||

11.29

niṣpāvastu saratvādiyuktaḥ vātakaraḥ uṣṇavīryaḥ vidāhī dṛśaṃ retaḥ kaphaṃ śophaṃ viṣaṃ ca nāśayati | niṣpāvo rājaśimbiḥ ||

11.31

māṣaḥ snigdhatvādiyuktaḥ | malaṃ purīṣam | śukrasya rataso vṛddhiṃ bahutvaṃ virekaṃ bahiḥ preraṇaṃ ca karoti | kākā-

11.32

anuktānāṃ sāmānyamucyate | vividhāḥ śimbijātayo madhurāḥ śītavīryā gurvyo balaghnyo raukṣyāpādanasvabhāvāḥ | tāśca snehāḍhayā ghṛtādivahalāḥ satyo balavadbhiḥ puruṣairbhojyāḥ ||

11.34

tilaḥ snigdhatvādiyuktaḥ | rase tiktādiyuktaḥ| vipāke kaṭukaḥ | mūtrasyālpatvakarolpamūtraḥ| medhāgnikaphapittakaraśca| medhā prajñā | teṣu ca tileṣu madhye kṛṣṇatilaḥ śreṣṭhaḥ | tataḥ śukla ūnaḥ | śuklādapyaruṇa ūnataraḥ ||

11.35

umā atasī snigdhā rasena madhuratiktā uṣṇavīryā kaphapittakarī gurvī ca | dṛśaṃ śukraṃ ca nāśayati | kaṭuvipākā ca | tadvadumāvat kusumbhabījam ||

11.37

iti śimbidhānyavargaḥ |
atra śimbidhānyavarge māṣaḥ aśreṣṭhaḥ | śūkadhānyamadhye yavakaḥ aśreṣṭhaḥ | navamagatasaṃvatsaraṃ dhānyamabhiṣyandi mālinyena srotasāṃ srāvakam | tathā sekye bahūdake kedāre jātaṃ
abhiṣyandi | laghu varṣoṣitam | tathā dagdhabhūmijam | tathā sthalasambhavaṃ nirudakakedārajam | śīghrajanma acirakālapākam | tathā sūpyaṃ mudgādi tuṣarahitaṃ yuktyā ca bharjitaṃ sat nistuṣam | iti śimbidhānyavargaḥ ||

11.39

dhānyānāṃ svarūpamuktam | anantaroktāni raktādīni satsvapi svarūpaguṇeṣu saṃyogasaṃskārapramāṇādiviśeṣeṇa guṇāntarayogamapi yānti tadvijñānārthaṃ kṛtānnavargāmbhaḥ | maṇḍādīnāṃ yathāpūrvaṃ laghutvam | tenaitaduktaṃ bhavati | odanamapekṣya laghvī vilepikā | tato'pi peyā dravā laghutarā | tato'pi maṇḍo'tyarthadravo laghuḥ | odanasya pūrvaṛtvābhāvānna laghutvaṃ na gurutvamuktam | etadeva nirdhārayati | maṇḍo vātasyānulomanaḥ | tṛḍādighnaśca | doṣasya vamanavirecanādinā nirhṛtasya śeṣo doṣaśeṣaḥ | pācano dhātusāmyakaraśca | srotomārdavaṃ karoti | svedayanyagni coddīpayati ||

11.40

peyā kṣudādiharā ||

11.41

vilepikā saṅgrāhiṇī hṛdyā tṛṣṇāghnī dīpanī ca vraṇādīnāṃ ca hitā | saṃśuddhaḥ kṛtavamanavirecanaḥ ||

11.43

odanaḥ suṣṭhu dhautaḥ prasrutaḥ svinnaḥ tyaktabāṣpaśca laghuḥ | ūṣmā bāṣpo jalabhāgo gurutvahetuḥ | atyuṣṇātiśītayoḥ pramāṇāntarāniṣedhaḥ | kecit siddhyuṣṇasya lāghavamabhyupagacchantaḥ svinnaḥ atyaktoṣmā ceti paṭhanti | yatra caiṣāṃ punaruktapratiṣedhaḥ sa siddhiśabdāśayaḥ yaścaudana āgneyānāṃ maricādināṃ kvāthena saṃsiddhaḥ so'pi laghuḥ | tathā bhṛṣṭaistaṇḍulaiḥ siddha odano laghuḥ | yathoktalakṣaṇādodanādviparīto guruḥ | kṣīramāṃsādibhirmadhuraiśca sādhitaḥ so'pi guruḥ | ityanayā diśā sarvaṃ kṛtānnaṃ dravyasya svarūpeṇa kriyayā saṃyogena pramāṇena ca boddhavyam | kiṃ svarūpeṇa guṇānāṃ svanibandhakena upabṛṃhakena saṃyoginā dravyeṇa saṃyuktamiti nānāvidhavikalpanena kṛtānnasvarūpaṃ jānīyāt |

11.45

11.47

maudgastu raso nirmolsayūpaḥ saṃśuddhādīnāṃ pathyaḥ | kaulattho raso vāsamalulomayati gulmādināśanaṃ ca | tūnipratūnī rogau gulmanidāne vakṣyamāṇalakṣaṇau | māṣasūpaḥ paramatyarthamāntaraṃ malaṃ purīṣaṃ prabhūtaṃ karoti | māṣāṇāṃ bahumalatve ukte'pi anyebhyamtadvikṛtibhyaḥ sūpasyātiśayakhyāpanārthaṃ vacanam ||

11.49

khalakāmbalikau hṛdyau chedinau svasaṃskārakauṣadhaguṇayuktau ca | rasādīnāṃ vyavahārārthaṃ lakṣaṇamucyate | piśitena māṃsena yaḥ kriyatesa rasaḥ | dhānyairmudgādibhiryaḥ kriyate sa yūṣaḥ | phalairbadarādibhiryaḥ kriyate sa khalaḥ | mūlaistilaistilakalkaiśca kṛto dāḍimādyamlaprāyaḥ kāmbalikaḥ | te tu rasādayo yathāsaṅkhyena snehādiyutavarjitāḥ kṛtākṛtā jñeyāḥ | tenaitaduktaṃ bhavati snehādibhirbharjanena śuṇṭhyā dinā ca saṃskṛtāḥ kṛtaśabdavācyāḥ | viparītāḥ akṛtāḥ| ye svalpena māṃsena svalpaiśca śuṇṭhyādibhiḥ kriyante svacchāmca te rasādayo dakalāvaṇikāḥ ||

11.52

yūṣarasasūpaśākānāṃ yathottarameva gauravaṃ vijñeyaṃ dravyaguṇasāmye'pi | tathā tanusāndrāmlasvāduṣu ca pṛthak yathottarameva gauravaṃ vijñeyamiti | tenaitaduktaṃ bhavati | tanubhyorasādisyaḥ sāndrā ghanā guravaḥ | amlebhyaśca madhurā iti | tilapiṇyākasya vikṛtiḥ śuṣkaśākaṃ virūḍhakaṃ cāṇḍākīvaṭakaṃ ca dṛṣṭināśanaṃ doṣalaṃ tridoṣakopanaṃ glānikaraṃ guru ca virūḍhakaṃ aṅkuritāni bhṛṣṭāni sasyāni | cāṇḍākyā sahasāsutaṃ mudgādivaṭakaṃ cāṇḍākīvaṭakam | parpaṭābhidhānā bhakṣyā laghavo rucikarāśca | tebhyaśca kṣāraparpaṭo'tilaghuḥ | yaḥ svarccikādijalena saṃskriyate ||

11.55

rāgāḥ sitāmadhvādikṛtāḥ | ṣāḍavā amlasiddhaśākaśarkarādikṛtāḥ | hṛdyā vṛṣyā rucikarā guravaśca | tathā prīṇanā manaḥprītikarāḥ | bhramādināśanāśca | rasālā karamathitenamaricaśarkarādisaṃyuktena ca dadhnā kṛtā | vṛṃhaṇī dehasya bṛhatyakarī vṛṣyattvādiguṇayuktā ca | sarve ca pānakaṃ śramādiharaṃ prītikaraṃ guru viṣṭambhi mūtralaṃ hṛdyaṃ ca | tacca pānakaṃ yathādravyaguṇaṃ svasaṃskāradravyaguṇasaṃyuktaṃ ca ||

11.62

lājāstṛḍādīn cchindanti nāśayanti kāsaṃ pittaṃcopaśayanti | agnidīptikarā laghavaḥ śītavīryāśca | pṛthukā gurutvādimuktāḥ haritadhānyāni satuṣabhṛṣṭamusalāhatāni pṛthukaśabdvācyāni dhānā bhṛṣṭadhānyāni viṣṭambhinī rūkṣādiguṇayuktā ca | saktavaḥ kaṇṭhāmayanetrāmayādināśanāḥ laghavaḥ | udakena pītāśca sadya eva balaṃ kurvanti | teṣāṃ saktūnāṃ piṇḍī nicayāt saṃhatatvāt yā kaṭhinā sā gurvī | yā tu mṛduḥ sā tu laghuḥ | ye tu saktavaḥ udakamiśrā avalihya bhujyante sā avalehikā dravatvayogāt laghīyasī | śaṣkulīmokādīnāṃ bhakṣyāṇāṃ caivānayaiva saṃyogasaṃskārakāṭhinyādiviśeṣadiśā guṇakalpanā vyākhyātā | saktūṃścaivaṃvidhān nādyāt | udakāntaritānudakena jalenantaritān vyavahitān | ādau piṇḍī madhye jalamante ca piṇḍītyudakāntaritān | dvau vārau dviḥ | niśāyāṃ rātryām | kevalānudakādirahitān | bhuktvā cānyadodanādi | dvijaiśchitvā dantaiḥ karasthāṃ piṇḍīṃ cchitvetyarthaḥ | bahūṃśca saktūnnādyāt | karkandhubadarādīnāṃ ca phalādīnāṃ saktavaḥ kramādicchidaḥ amlarasā hṛdyāśca | te sarve saktavaḥ prakṛtidravyaguṇayuktāḥ||

11.63

piṇyākokṣoṭatilādīnāṃ niṣpīḍitatailakalkaḥ | glānikaro viṣṭambhī dṛṣṭivikārakaraśca | veśavāraḥ nāgaradhanikājājyādisaṃskṛtaṃ sūkṣmacchinnaṃ māṃsam | sa guruḥ snigdhaḥ balavardhano'ṅgopacayavardhanaśca | mudgādijāstu veśavārāḥ ye sūkṣmacchinnairmudgayavadhānyādibhiḥ kriyante | loke ca pūraṇamiti prasiddhāḥ te guravaḥ prakṛtidravyaguṇāśca | ādigrahaṇena śimbidhānyānāṃ ca varakasūkarāṇāmudgādīnāṃ ca grahaṇam ||

11.64

kukūlādisiddhānapūpān ekayonīnekaGenericśālikāraṇān sato yathottaraṃ laghūnitijñānīyāt | tenaitaduktaṃ bhavati sajātīyāt kukūlapakvāt karparapakvo laghurāgnisaṃyoganai kaṭyāt| karparapakvācca bhrāṣṭrapakvaḥ| bhrāṣṭrapakvācca kandupakvaḥ| kandupakvāccāṅgārapakvaḥ | ekayonigrahaṇaṃ bhinnayoneḥ samalāghavaśaṅkānirāsārtham | ekohyapūpo guruśāliyoniḥ kukūlapakko'nyena laghuśāliyoninā kukūlapakvenaiva na lāghave samaḥ| tathā.eko laghuśāliyoniḥ kukūlapakko'nyo guruśāliyoniḥ karparapakvaśca samāvityarthaḥ | anayā ca kalpanayā sarvamūhyam | kukūlo bāṣpasvedaḥ | kṣārapāka ityanye | karparo jvālāsantaptakapālaḥ | bhrāṣṭraṃ prasiddham | kanduḥ aṅgārataptā bhittiḥ aṅgārasvarūpeṇaiva | iti kṛtānnavargaḥ ||

Linked texts (1)

Aṣṭāṅgasaṃgraha — Vāgbhaṭa, Sanskrit