Ashtangasamgraha 35.19

35.19

tenetyādi | tenānuvāsanenordhvaṃ pravṛttena vātadhāmni pakvāśaye atiṣṭhatā vāyorjayo na syāt | snehasya cānivartanādapatanādviśeṣeṇāgnināśaḥ syāt | yadā tu bhuktaṃ tadānuvāsanaṃ deyameva | yataḥ sadyośitenāhāreṇāmāśaye ruddhe pakvāśayastho'nuvāsanasnehaḥ pakvāśayasthamevānilaṃ hanti | annapākataśca pakvāśayastha eva cyavate | snehaḥ patatyato' gnināśaṃ na karotīti bhāvaḥ asmādannaṃ bhuktavānanuvāsya iti sambandhaḥ | nirūhyaḥ punarbhuktavānevānnam | yato bhukte nirūho jīvitaṃ hanti | kathamityāha nirūhaścetyādi | nirūhastāvattīkṣṇavegaḥ samīro vāyurapi tīkṣṇa eva | tāvubhaunirūhasamīrau tīkṣṇavegatvānnena sahādho gudenāgatau śakṛtā purīṣeṇa vā sārdhamūrdhvaṃ mukhena vāgatau samalena sapurīṣeṇa vā āhāreṇa viṣṭabdhau koṣṭha eva sthitau | sarvathā sānne koṣṭhe nirūhasamīrāvāśu jīvitaṃ haretām | ato'smānnanirūhyastvannaṃ bhuktavāniti sambandhaḥ |